8 « Doon kaleş unuur wi pnoorfën, ido wa unuur uyimanaan.
Unuur uţënk paaj na uloŋ uţënk kë Naşibaţi aba ulempul. Anoorfën unuur mënţ wi adoluŋ ulempul bŧi aba.
Naşibaţi adëman unuur uţënk paaj na uloŋ akuţ ado wa kë uyimani, ţiki anoorfën unuur mënţ wi abaaŋ ppaş iko bŧi.
« Ido kalemp ŋnuur paaj, kë uţënk paaj na uloŋ inoorfën, uwit na ubuuru ŋinu, na balemparu na bayaanţ biki nu bahilna banoorfën.
« Andoli ţi an awo kaŧiink anin na aşin, awo kadëman unuur wi pnoorfën. Nji dwooŋ Yawe Nawat Kabuka Naşibaţi i nan.
« Nadoon kadëman unuur wi pnoorfën, naţijan bnuura dko dyimanaan di naan. Nji dwooŋ Yawe Nawat Kabuka.
« Nalemp ŋnuur paaj, kë unuur uţënk paaj na uloŋ uşë wo unuur wi pnoorfën, unuur wi nayitiir nadëmanaan, naankdo nin ulemp uloŋ ţi unuur mënţ : du dko di nafëţaaŋ, unuur mënţ uwo wi pnoorfën wi nakdooŋ kadëman nji Yawe Nawat Kabuka.
