Aebulania 12:2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

² ĩkumulaaĩlĩĩle ũYesu. mukola kuandĩĩlia, numukola kukamĩnkĩĩlia uusuĩĩli wĩĩtu. uMuene kunsooko ya ulumbi naalĩ uĩĩkue ntongela yaakue aluugigimĩĩlie umusalaba nukũshiitikolua inshoni, wikyalansile pa mukono wa kĩgoosia pityengu lya kĩtemi lya kĩnzua.

Aebulania 12:2 ပူးပေါင်းရင်းမြစ်များ

Matayo 16:21

Kwipũna paapo ũYesu nuandia kukualĩngia ĩamanigua aakue kĩna yumũjĩpĩĩle kwienda kũYelusalemũ, kũligia waagi wingĩ kuanampala nĩapolia naakulu nĩalangi, nukwiulagua, nulutondo lwa katatu kwiiiuka.

Matayo 20:28

Kĩna iio uMuana-muntu sika wijile kukĩtumĩlua, ĩpa kukĩtuma, nukwipũnia uuumĩ wakue wĩĩ kĩkomoli kunsooko ya iingĩ.”

Maliko 14:36

Nuũga, “Aba Tata, tũlũ ishũũmĩkile kumuako; ndeegelia ĩkĩĩko ĩkĩ; ĩpa sika kĩna numuloele ĩne, ĩpa kĩna umuloele ue.”

Maliko 15:28

Paapo gua uwandĩkua nautimĩĩligua naalĩ utambulue, “Nualĩĩligua palumuĩ nĩaleki.”

Maliko 16:19

ũShekulu Yesu pĩna nukondia kukĩtambuĩla nĩndĩo, nutualua kwigyulu, nwikyalansa pamukono wa kĩgoosia wa kĩNzua.

Maliko 9:12

Nuaĩĩla, “Tai, uElia wijile tangua wazĩpĩĩlie yensi; ĩpa palumuĩ niyaasio, nuandĩkĩlua mbii uMuana-muntu kĩna ukiaagĩkigua mingĩ nukwimelekigua.

Maliko 9:24

Ĩkamuĩ ũshee wa mulĩĩsia nukuuta nuũga, nasuĩĩlaa; aalĩĩlia usiitishuĩĩla waane!

Luka 17:5

ĩAtumua naamuĩĩla ũShekulu, “Kongeelie uusuĩĩli!”

Luka 23:11

uHelode numumelekia palumuĩ nĩĩlaasi aakue, nukukumupopota nukukumujiala intiila za kĩtemi; paapo numushookia kwa kĩPilatu

Luka 24:26

Sika alĩ yumũjĩpĩĩlene uKilisito kwiaagigua itĩ, nukwiingĩla muukulu waakue.”

Yohana 1:29

Mudaau yakue numuona ũYesu wijile kumuakue nuũga, “Laaĩ uMuana-nkolo wa kĩNzua nuukenkile umulandu wa unkũmbigyulu!

Yohana 12:24

Tai-taaii namuĩĩla, ĩmpekipemba kanga ĩsiite kwigua munsĩĩ nukwikĩa, ikikyala ing'ene. Kanga ĩkie, yukupĩaa upĩi wingĩ.

Yohana 12:32

Nineene pĩna nikinansulua kwipũna muna nsĩĩ, nikilũta tũlũ-tũũlũũ kumuane.”

Yohana 13:3

Luulo gua, ũYesu numanile kĩna uTata alĩ wamupĩĩle tũlũ mumĩkono yaakue nĩkangĩ kĩna alupũnile kwa kĩNzua nukwilongola kwa kĩNzua,

Yohana 6:40

Kuitĩ uu wau uulooa wa kĩtata waane, tũlũ wensi nukumulaaa uMuana nukwishuĩĩla mumuakue, wĩĩ nuupanga wa kalĩ nakalĩ; nineene nĩkakumũiukia palutondo lwa mpelo.”

Yohana 8:56

uIbũlahimu utata waani alĩ muloekigue waone ulutondo luane; nuluona, nulumba.”

Utendi 2:36

“Luulo gua, ĩnumba tũlũ nya Ĩsilaeli amane kutai ya kĩna uNzua wamutendile ũYesu unuasio naalĩ mumukonontelĩĩle mumusalaba kwitũla Shekulu, kangĩ Kilisito.”

Utendi 3:15

namumuulaga uyo uMuandio wa upanga, uyo uNzua naalumũiukilie kwipũna muakiu, nindiishie kuakuĩlli aakue.

Utendi 5:31

uNzua wamukulilie kumukono waakue wa kĩgoosia, wĩĩ Mutongeeli nuMugũni, wamĩpeele ĩĨsilaeli uupeli nuuleegeligua wa mĩlandu.

Utendi 5:41

Iio gua, ndĩo naapũna mũlindĩ liasio, nailumba kunsooko alĩ aalĩĩligue kĩna alĩ ijĩpĩĩle kwimelua kunsooko ya liinaa liakue.

1 Akolinto 1:18

Kunsooko ulukaani lwa musalaba kuĩo naalĩmĩlĩĩle ingĩ ulu, ĩpa kumuĩtu ishie nakuagũnue ingĩ ngũlũ za kĩNzua.

1 Akolinto 1:23

Ĩpa ishie kukumutanantagiaa uKilisito naalĩ mukononteelue mumusalaba; kuAyahũdi nayĩĩ kĩnkũmpa, nukuAgiliki nawĩĩ ulu;

Aepeso 2:16

Nukamantania tũlũ ensi naabĩlĩ nuNzua mumuĩlĩ umuĩ kunzĩla ya musalaba, nukuuuo nuuuulaga uulugu wasio.

Aepeso 5:2

Mugendele muuloogua kĩna uKilisito naalumuloogilue inie, nwĩsuula kunsooko yĩĩtu, wĩĩ pyũnio nipyolia kwa kĩNzua, kwitũla munũnku namuuza.

Apilipi 1:6

Nanulusanilie ntuulu, ya kĩna uyo naalĩ wandilie umulĩmo namuuza munsĩ yaani ukakuukondeelia sunga kuLutondo lwa kĩYesu Kilisito.

Apilipi 3:20

Ĩpa uukolakaa wĩĩtu ukoolĩ kwigyulu, kwipũna kuasio kumutũngĩĩle uMugũni, Shekulu Yesu Kilisito;

2 Timoteo 4:8

Naishaagile numuĩĩkĩlĩgue ngala ya kulukuuluu, ĩniasio ũShekulu mulamuli nwa kulukuuluu nukimpeela paLutondo luasio; kangĩ sika uneene dũũ, ĩpa nĩaasio gaa naauloogilue uwigyeleli waakue.

Aebulania 1:13

Ĩpa gua, wamuĩĩlĩĩle malaĩka kĩ tyũngo liensi, “Kyalansa pamukono waane nwa kĩgoosia Sunga pĩna nĩkakuaĩĩka ĩanaulugu aako nsĩlĩlĩ ya mĩgulu yaako?”

Aebulania 1:3

Uzo ingĩ weelu wa ukulu wa kĩNzua. kangĩ kĩna uNzua wĩĩlĩ, iio ninduyo wĩĩlĩ; nuikenka iintu tũlũ yensi kulukaani luakue lwa ngũlũ. Pĩna alutendile uweeligua wamĩilandu, alĩ wikyalansile pamukono wa kĩgoosia nwa ukulu kukiania,

Aebulania 10:14

Kuitĩ kwipyolia lĩmuĩ alĩ waakamĩnkĩlĩĩlie sunga kalĩ nakalĩ ĩaasio naalĩ eeligue.

Aebulania 10:33

intondo nzia namuĩĩkua kualiĩ pautukĩlua nimpatĩ, intondo nzia namukamantana nĩaasio naalĩ atendelue yaasio.

Aebulania 11:36

ĩĨĩa alĩ agemue naapopotua nukwikuangua sunga kwitũngua nĩmatendele nukwigumĩlua mukĩtũngo.

Aebulania 12:3

Kuitĩ mumusĩĩgĩkie uyo naalugigimĩĩlie inkungumi kĩna izi nazipũnile kuanamĩlandu kumuakue, koona mulekikatala, ĩmwineketa munkolo zaani.

Aebulania 13:13

Iio gua, nakupũne kumuagaane kunzi ya nkambĩ ĩkukenkile umuna waakue.

Aebulania 5:9

nduyo paasio pĩna nutũla mukamĩnkĩĩlũ nutũla muandio wa ugũnua wa kalĩ nakalĩ kuasio tũlũ naakumugombaa,

Aebulania 7:19

(kuitĩ uUlagĩĩlio sika ukutimĩĩlagiaa kakĩntu); paluandĩ luua, nawingĩligwa uulaaĩĩli nauuza nangũlũ, nukuwaasio kukumusũgamĩĩla uNzua.

Aebulania 8:1

uLukaani nalukulu muizi nakwitambula ntuulu, kutĩĩte umupolia namukulu nwĩkĩna itĩ, nwikalansile pamukono wa kĩgoosia wityengu lya kĩtemi lya Ukulu mwigyulu,

Aebulania 9:28

iio-iioo uKilisito pĩna alĩ mupũnigue pyolia kamuĩ dũũ, waĩkenke ĩmĩlandu ya iingĩ, nkua ya kabĩlĩ ukakigyelela, sika kumpola za mulandu ĩpa waagũne ĩaasio naamutũngĩĩle nkankanaa.

Yakobo 2:1

Anũna aane, mulekitũla nuuloeelania, pĩna mutĩĩte uusuĩĩli wa kĩShekulu wĩĩtu Yesu Kilisito mukola ukulu.

1 Petelo 1:11

naakeesekia kĩna muntu kĩ nityũngo kĩ naalĩ lyagĩĩligue nuMuau wa kĩKilisito naalĩ wĩĩlĩ munsĩ yaao, pĩna alukuatongeela kwikuĩla impola za waagigua wa kĩKilisito nuukulu naukitiata.

1 Petelo 3:18

Kuitĩ uKilisito nduyo alukiile kamuĩ dũũ kunsooko ya mĩlandu, munakulukuuluu kunsooko yaao nasika anakulukuuluu, koona wakutuale ishie kwa kĩNzua; nuulagua umuĩlĩ ĩpa ĩnkolo yaakue nĩpangatigua.

1 Petelo 3:22

Nunduyo ukoolĩ kumukono wa kĩgoosia nwa kĩNzua, wendile kwigyulu, pĩina ĩamalaĩka nĩnaakola usũũmi, ningũlũ, naakumugombagiaa, aĩĩkilue nsĩlĩlĩ yaakue.

Yuda 1:21

Ĩkendegeelĩ muuloogua wa kĩNzua; ĩmulindĩĩle ĩkĩnishungu kwa kĩShekulu wĩĩtu Yesu Kilisito sunga kuupanga wa kalĩ nakalĩ

Ukũnukulua 1:11

naluũga; “Aya nukumaona umandĩke mukĩtabũ, umatuale kumakanisa nama mupũngatĩ, Epeso nĩSimilina, nĩPaligamo, nĩTiatila, nĩSalidi, nĩPiladelipia, nĩLaodikia.”

Ukũnukulua 1:17

Pĩna nanumuona, nangua pamĩgulu yaakue zĩ muntu nukiile mukanka. Nuĩĩka umukono waakue nwa kĩgoosia mumuane, numbuĩla; “Lekioopooka, ĩne neene namuandio kangĩ nampelo,

Ukũnukulua 1:8

“Ĩne neene Alipa nuOmega,” muandio nĩmpelo, uugile ũShekulu uNzua, nukoolĩ, nĩnaalukoolĩ, nĩnukiiiza, Mukolangũlũ zensi.

Ukũnukulua 2:8

“Nukwa kĩmalaĩka nwikyanisa naliĩlĩ muSimilina andĩka, ‘Izi zozi uũgile uyo nwa muandio nunwa mpelo, naalĩwakiile, kangĩ nuĩ mupanga.’