Ruka 16:13 - Te B'aib'ara

¹³ Akea te toro ae kona n toro irouia uoman mataniwi; b'a ane e na ribaa temanna, ao e na tangira temanna, ke e na rangi n reitaki ma temanna, ao e na kakeaa bonganan are temanna. Kam aki kona n toro iroun te Atua ma kaub'ain te maiu aei.

Ruka 16:13 ပူးပေါင်းရင်းမြစ်များ

Mataio 4:10

E taku ngkanne Iesu nako ina, “Naako akuu, Tatan! B'a e koreaki ae kangai, ‘Ko na taromauria te UEA ae Atuam, ao ko na toro i Rouna n ti Ngaia!’ ”

Mataio 6:24

Akea te aomata ae kona n toro irouia tooka uoman: b'a ane e na riba temanna, ao e na karinea are temanna. Kam aki kona n toro iroun te Atua ma kaub'ain te maiu aei.

Ruka 11:23

Ane aki mena i Rou, ao e rawa nako Iu; ao ane aki uaia ni boboti ma Ngai, ao e kamaae nako.

Ruka 14:26

Ngkana iai ae kan riki b'a au reirei ma e aki riba tamana ma tinana ma buuna ma natina ma tarina ma m'anena, ma n aki riba naba maiuna, ao e aki kona n riki b'a au reirei.

Ruka 16:12

Ao ngkana kam aki kakaonimaki nakon are ana b'ai te aomata temanna, ao antai ae na anganingkami baike bon ami b'ai?

Ruka 16:9

Ao I taku nako imi, Kabonganai kaub'aimi aika b'ain te maiu aei b'a b'aini karekeaia raomi; ao ngkana a bane, ao ane kam na m'aneaki n akoaki ni ne ni maeka ake a aki mamauna.

Ruka 9:50

Ma E taku Iesu nako ina, “Tai katokia; b'a te aomata ae aki rawa nako imi ao bon raomi.”

Iakobo 4:4

Ngkami aika kanga ainenum'a aika taani wene ni bure, kam aki ataia b'a te iraorao ma b'ain te maiu aei bon ribaan te Atua? Ma ngaia aei, b'a ane kan i raorao ma b'ain te maiu aei, ao e riki b'a ana kairiribai te Atua.

Iotua 24:15

Ngkana kam aki kan toro i rouna, ao kam na motika nanomi n te bong aei b'a antai ae kam na toro i rouna, antiia ami bakatibu ake i Metobotamia, ke antiia taian Amoraite ae kam maeka i abaia ngkai. B'a ngai ma au utu ti na toro iroun te UEA.”