I-Ebeto 5:2 - Te B'aib'ara

² ao kam na b'aina te maiu n tangira, n ai aroni Kristo ngkae E tangirira naba, ao E anga Ngaia b'a E na mate i bukira b'a te karea nakon te Atua, ae te karea ae boiarara ae kamateaki.

I-Ebeto 5:2 ပူးပေါင်းရင်းမြစ်များ

Karikani B'aai 8:21

E kakukureia te Atua boiararan te karea aei, ao E taku te UEA i boni nanona, “N na bon aki manga karokoa te rekenikai n te aonnaba i bukin aia m'akuri aomata, b'a bon anuani maiuia karaoan te bure ma ngke a moan rikirake. N na bon aki manga kamaunai b'aai aika maiu ni kabane n aron ae I a tia ni karaoia n te tai aei.

Te Otinako 29:18

Ao i mwiina, kam na kakoaua raoi b'a e tinimaki raoi rab'atan te man ni kabane b'a e na kakukureiai boina.

Te Otinako 29:25

I mwiin aei, e na katukaki te iriko ni man ma te kariki i aon te baonikarea ma ni kawaerakea bubuna ma boina are N na kukurei iai.

Nakoaia Ibonga 1:13

E na bon kaitiaka kanoannanon ma waen ana karea te aomata, ao te ibonga, e na uota te karea nakon te UEA, ao e na kabuoki ni kabane i aon te baonikarea. E na rangi ni kakukureia te UEA boiararan te karea aei.

Nakoaia Ibonga 1:17

E na taui bain te mannikiba ni kauoua te aomata, ao e na katikia ni katabwena rab'atan te mannikiba, ma e na aki kounako bain te mannikiba. Ao i mwiina, e na kabuokia i aon te baonikarea. E bon rangi ni kakukureia te UEA boiararan te karea aei.

Nakoaia Ibonga 1:9

E na bon kaitiaka kanoannanon, ma waen ana man te aomata, ao te ibonga e na kabuoka te karea ni kabane rab'atana i aon te baonikarea. E na rangi ni kakukureia te UEA te angakarea anne.

Nakoaia Ibonga 3:16

E na kabuoki baikai ni kabane te ibonga i aon te baonikarea b'a te karea are te am'arake ae kakukureia te UEA. Ana b'ai te UEA taian nenea ni kabane.

Amota 5:21

E taku te UEA, I ribaai ami botaki n taromauri; I bon aki kan tarai!

Warekaia Iteraera 7:21

temanna te kao te teei, ma temanna te tiibu mm'aane, ma temanna te tiibu te teei ae te mm'aane ae teuana ana ririki b'a te karea ni kabuokaki;

Mataio 20:28

B'a aron Natin te Aomata ngkae E aki roko b'a E na tautoronaki te aba i Rouna, ma E roko b'a E na toro irouia aomata, ao b'a E na anga maiuna b'a b'aini kainaomataia aomata aika bati.

Ioane 13:34

I anganingkami te tua ae boou: kam na i tangitangiri; n ai arou ngke I tangiringkami, b'a kam aonga n i tangitangiri.

Ioane 6:51

Ngai te am'arake ae reke te maiu mai iai are ruo mai karawa. Ane kana te am'arake aei, ao e na maiu n aki totoki; ao te am'arake ae N na anga i bukini maiun te aonnaba bon irikou.”

I-Rom 15:16

b'a ana tia m'akuri Iesu Kristo ngai i bukiia aomata aika tiaki I-Iutaia. I m'akuri b'a ai aron te ibonga ngai n tataekina ana euangkerio te Atua, b'a a aonga n riki aomata aika tiaki I-Iutaia b'a ai aroni karea aika E na kukurei te Atua i rouia, aika a tia ni katabuaki i bukina iroun te Tamnei are Raoiroi.

I-Rom 4:25

are E anga te Atua b'a E na tiringaki i bukin ara bure; ao E a manga kamaiua i bukira, b'a a aonga ni kaetaki arora n reitaki ma te Atua.

I-Rom 8:3

B'a te bae e aki kona ni karaoia te Tua ngke e mamara i bukin te rab'ata, ao E karaoia te Atua: b'a E kanakoa bon Natina ma rab'atana ae ai aron rab'atara ae bubure, b'a E na motika taekan te bure ae n te rab'ata ni kabuakakaa, ao b'a E na kamaunaa te bure.

I-Rom 8:37

Ma moan te tokanikai ngaira i aoni baikai ni kabane iroun Teuare tangirira.

1.I-Korinto 16:14

Kam na karaoi b'aai ni kabane ma te tangira.

1.I-Korinto 5:7

Kam na kaki te iiti nikawai, b'a kam aonga n riki n ai aron te kariki ni buraawa ae boou are akea te iiti iai: b'a bon anne aromi. B'a b'ain te Toa are te Riao bon te karea ae te tiibuteteei are Iesu Kristo, are E a tia ni kamateaki.

2.I-Korinto 2:14

Ma e na katituaraoaki te Atua, are Ngaia ae aki toki ni kairira irouni Kristo n te m'aati n tokanikai; ao E kabonganaira ngaira aika taani kabuta ataakini Kristo nakon taabo nako b'a kanga ai aron te boi ae boiarara.

2.I-Korinto 2:15

I bukini Kristo ao ti a riki nakon te Atua b'a te boi ae boiarara, ae e kiakia nako boina i buakoia aika nang kamaiuaki, ao i buakoia naba aika nangi mate;

2.I-Korinto 8:9

B'a kam ata ana akoi ara UEA are Iesu Kristo, b'a ngke E kaub'ai, ao E riki n aki kaub'ai i bukimi, b'a kam aonga ni kaub'ai n ana aki kaub'ai.

I-Karatia 1:4

are anga Ngaia i bukin ara bure, b'a E aonga ni kamaiura mai aon te aba ae buakaka aei, n ai aron nanon Atuara ae Tamara,

I-Karatia 2:20

Ao ai tiaki ngai ae I maiu ngkai, ma Kristo ae maiu i nanou; ao arou ae I maiu iai n te rab'ata, I maiu n onimakinan Natin te Atua, are E tangirai, are E anga Ngaia i buku.

I-Ebeto 1:4

B'a i m'aini karikan aonnaba ao E a kaman rineira i bukina ngkai ti katiteuanaki ma Kristo, b'a ti aonga n itiaki ma n aki bareka i matana; ao n ana tangira,

I-Ebeto 3:17

b'a E na maeka Kristo i nanomi i bukin ami onimaki, ao b'a a na iai wakaami ma aami n te tangira,

I-Ebeto 3:19

b'a e aonga naba n iai iroumi te kona n ata tangirami irouni Kristo, are e aki konaaki n ataaki raoi arona, b'a a aonga ni kaonaki maiumi n anuan te Atua ni kabane.

I-Ebeto 4:15

Ma ti na rikirake n aaro nako nakon arora n reitaki ae nako raoi ma Kristo, are atun te ekaretia; ao e na reke aei n tataekinan te koaua ao ni maiuakinan te tangira.

I-Ebeto 4:2

kam na b'aina te nanorinano ni kabanea ma te nimamannei, ma te taotaonaki n nano, ni tob'atob'ai aromi ma te nano n tangira;

I-Ebeto 5:15

Ma ngaia ae kam na taratarai aromi ni maiumi: kam na aki maiu n ai aroia akana aki ataib'ai, ma kam na maiu n ai aroia akana ataib'ai.

I-Ebeto 5:25

Mm'aanenum'a, kam na tangiriia buumi, n ai aron naba Kristo ngkae E tangira te ekaretia, ao E anga Ngaia b'a E na mate i bukina.

Te Tua-Kaua 27:6

Kabonganai atiibu aika a aki koreaki ni b'aai ni m'akuri, ao karaoa te baonikarea iai. Ao i mwiina, kam a kona n anga taiani karea ake kakukureian te UEA iai, ao kabuoki ni kabane i aon te baonikarea anne.

I-Biribi 4:18

Ma a reke b'aai ni kabane i rou, ao a kabatiaki riki au b'ai. A bane n reke i rou baika I kainanoi ngkai a reke i rou b'aai aika e uoti Ebaberorito mai roumi. A riki b'a kanga ai aron te boi ae boiarara ae te karea ae tangiraki, ae E kukurei te Atua iai.

I-Korote 3:14

Ao kam na b'aina te tangira i aoni baikai ni kabane, b'a ngaia ae boti ni kabaei b'aai ni kabane.

1.I-Tetaronike 4:9

Akea kainanoan te koroboki nako imi i bukin aromi n tangiriia raomi ni Kristian: b'a kam a bon tia n reireiaki iroun te Atua b'a kam na i tangitangiri;

1.Timoteo 2:6

are anga Ngaia i bukini kainaomataiia aomata ni kabaneia. E a kaotia n arona anne b'a te b'ai ni kakoaua n taina ae riai i bukin nanon te Atua n tangiriia aomata ni kabaneia b'a a na kamaiuaki;

1.Timoteo 4:12

E na tai kakeaa bonganam temanna ngkai te rorobuaka n ataei ngkoe; ma ko na riki b'a te banna ni kakairi nakoia aika onimaki, n am taeka, n te bae ko karaoia, n arom n tangira, n am onimaki, ma te aro ni maiu ae itiaki.

Tito 2:14

are anga Ngaia i bukira, b'a E aonga ni kainaomataira man te buakaka ni kabanea, ao E aonga ni kaitiakiira b'a aomata aika ana aomata n ti Ngaia, aika iai nanoia ae korakora ni kani karaoi m'akuri aika raraoi.

Ebera 8:3

B'a a rineaki ibonga aika kakannato n tatabemaniia nako nakon aia m'akuri b'a a na anganga b'aintituaraoi ma karea; ma ngaia ae e bon riai iroun ara Ibonga ae Kakannato b'a e na iai naba te b'ai ae E na anga b'a te karea.

Ebera 9:14

ao ai bati ra riki kaitiakani mataniwin nanora mani m'akuri aika akea uaaia n raraani Kristo are anga Ngaia iroun te Tamnei are Raoiroi n aki totoki b'a te karea ae akea buakakana nakon te Atua, b'a kam aonga n toro iroun te Atua ae maiu!

Ebera 9:23

Ma ngaia ae e riai b'a a na kaitiakaki baike katotoon oi ni b'ai ake i karawa n te aro anne. Ma b'aini karawa a tangiri aaro n angakarea aika raraoi riki nakon aikai.

Ebera 9:26

B'a ngke aroni Kristo anne, ao e na bon okioki marakina ni moa mani karikan aonnaba. Ma ngkai, ngkai e nangi roko tokin te tai ao E a ti kaoti ti te teuana te tai ao akea riki, i bukina b'a E na kamaunaa te bure n arona n anga Ngaia b'a te karea.

1.Betero 4:8

Ma e a moamoa i aoni b'aai ni kabane b'a kam na kabatia te i-tangitangiri; b'a e rabuni buure aika rangi ni bati te tangira.

1.Ioane 3:16

Ti ata te tangira n aei, ngke E anga maiuna i bukira; ma ngaia ae e riai b'a ti na anga maiura i bukiia taari.

1.Ioane 3:23

Ao aio ana tua, b'a ti na onimakina aran Natina are Iesu Kristo, ao ti na i tangitangiri, n ai aron taekan te tua are E anganira te Atua.

Te Kaotioti 1:5

ao ami b'ai naba te akoi ma te raoi mairoun Iesu Kristo, are kakaonimaki, are te moa ni kamaiuaki mai buakoia maate are E manga uti mai buakoia maate, ao are aia Mataniwi uea i aonnaba. E tangirira, ao E kainaomataira man ara bure ni matena;

Te Kaotioti 5:9

Ao a anene n te anene ae boou, ao a anene ni kaangai, “Ko riai n anaa te niira ni boki ma ni kanakoi b'aini kanim'ana ake kanikina. B'a Ko kamateaki; ao Ko kamaiuia aomata n raraam b'a ana b'ai te Atua mai buakoia baronga nako, ma reeti n aomata nako, ma aomata nako aika a kakaokoro aia taetae,