Ao e tua te uea b'a a na bane mataniwiin ana bareti ni kaota karinean Aaman ni katorobubua i matana, ma ni bobaraaki nakoina. Ao a bane ni karaoa aei, ma bon ti Moretekai are e rawa ni karaoia.
ao a tuangnga ni katoabong b'a e riai ni ira te waaki arei, ma e aki kan ongo irouia, ao e taku, Bon te I-Iutaia ngai, ao I bon aki kona ni boobaraaki nakon Aaman. Ma ngaia are, a tuanga Aaman ae e rawa Moretekai n ongo ana taeka te uea.
Ao e rangi ni kukurei ma ni kim'areirei Aaman ngke e a oki man te baka n am'arake. Ma e a manga noora Moretekai i rarikin mataroan te bareti, ao ngke e aki teirake Moretekai nakoina, ke ni karinea ngke e ri rarikina, ao e rangi ni maraki nanona iai.
Ao e a rangi ni maraki nanon Nebukaneta, ao e a ura moana n un irouia Tiateraka, Metiaka ao Abeteneko. Ma ngaia are, e kanakoa ana taeka b'a e na kauraaki te ai ae itiua te tai kabuebuena nakon are boni kabuebuen ae e tataneiai te aba iai.