Romans 9:24 - Sa Ugud Apudyus

²⁴ Taḵon ay ditaḵu we pinilinae daḵampun aḵ abus da naḻpu'tta Judyu yaḵon da naḻpu bos atta Gentil.

Romans 9:24 ပူးပေါင်းရင်းမြစ်များ

Acts 15:14

Inugud Simon Peter ḵan ditaḵu inon Apudyus si damu we nangipaila si ḵadaguna'tta Gentil te pinilina da udum ḵan dida'ḵ ambalin aḵ taguna.

Romans 10:12

Te naippun laḵsigon Apudyus taḵon ay Judyu baḵon nu Gentil te aḵ Jesu Kristu abus aḵ Apu taḵu we amindisyun atta losane anḵodaw aḵ ḵadagu ḵan Apu.

1 Corinthians 1:9

Mataḻgodan aḵ Apudyus we namili ḵan diḵayu'ḵ maḵabuḻbuḻun atte Abengna we aḵ Jesu Kristu we Apu taḵu.

Galatians 3:28

Ḵad nu ḵatti, sa antotollong Apudyus, naippun mangadanan aḵ Judyu baḵon nu Gentil, musassu baḵon nu daḵampun, laḻaḵi baḵon nu bubai te os-ossaan ḵayu gapu si niyossaananyu ḵan Jesu Kristu.

Colossians 3:11

Gapu'tta sanae ḵingwan Apudyus, an-iisuwona da losan si antotollongna, Judyu man baḵon nu da Gentil, da naadaḻan ya da adipun naadaḻan, ḵaḵḵaili ya da maaḻmot, musassu ya daḵampun aḵ musassu te aḵ Kristu ḵapatogan atta losan ya awad os atta losane namati.

Hebrews 3:1

Pun susunudḵu ḵan Kristu we da tagun Apudyus we da pinilinae midoga ḵan siya'd langit, sosomḵon taḵu we aḵ Jesus imbuun Apudyus ḵan ditaḵu ya siya ḵangatuwane padi taḵu sigun si pinati taḵu.

1 Peter 5:10

Nu maabus sin-aḵitane ampaḵaḻamanyu, aḵ Apudyus we naḻpuwan ni losane ḵinabaḻu, pabaruwona biyagyu ya papigsaona pammatiyu ta adi mayugayug. Siya namili ḵan diḵayu we midoga si ḵabaḻuwane antatagu ḵan Apudyus ad langite ippun anungusna mipagapu si niyossaananyu ḵan Kristu.

Revelation 19:9

Pun ḵanan ni anghel ḵan saḵon, “Igilim anna: Pian da tagu we naayagan aḵ midoga maḵaḵan atte kasar ni Ubbu we Karnero.” Pun pinagatupana woḵ ḵanana, “Sana tuttuwae Ugud Apudyus.”