Ieremia 29:14 - Te B'aib'ara

¹⁴ ao N na kariaia ami taromauri. Ao i mwiina, N na bootingkami mairouia botannaomata nako ake I kamaaenakoingkami nako buakoia ngkoa, ao kam na manga okira Ierutarem.

Ieremia 29:14 ပူးပေါင်းရင်းမြစ်များ

1.Rongorongo 28:9

Toromon ae natiu te m'aane, kona riai n taromauria te Atua ao ongotaeka i rouna ma nanom ni kabane ma am iango, n aron are I a tia ni karaoia. E atai am iango ni kabane ao bukin karaoan b'aai iroum, ao ngkana ko tang nakoina, ao E na ongo am tataro nako. Ma ngkana ko aki kubariia, ao e na bon aki tabeakiniko n aki toki.

Taian Areru 126:1

Ngke E kaokira te UEA nakon ana kaawa ae Ierutarem, ao ai aron ae ti mii!

Taian Areru 126:4

Te UEA, Ko na manga kaoka kab'aiara nakoira, n ai aron te raanga n ran te rereua are i maiaki.

Taian Areru 32:6

Ma ngaia ae a riai akana tangiriko n tataro nakoim n taai ake a kai nanoia iai; Ao ngkana a roko kaangaanga b'a kanga ai aron rokon te ieka, Ao a na bon aki rotaki iai.

Taian Areru 46:1

Boni nera ni katantan ao korakorara te Atua. E kaan n taai nako ni buokira n tain te kangaanga.

Itaia 14:1

E na nanoangaea Iteraera te UEA ao e na manga karikiia b'a ana aomata aika a rineaki. E na kaokiia nakon abaia, ao a na iraki irouia ianena b'a a na riki b'a Iteraera naba.

Itaia 43:5

Ko na aki maaku b'a I raoniko. N na ikotingkami mai mainiku ao maeao.

Itaia 43:6

N na kaangai nakon meang ao maiaki, “Kainaomataia natiu m'aane ma natiu aine! kaokiia man aaba aika a raroa.

Itaia 45:19

E aki taetae te UEA n taabo aika a roo aika a raba ke n tangiria kanoan Iakob'a b'a a na kua ni kakaaea. E na taekina te koaua te UEA ao aei te b'ai ae e taekinna

Itaia 55:6

Rairaki nakon te UEA! E boni konaa naba n reke. Weewetea te Atua! E kaan.

Ieremia 12:15

Ma N na manga nanoangaiia botannaomata aikai n te tai teuana ma ni manga kaokiia nako oin abaia nako.

Ieremia 3:14

Bon ataei ngkami aika kam aki kakaonimaki, ma bon au b'ai ngkami. Okira mwengami! N na anaa temanna ke uoman man ami kaawa n tatabeua nako ao ami kaainga ao N na uotiia nako Tion.

Ieremia 30:10

Iteraera, bon au aomata ngkami, ma ngaia ae kam na aki maaku. Iteraera, kam na aki nim'atoaua. N na kamaiungkami man te aba are e raroa nako, man te aba are kam kataenikaiaki ngkoa iai kam na oki nakon mwengami ao kam na maiu ma te rau; Ane kam na mano raoi, ao akea ae e na konaa ni kakamaakuingkami.

Ieremia 30:18

E taku te UEA: Kaain Iteraera, N na akoingkami ma ni kanakoingkami nakoni mwengami. E a wene n uruaki ngkai Iteraera, ma kam na manga kateia, ni katiaa ma te bareti ae e boou.

Ieremia 30:3

N te bong teuana ao a na oki Au aomata aika uakoraki aika Iteraera ma Iuta nakon abaia are I anganiia aia bakatibu.”

Ieremia 31:16

Katoka tangim ao kaoi rannimatam. A na bane ni kabooaki mwiin b'aai ni kabane ake ko a tia ni karaoi i bukiia natim; ane a na oki man abaia kairiribai.

Ieremia 31:17

Bon iai te kaantaninga i bukin am bong aika a na roko. Ane a na okira mwengaia natim. Bon aei Au taeka Ngai ae te UEA.

Ieremia 31:23

E taku te UEA ae Moan te M'aaka ae Atuaia Iteraera: I berita b'a N na kainaomataia kaain Iuta ma ni kairiia rikaaki nakon aia kaawa ni koaua. Ao ngkana I karaoa aei, a na manga taetae riki ni kaangai, “Ti tataro b'a E na kakab'aia mwengana te UEA, te maunga ae e tabu i Ierutarem ike e tei iai ana Tembora.”

Ieremia 51:10

A taku Iteraera, Tuangiia kaain Tion ni kabane! E a tia te UEA n irantaanga i bukin te b'ai are e karaoia B'aburon nakoira.”

Ieremia 8:3

Iai i buakomi kaain Iuta aika a na tiku ni maiu, ma N na kairoroingkami b'a kam na nako abaia ianena, ao ane kam na tangiria riki ni mate. Bon aei au taeka Ngai ae te UEA.

Etekiera 37:21

ao i mwiina, ko na kaangai: N na manga ikotiia Iteraera ma ni kaokiia nakon mwengaia mairouia botannaomata ianena ake a maeka iai ngkai.

Etekiera 39:25

Ngkai N nang kaota Au nanoanga nakoia Iteraera ma ni kaokiia mairouia ianena ake a maeka i buakoia. Bon kanoan Iakob'a ngaiia, ma ngaia ae, N na kakab'aiaia ma ni kaotia b'a I tabu.

Amota 9:14

N na kaokiia Au aomata nako abaia. A na manga karaoa aia kaawa aika urubekebeke ma ni maeka iai; a na uniki aia kureebe ma ni mooi wain mai iai; a na karaoi aia oo-n-aroka ma n am'arake mai iai.

Mika 4:12

Ma a aki ataa nanon te UEA te botannaomata aei. A aki ataia ae a bootaki b'a a na bane n oreaki n ai aroia taian uita aika a bootaki, b'a a na oreaki ni kaakaki kuniia.

Teb'ania 3:20

E a roko te tai! N na kaokiia ake a maaenako nakon mwengaia. E na tanoata kakannatom n te aonnaba ao N na manga kaoka kab'aiam,” Bon ana taeka te UEA.

I-Rom 10:20

Ao e taetae Itaia n aki maku, ngke e taekina ana taeka te UEA are e kaangai: “I a reke irouia akana aki ukoukorai; I kaotai nakoia akana aki titiraki taekau.”

Te Tua-Kaua 30:1

I a tia n tuangingkami b'aai ni kabane ake E na karaoi te UEA ae Atuami i buakomi, ao I a tia naba n tuangingkami taiani kamaraia ake E na karokoi i aomi ngkana kam rawa nakoina. E na kamaenakoingkami nakon aaba aika raroa nako, ma ngkana kam ataia ae E katuaaingkami,

Te Tua-Kaua 30:3

Ao i mwiina, E na katoka katuaaeakimi ao E na manga akoingkami. Ngkana tao E a tia ni kamaenakoingkami nakon aaba ake i tabon aonnaba, ao E na manga kaokingkami

Te Tua-Kaua 30:5

nakon te aba are aia b'ai ngkoa ami bakatibu, ao ma ni karaoingkami b'a kam na tetekeraoi riki ma ni korakora riki nakoia.