Titus 1:11 - Sa Ugud Apudyus

¹¹ Ḵasapuḻane paginḵona dida te dumadailda'tta pammatin da amode baḻyan, gapu si angituttuduwanda'tta daḵampun oḵyan aḵ mituttudu. Sa panggobdae angwa'tte ḵaḵna, ampabain te sa pilaḵe abus gagamgamanda.

Titus 1:11 ပူးပေါင်းရင်းမြစ်များ

Matthew 23:13

Pun ḵanan Jesus, “Ḵaddagu ḵayu, diḵayu we Pharisee ḵan mimistulun ni lintog. Ḵapappaila ḵayu! Te taḵon ay nu tuttuduwanyu oḵyan da tagu si inondae midoga si ampangatan Apudyus, adiyupun ḵoon anna ḵad isunan iyyonobyu sawange maḵwae lumnoḵanda. Taḵon ay diḵayu we mismu, adiyupun iyunude paipangat ḵan Apudyus ḵad adiyupun iyunud da udume maḻyad os paipangat ḵan siya.

Luke 20:40

Inggana'tte sadi, naippun ogon maḵaituḻode an-imus ḵan Jesus.

John 10:12

Sa matangdanane antangḵon, nu awad ilana'ḵ atape asu aḵ angiduḵḵus atta karnero, tenana dida ya umawid te daḵampun aḵ siya gattoḵe antangḵon ya sinḵuwa'tta karnero. Ḵad sa atape asu, iduḵḵusna doḵmaan dida ya umasbuḵda.

Romans 3:19

Igammu taḵu we sa Ugud Apudyus we nigili'tte awe naatod ḵan ditaḵu we Judyu we anuttuwa si lintogna. Pun adipun maḵwae awad angibaga ḵanane naippun basuḻna. Te losane tagu sumangu ḵan Apudyus we maḵuwis.

2 Corinthians 11:10

Sa ḵatuttuwaan anna'ḵ Kristu ḵan saḵon, tuttuwa bose naippun ḵallabbong taḵon ay ngaiman atta losane ili si probinsiya'd Achaia aḵ maḵwae amaginoḵ ḵan saḵone angiyisḵaḻ si anna.

1 Timothy 5:13

Annaya bos da udume gapunae adiyu dida idoga si listaan, paingsaondae baduuḻ ya nansayasayapda an-attuattun atta boḻoy. Ḵad isaḻaddae alliḵud ya anḵapuḵaput atta ippun biyangda ya ugudonda banage adipun oḵyan maugud.

1 Timothy 5:4

Yaḵon nu awad da abengna baḵon nu da apuna, ḵasapuḻane adaḻondae angayyuwan si inadae baḻu te sa baḻyanda umunae angwaanda si ḵewaaḻdae naapudyusan ta subbatonda da sin-abeng ḵan dida te sana mas-oman Apudyus.

1 Timothy 6:5

ya patilayune susubog. Ḵaḵnat te lummaweng somsomoḵda ya naliwatanda ḵatuttuwaan. Te sa ḵananda, sa naapudyusane biyag gapun ni bumaḵnangan.

2 Timothy 2:18

Guluguluwonda da pammatin da udum te indiyanda ḵatuttuwaan woḵ siya ituttududa nagangput ḵasine mataguwan da natoy.

2 Timothy 3:6

Te da udum ḵan dida, umoyda an-attuattun atta boḻoy da bubai ye allasu maawisanda ta allelawonda dida ta unudonda da ituttududa. Da sanae bubai, nambinsawda'tta ummamdane basuḻda ya da ansabasabali ye lawwenge pipionda.

Titus 1:7

Sa gapuna oḵyane ambaḻu ugalina ippun mipabasuḻ ḵan siya. Siya angipangpangu'tte gimunge nitaḻgodan ni ḵewaaḻ Apudyus. Pun ḵasapuḻane adi ampasindayaw, adi allasu sumang-ana ya adi pasig mabartek. Adipun oḵyan os gumuggulu ya adipun ḵamommod atte pilaḵ.

Titus 1:9

Sa mipanggob si pammatina, ḵasapuḻane gogomgomana da ḵatuttuwaane nagangput nituttudu ḵan siya ta lamogna ituttudu ustuustu we tuttudu'tta buḻunna ya soḻgagona didae angunud ḵan suppaḵana da sumullagi si ḵatuttuwaan.

Titus 3:10

Nu awad tagu'ḵ angituttudu si tinutuli ye angisina'tta namati, bagbagaam ta iginoḵna. Nu amigwae bagbagaam ya adinapun paat tuttuwaon, adim os paat buḻbuḻunon,