Ana Anene Toromon 4:12 - Te B'aib'ara

¹² Au kainrou, ae bon ti au b'ai, bon te nnenaroka ngkoe, te koburake n ran ae e kainaki nakoia tem'angina.

Ana Anene Toromon 4:12 ပူးပေါင်းရင်းမြစ်များ

Karikani B'aai 29:3

Ngkana a bane n roko taian tiibu ikekei, ao a kam'ainga te atiibu are rabunan matan te m'anib'a taan kawakin tiibu ma ni kamooia aia nanai n tiibu, ao a manga kaoka matan te m'anib'a ngkana a tia.

Ana Anene Toromon 4:9

Au kainrou, ae bon ti au b'ai, ko a tia n iraea nanou! N ti teuana iraean taarau iroum, ao raitiitin m'aen roroam, ko a tia n iraea nanou.

Ana Anene Toromon 6:11

I ruorikaaki n nooria b'a a uee kaai aika akota, taiani kureebe, ao kai n am'arake.

Ana Anene Toromon 6:2

E a tia n nako raou ae e tangiraki nakon ana nnenaroka ni b'ai ni kaboiarara, ike e na kaam'arakeia iai ana tiibu man rikoi taian kiebu.

Itaia 58:11

E na kairingkami n taai nako te UEA ma ni katauraoi b'aai aika a raoiroi i bukin kanami ngkana kam mena i nanon te rereua. E na angan rab'atami te marurung raoi. Kam na riki b'a kaanga te nne n aroka ae e m'aiti iai te ran ke te karaanga n ran ae a aki konaa n iki.

Ieremia 31:12

A na roko Au aomata n te Maunga are Tion ma ni karaoa aia bootaki ni kukurei; a na oota moaia i bukin Au kakab'aia. N na anganiia te uita, te kureebe, ao b'aan te oriwa, ao ai uana naba ma taian tiibu ao taiani kao. A na teetekeraoi Iteraera ao a na rikirake kaanga te nne n aroka ae e m'aiti te ran iai.

Otea 6:3

Ti na karaoa ara kabanea n tamaroa n ukoukora ataakin te UEA. E a bon roko kaanga taai n te ingabong; E na manga kamaiu nanora kaanga te karau ngkana e kabooua te aonnaba i nanon tain tokin te kam'aitoro.

1.I-Korinto 6:13

Ao temanna e taku, “Te am'arake i bukin te biroto, ao te biroto i bukin te am'arake.” Eng; ma te Atua E na kamaunai ni kauoua. B'a te rab'ata tiaki i bukin te wene ni bure, ma bon i bukin te UEA; ao te UEA i bukin te rab'ata.

1.I-Korinto 7:34

ma ngaia ae e bwenaua nanona. Ao te aine ae aki mareaki, ke te ateiaine, e iangoa ana m'akuri te UEA, i bukina b'a e kan anga rab'atana ma tamneina i bukin te Atua. Ma te aine ae mareaki e iangoi b'ain te aonnaba aei i bukina b'a e kani kakukureia buuna.

2.I-Korinto 1:22

are E kanikinaira b'a ana b'ai, ao E anganira te Tamnei i nanora b'a te kakoaua i bukini baika kawakinaki i bukira.

I-Ebeto 1:13

Ao ngkami naba, ngke kam ongo taekan te koaua, are te euangkerio are b'aini kamaiuami, ao kam onimakinna naba; ao kam anganaki te Tamnei are Raoiroi b'a kanikinaean ae ana b'ai te Atua ngkami, te Tamnei aei are atongaki n te taeka n akoi.

I-Ebeto 4:30

Tai karawaawata te Tamnei are Raoiroi, are Tamnein te Atua, are Ngaia are karika te aki nanokokoraki iroumi, b'a n te tai teuana ao kam na kainaomataaki man te bure.

Te Kaotioti 21:27

Ao e na bon aki kona n rin i nanona te b'ai ae kam'ara, ke ane e karaoa ae riai ni bati n ribaaki ma ni b'ab'aina te kewe; ma a na rin iai ti te koraki ake a tia ni m'akoro araia ni bokin te maiu are ana b'ai te Tiibuteteei.

Te Kaotioti 7:3

Ao e kaangai, “Kam na tai b'ainikirina aonnaba ma karawa, ma kaai, ni karokoa ae ti kanikinaeia moa ana toro Atuara i aon ram'aia.”