1.I-Tetaronike 4:17 - Te B'aib'ara

¹⁷ ao ngaira aika ti maiu n te tai anne ti na uotaki rake ma ngaiia nakon te tabo are a mena iai naang, ao ti na kaitibo ma te Uea i aani karawa; ao n te aro aei ti na memena n taai nako iroun te Uea.

1.I-Tetaronike 4:17 ပူးပေါင်းရင်းမြစ်များ

1.Uea 18:12

Tera ngke E waekoa n anaiko Tamnein te UEA n te tai are I kitaniko naba iai? B'a ngkana e roko Aaba n anaiko ao ko na bon aki reke i rouna. Ao ane e na manga bon tiringai. I bon tataromauria te UEA mangke te ataeinim'aane ngai.

2.Uea 2:11

Ao a tabe ni m'ananga ma n taetae nikawai ngke e a ti rina naba ni kaoti i marenaia te kaanibuaka ae e ura ae e katikitikaki irouia aoti aika a ura rab'ataia. Ao n te tai naba arei, ao e a roko te ang ae e korakora ni uotaarake rab'atan Eria nako karawa.

2.Uea 2:16

ao a taku, Bon iai iroura ikai m'aane aika a korakora aika nimangaun, taiaoka kanakoia b'a ana kakaaea am mataniwi. E na mena ngkoa ao E uotia nako Tamnein te UEA nakon taiani maunga ke taiani m'arua. Ao e taku Eritai, A na aki kakaaea. E na bon aki konaa n reke irouia.

Taian Areru 16:11

Ko na kaota nako iu te kawai are e nakon te maiu; E kaonai n te kukurei rokom ao e anganai te kakatonga n aki toki.

Taian Areru 17:15

Ao ngai, ae N na noriko, b'a akea au bure ae I karaoia; N na kukurei n norani buram ngkana I uti.

Taian Areru 49:15

Ma E na kamaiuai te Atua; E na kamaiuai mani m'akan te mate.

Taian Areru 73:24

Ko kairiirai n am Taeka n Reirei, Ao Ko na m'aneai rimwi nakon te neboaki.

Itaia 35:10

A na oki ma te anene aomata aika e a tia te UEA ni kamaiuia ngkana a rin i Tion. E na riki te kukurei b'a aia bau ni uea ae a na baunna n aki toki. A na bukamaruia ao a na takaarua b'a a nako ni kabane rawawataia ma raraomaia.

Taniera 7:13

I nanon mitaraeakinan baikai n te tairiki anne, I noora kaanga taraan natin te aomata Ao e tabe ni kawarai, ao e katobibiaki n taian nang, ao e nakon Teuare e maiu n akea tokina ao e tei i matana.

Mataio 26:64

E taku Iesu nako ina, “Ngaia ane ko taku. Ma I tuangngkami b'a ane kam na nora Natin te Aomata ni moa man te tai aei b'a E tekateka i angatain Teuare M'aka, ao b'a E nako mai i aon nangini karawa!”

Mareko 14:62

E kaeka Iesu, ao E taku, “Boni Ngai; ao ane kam na nora Natin te Aomata b'a E na tekateka i angaatain Teuare m'aaka, ao b'a E na nako mai n nangini karawa.”

Ioane 12:26

Ane toro irou, ao e riai n irirai; ao ike I mena iai, ao e na mena naba iai au toro; ane toro irou, ao e na karineaki iroun Tamau.

Ioane 14:3

Ao ngkana I nako ni katauraoi nne i bukimi, ao N na manga oki ni kairingkami nako iu; b'a ike I mena iai, ao kam na mena naba iai.

Ioane 17:24

“Tamau, I tangiriia ake Ko anganai b'a a na mena irou ike I mena iai, b'a a na nora neboakiu are Ko anganai ngke Ko tangirai i m'ain rikin aonnaba.

M'akuri 1:9

Ngke E a tia n atongi baikai, n te tai are a tabe n tarataraia iai taan tuatua, ao E uotaki rake; ao a aikoa noria ngke a tukaki mataia n te nang.

M'akuri 8:39

Ngke a aerake man te ran, ao E kairaki nako Biribo iroun Tamnein te UEA, ao e aki manga noria te iunaki, b'a e wakina kawaina ma te kim'areirei.

1.I-Korinto 15:52

n te tai ae moan te waekoa, n te rube ni mata, n tangin te kabanea ni bu. B'a ane e na tangi te bu, ao a na manga kamaiuaki maate n aki kona ni mka, ao ti na onikaki.

2.I-Korinto 5:8

A kakorakoraki nanora, ao ti tangira riki te kitana mwengara ae te rab'ata ma n nako ni maeka ma te UEA.

I-Biribi 1:23

Ma e katikaki nanou ni baika uoua, b'a I kan nako ni mena irouni Kristo; b'a moan te raoiroi aei.

1.I-Tetaronike 3:13

b'a E na kateimatoai nanomi, b'a a aonga n itiaki ma n akea kabuakakakiia i matan Atuara ae Tamara, ngkana E roko ara Uea are Iesu ma ana aomata aika itiaki ni kabaneia.

1.I-Tetaronike 4:15

B'a ae ti tuangngkami aei bon ana taeka te Uea: ngaira aika ti maiu aika ti tiku ni karokoa rokon te Uea ti na bon aki nako n rimoaia ake a tia ni mate.

1.I-Tetaronike 4:18

Ma ngaia ae kam na karau nanomi n taeka aikai.

1.I-Tetaronike 5:10

are mate i bukira, b'a ti na uaia ni maiu ma Ngaia ngkana tao ti maiu ke ti mate.

2.Betero 3:13

Ma n ai aron ana taeka n akoi, ti a tiku ni kaantaningai karawa aika boou ma te aonnaba ae boou, ike e mena iai karaoan nanon te Atua.

Te Kaotioti 1:7

Noria, E nangi nako mai Kristo ma naang; ao a na bane maata n noria, ao uake a ewaria a na noria naba; ao a na bane n tang aomata nako i aonnaba i bukin te baere e karaoaki nakoina. Eng, Amen.

Te Kaotioti 11:12

Ao burabeti ake uoman akekei a ongo te b'anaa ae korakora mai karawa ae kaangai nakoia, “Kam na rierake nako ikai.” Ao a rierake nako karawa n te nang; ao aia kairiribai a tarataraia.

Te Kaotioti 12:5

Ao neierei e bungia natina ae te mm'aane, ae na tauu taekaia botannaomata ni kabaneia, ni kairiia ma te matoa; ao e na anaaki natina n uotaki rake nakon te Atua ao nakon ana kaintokanuea.