I-Rom 8:15 - Te B'aib'ara

¹⁵ B'a te Tamnei are kam anganaki E aki karikingkami b'a tooro, ao E aki karika te maku i nanomi; ma kam anganaki te Tamnei ae e natinaki te aba i rouna, ao ae ti a kona i rouna ni kaangai iai: “Aaba Tamara!”

I-Rom 8:15 ပူးပေါင်းရင်းမြစ်များ

Te Otinako 20:19

Ao a taku nakoni Moote, “Ti rangi ni kakauongo ngkana ko taetae nako ira, ma ti rangi ni maaku ngkana E taetae te Atua nako ira, b'a ti na mate iai.”

Itaia 56:5

Ao i mwiin anne, e na katea te Tembora ma arami aika a koreaki i aona. E na raoiroi riki aei nakon ae karikan te nati, b'a e na tiku b'a te kanuringa ae e na tei ikekei n aki toki.

Ieremia 3:19

I aki toki n tangiria b'a N na karaoingkami b'a kaanga bon au ataei ma n anganingkami te aba ae te kabanea n tamaroa, te aba ae te kabane n tikiraoi i aon te aonnaba. I tangiringkami b'a kam aranai b'a “Tamami” ao kam na aki rairaki nako mairou.

Warekaia Iteraera 17:12

Ao a tang aomata nakon Moote ni kaangai, “E mate te aba n te waaki aei!

Mataio 25:25

ma ngaia are I maaku, ao I nako ni karaba am tarena i aantano. Noria, ao aei am b'ai!”

Mareko 14:36

Ao E taku n ana tataro, “Aaba, Tamau, a konaaki b'aai ni kabane i Roum; Ko na uota nako te m'angko ni karawawata aei mai Rou; ma tiaki nanou ae na iraki, ma e na iraki nanom.”

Ruka 11:2

E taku Iesu nako ia, “Ngkana kam tataro, ao kam na kangai, Tamara: E na tabuaki aram; e na roko Ueam.

Ruka 22:42

“Tamau, ngkana e riai i Roum, ao Ko na kararoa mai Rou te rawawata ni maraki ae N nang taonaki iai; ma tiaki nanou ae na karaoaki, ma e na karaoaki nanom.”

Ruka 8:28

Ngke e nora Iesu, ao e takaarua ao e b'aka i matana, ao e kangai n te b'ana ae korakora, “Tera am b'ai i rou, Iesu, are Natin te Atua are Moan te Rietaata? I butiko b'a Ko na aki kamarakai!”

Ruka 8:37

Ao aomata ni kabaneia ake kaain te tabo are abaia I-Kerata, a bubutiia b'a E na kitaniia; b'a a taonaki n te maaku ae korakora; ma ngaia are E toka Iesu i aon te booti ao E kataua te nako.

Ioane 16:8

Ao ngkana E roko, ao E na kaotia nakon te aba b'a e bure ootana n aron te bure ao te raoiroi, ao e bure naba ootana n aron ana motiki-taeka te Atua.

Ioane 20:17

E taku Iesu nakoina, “Tai riingai, b'a I tuai n rierake nakon Tamau; ma ko na nakoia tariu ao ko na atong au taeka aikai nakoia, I rierake nakon Tamau, are Tamami naba, ao Atuau, are Atuami naba.”

M'akuri 16:29

Ao ngaia e weewete i bukin taura, ao e biri n rin n ruru ni maku, ao e katorobubua ni bobaraaki i matani B'auro ma Tira;

M'akuri 2:37

Ngke a ongo aei aomata ao a teke nanoia; ma ngaia are a taku nakoni Betero ma taan tuatua ake raona, “Taari, tera ae ti na karaoia?”

I-Rom 8:16

Ao te Tamnei aei E i buobuoki ma tamneira ni kaotiotira b'a natin te Atua ngaira;

I-Rom 8:23

Ma tiaki ti baika karikaki ae e reke aei i rouia, b'a ngaira naba, aika iai iroura te Tamnei are te moanib'ai n ana b'ai n tituaraoi te Atua: ti ngirangira i nanora ni kaantaninga te natinaki ao kainaomatan rab'atara ni kabane.

I-Rom 8:26

Ao ai aron naba te Tamnei b'a E buobuokira ni mamarara: b'a ti aki ata arora n tataro ae riai, ma E bubuti te Tamnei i bukira ni ngirangira aika a aki konaaki n atongaki aroia.

I-Rom 9:4

ake Iteraera, ake a tabekaki iroun te Atua b'a natina, ake E kaota mimitongina nakoia, ao E karaoi taiani boraraoi ma ngaiia; E anganiia te Tua, ao e reke i rouia te aro n taromauri ni koaua, ma taeka n akoi,

1.I-Korinto 2:12

Ao ngaira ti aki anganaki te tamnei ae b'ain aon te aba, ma ti anganaki te Tamnei are mairoun te Atua, b'a ti na atai ana b'ai n tituaraoi te Atua nako ira.

2.I-Korinto 11:4

B'a ngkana e roko temanna i roumi n taekina Iesu riki temanna are tiaki Ngaia are ti taekinna, ke ngkana kam anganaki te Tamnei ae kaokoro ae tiaki Ngaia are kam anganaki, ke te euangkerio are tiaki naba ngaia are kam anganaki, ao kam konamaki n taotaon nanomi nako ina.

I-Karatia 2:4

E riki aei i bukiia taari ni kewe ake a karinaki ni karabaaki i buakora b'a a na taratarai aroni inaomatara are reke iroura n reitakira ma Kristo Iesu. A tangiria b'a a na tau-toronira,

I-Karatia 5:1

B'a E kainaomataira Kristo i bukin te aro n inaomata; ma ngaia ae kam na teimatoa, ao kam na tai manga bae i aan te amo n toronaki.

I-Ebeto 1:5

E a kaman tia ni baireia, n ai aroni kukurein nanona, b'a ti na natinaki i rouna iroun Iesu Kristo.

2.Timoteo 1:7

B'a E aki anganira te Atua te Tamnei ae karikira b'a ti na mamaku; ma E anganira te Tamnei ae kaoniira n te korakora, te tangira, ma te kona n taon nanora nakoni baika e tangiri te rab'ata.

Ebera 2:15

ao n te aro aei E a kainaomataia iai aomata ni kabaneia aika a toronaki n aia bongi ni maiu ni kabane ni makan te mate.

Iakobo 2:19

Ko taku b'a ti temanna te Atua; e eti am taeka anne. A boni kakoaua naba te taeka anne taian taimonio, ao a ruru ni maku.

1.Ioane 4:18

Akea te maaku i nanon te tangira; ma te tangira ae kororaoi e kaki te maaku. B'a iai rekereken te maaku ma te motikitaeka ni karawawata; ao ane mamaku ao e tuai ni kakoroaki raoi n te tangira.