Lk 16:15 - Nouvo Testaman Kreol Morisien Harmonisation NTPS KM

¹⁵ Zezi dir zot, “Zot fer krwar ki zot ena lazistis zis pou lizie dimounn, me Bondie konn zot leker. Seki ena valer pou dimounn, enn abominasion pou Bondie.

Nouvo Testaman dan Kreol Morisien

¹⁵ Zezi dir zot, “Zot fer krwar ki zot ena lazistis zis pou lizie dimoun, me Bondie konn zot leker. Seki ena valer pou dimoun, enn abominasion pou Bondie.

Lk 16:15 ပူးပေါင်းရင်းမြစ်များ

Psom 10:3

Move dimounn li fier so prop move dezir; dimounn gourman li modi LESEGNER e li pena respe pou li.

Psom 49:13

Get ki ariv bann fezer ki krwar dan zot prop lafors! E ki trouv plezir dan zot prop diskour.

Psom 49:18

Mem si dan sa lavi-la enn dimounn ziz limem ere, apre tou, dimounn felisit twa kan to prospere,

Psom 7:9

O Bondie, twa ki lasours drwatir, twa ki konn ziz nou panse ek nou santiman, detrir lemal bann move dimounn e fer bann dimounn ki drwat vinn pli for.

Proverb 16:5

LESEGNER deteste larogans; bann arogan pou gagn zot pinision.

Proverb 20:6

Tou dimounn lor later dir ki zot sinser; an-verite, pena boukou ki to kapav vremem fer konfians.

Proverb 21:2

To kapav panse ki to ena rezon; me LESEGNER konn bien to lintansion.

Mt 23:5

Me zot kontan fer kiksoz pou lizie dimounn, zot bann filakter bien-bien gran e franz zot manto bien long.

Mt 6:16

Kan zot fer karem, pa bizin fer lakagn, kouma bann ipokrit, zot fer long-long figir pou montre lezot ki zot pe karem. Laverite mo dir zot, zot finn fini gagn zot rekonpans;

Mt 6:2

Kan to fer lasarite, pa bizin sonn tronpet kouma bann ipokrit fer dan bann sinagog ek dan lari, pou ki dimounn aplodi zot. Laverite, mo dir zot, zot finn fini resevwar zot rekonpans.

Mt 6:5

Kan zot fer lapriyer, pa fer kouma bann ipokrit ki kontan vinn devan pou priye dan sinagog e dan kat kwin lari pou ki dimounn trouv zot. Laverite mo dir zot, sa bann-la finn deza gagn zot rekonpans.

Lk 10:29

Me kouma dokter lalwa-la ti anvi montre ki li enn dimounn drwat, li dimann Zezi, “Kisann-la mo prosin?”

Lk 11:39

Lerla Lesegner dir li, “Ala kouma zot ete bann Farizien. Zot netway andeor zot koup ek zot lasiet bien prop, me andan zot ranpli ar lespri rapas ek mesanste.

Lk 18:11

Farizien-la ti pe dibout enn kote, apar, e li ti pe priye dan so leker, ‘Bondie, mo remersie twa ki mo pa kouma bann lezot dimounn, voler, explwater, adilter, e sirtou pa kouma sa komi tax-la.

Lk 18:14

Mo dir zot, kan sa dimounn-la rant so lakaz li pou gagn pardon Bondie, me pa lot-la. Seki rod grander pou abese, e seki abese pou gagn grander.”

Lk 18:21

Sef Zwif-la dir, “Depi mo zenes mo finn gard tousala.”

Lk 18:9

Zezi ti rakont sa parabol-la pou dimounn ki krwar zot drwat e ki ena mepri pou lezot.

Lk 20:20

Alors bann-la vey tou so mouvman; zot avoy bann espion ki deklar onet, pou trap Zezi kan li pou dir enn kiksoz ki pa korek. Koumsa zot pou kapav aret li e met li dan lame gouverner.

Lk 20:47

Zot devor ti-kas ki bann vev finn ramase e zot fer long-long lapriyer pou ki tou dimounn trouv zot. Zot pou gagn pli gran kondanasion.

Zn 2:25

Zezi pa ti bizin temwaniaz personn pou kone kouma dimounn ete, parski li ti kone ki ena dan leker dimounn.

Zn 21:17

Zezi demann li enn trwaziem fwa, “Simon garson Zan, eski to kontan mwa?” Pier sagrin ki Zezi demann li enn trwaziem fwa, “Eski to kontan mwa?” Lerla Pier reponn, “Segner, to konn tou, to kone ki mo kontan twa.” Zezi dir li, “Donn manze mo bann mouton.

Zistwar Bann Zapot 1:18

(Sa zom-la finn aste enn terin avek kas ki li ti finn resevwar pou so trayizon. Li finn tom tou so grander, so vant finn ouver e tou so trip finn sorti deor.

Zistwar Bann Zapot 1:24

Lerla zot ti priye e dir, “Segner, twa ki konn leker tou dimounn, dir nou kisann-la ant sa de-la to finn swazir pou ranplas

Zistwar Bann Zapot 15:8

Bondie konn leker tou dimounn. Pou montre ki li anvi ki bann non-Zwif osi krwar, li finn donn bann-la Lespri Sin, parey kouma li finn donn nou.

Let pou Romin 3:20

Koumsa personn pa trouv li zistifie devan Bondie parski li finn obzerv lalwa. Lalwa nek zis fer dimounn pran konsians ki pese ete.

Let pou Romin 8:27

Bondie ki kapav lir dan nou leker, li kone ki ena dan panse Lespri, parski Lespri intersed pou bann krwayan dapre volonte Bondie.

1 Ko 4:5

Akoz sa pa pronons okenn zizman avan letan fixe, avan ki Lesegner retourne. Lesegner ki pou met okler bann kiksoz ki kasiet dan nwar, ki pou revel bann lintansion ki dan leker dimounn. Lerla sakenn pou gagn louanz ki Bondie ena pou li.

1 Pi 3:4

me plito ena enn leker dou avek enn lespri trankil ki zame pa pou gate; e sa enn kado presie sorti depi leker Bondie.

1 Pi 5:5

Zot osi, bann zenn, zot bizin aksepte lotorite bann ansien. Zot tou bizin met lor zot enn tabliye ki apel limilite pou zot servi zot kamarad, parski Lekritir dir: “Bondie li kont bann ki ena lorgey, me li donn so lagras bann ki viv dan limilite.”

Revelasion 2:23

Mo pou touy to bann zanfan. Tou bann Legliz pou kone ki momem ki konn bann panse ek lespri tou dimounn. Mo pou tret sakenn dapre seki zot merite.