Romans 3:25 - Sa Ugud Apudyus

²⁵ Indatun Apudyus aḵ Jesu Kristu aḵ matoy ta pumoy-as daḻana'ḵ mapakawanan da basuḻ da amati. Ḵingwana ḵaḵna'ḵ angipail-ana si ummun-unana te sa awe si daan Jesus umaliyan, inan-anusana da tagu we adinapun daguse dinusa dida'tta basuḻda.

Romans 3:25 ပူးပေါင်းရင်းမြစ်များ

John 6:47

Ibagaḵ ḵan diḵayu ḵatuttuwaan, ngaimane amati ḵan saḵon, awad ḵan siya biyag aḵ inggana.

Acts 14:16

Sa naḻaḵpuse lunap, iyyunud Apudyus da losane tagu we angwa'tta ngaimane pionda ḵoon.

Acts 15:18

Sana imbagan Apu we impaigammuna si awe.’ ”

Acts 17:30

Sa awe, inan-anusan Apudyus da ḵingwan da tagu te daandapun igammuwon. Yaḵon sinsadi, imbilinnae losane tagu ibabawida da basuḻda ya agaydae angwa.

Acts 2:23

Aḵ Jesus, gagangaye simsimmoḵ Apudyus we ipuḻangna ḵan diḵayu te siya inḵoddongna si awe. Ḵad diḵayu, impaipattoḻyu'tte kros ya impagongatyu'tta tagu.

Acts 3:18

Yaḵon sa natoyan Jesus, sadi nituttuwaan ni impaigammun Apudyus mipagapu'tta losane profetanae ḵasapuḻane ampaḵaḻam ya matoy aḵ Kristu we ibuunna.

Acts 4:28

Ḵad ḵingwada da ngaimane simsimmoḵnu si awe mipagapu'tte ḵabooḻam ḵan piome maḵwa.

Romans 2:4

Adiyu potogon aḵ Apudyus atte ḵananyu we adimpun diḵayu dusaon gapu ta ḵumadagu, naattom ya amod de anusna. Adiyupun ḵamman igammu we ḵinadaguwana diḵayu ta ibabawiyu da basuḻyu ya agayyu we angwa?

Romans 3:26

Sinsadi impailanae naun-unan gapu'tte adinapun nambiyangan da basuḻ da tagu yaḵon imbuunna'ḵ Jesus aḵ matoy ta siya madusa para'tta basuḻ taḵu pun aḵ Apudyus ustu ya siya angwa si maun-unan da awad pammatida ḵan Jesu Kristu.

Romans 5:1

Pun gapu ta aḵ Apudyus nangwa ḵan ditaḵu'ḵ naun-unan gapu'tte pammati taḵu, allin-awa maḵabuḻbuḻunan taḵu ḵan Apudyus mipagapu'tte ḵingwan Jesu Kristu we Apu taḵu.

Romans 5:11

Daḵampun aḵ abus sadi yaḵon allaylayad taḵu bos si naḵabuḻbuḻunan taḵu ḵan Apudyus mipagapu ḵan Apu taḵu we Jesu Kristu. Gapu ḵan siya, nipaḻ-og maḵabuḻbuḻunan Apudyus ḵan ditaḵu.

Romans 5:18

Losane tagu madusa gapu'tte basuḻ ni osae tagu. Yaḵon gapu'tte naun-unane ḵingwan Kristu si natoyana para ḵan ditaḵu, sa ambanagana losane tagu aḵ Apudyus angwa si maun-unanda ya awad ḵan dida biyag aḵ inggana.

Romans 5:9

Pun gapu ta ginangput Apudyus ditaḵu ḵingwa'ḵ naun-unan mipagapu'tte daḻan Kristu we pummoy-as atte natoyana, aaddi ye igammu taḵu we mipagapu ḵan Kristu matagu taḵu'tte anguwisan Apudyus atta tagu.

1 Corinthians 5:7

Ḵasapuḻane ḵaanonyu ugaliyu we mipani'tte yeast ta sa ugaliyu ambalin aḵ ampoḻḵas ḵasasaadyu si antotollong Apudyus. Ḵasapuḻane ḵoonyu ḵatti ta mipani ḵayu si ḵaḵ-utu we tinapaye ippun ḵamosna'ḵ yeast we mitoḵom nu ansida da Judyu atte karnero si Gayagayae ngannonda Nallausan. Te aḵ Kristu mipani'tte sadi ye karnero te natoy ta puḵayana ditaḵu'tta basuḻ.

2 Corinthians 5:21

Aḵ Kristu, ippun paat basuḻna. Yaḵon gapu ḵan ditaḵu, imbelang Apudyus aḵ ḵabasbassuḻan ta mipagapu si niyossaanan taḵu ḵan siya, aḵ Apudyus angwa si maun-unan taḵu.

Ephesians 1:7

Te gapu si pummoy-asan ni daḻan Jesu Kristu si natoyana, nasubut taḵu we piona ḵanan napakawan da basuḻ taḵu. Sana nail-an ni ummamdane ḵinabaḻun Apudyus

Ephesians 2:13

Yaḵon sinsadi ḵad, gapu si niyossaananyu ḵan Jesu Kristu, diḵayu we adayu si awe, niyadani ḵayu ḵan Apudyus mipagapu si pummoy-asan ni daḻan Kristu si natoyana.

1 Timothy 1:15

Sana tuttuwae tuttudu ya labbongnae patiyon da losane tagu: Ummali'ḵ Jesu Kristu atte lubung ta taguwona da ḵabasbassuḻan. Saḵon ḵapaatan ḵan dida.

Hebrews 10:4

Te adimpun ni daḻan ni laḵi ye baḵa ḵan kalding lamog ḵaanon basuḻ.

Hebrews 11:14

Da tagu we angugud atte ḵaḵna, nalawage angngitda'ḵ mismu we ilida.

Hebrews 11:17

Gapu'tte pammatin Abraham, indatunna'ḵ Isaac we abengna si namappadasan Apudyus ḵan siya. Inawatna inkarin Apudyus woḵ naḵasaganae angidatun si ossaane abengna,

Hebrews 11:7

Mipagapu si pammatin Noah, nandongoḻ atta imbagan Apudyus mipanggob atta banage maḵwa si umali ye aḻgawe daannapun yan ilan. Tinuttuwana'ḵ Apudyus woḵ nangwa'ḵ daḵoḻe bapur ta matagudae simbaḻyan. Gapu si pammatina, impailanae nankamali da tagu'tte lubunge adidapun amati ḵan Apudyus ya dusaon Apudyus oḵyan dida. Pun imbelang Apudyus aḵ naun-unan mipagapu si pammatina.

Hebrews 9:28

Isuna bos ḵan Kristu, namingpingsane indatunna long-agna ta ḵaanona da basuḻ da adu we tagu. Ḵad nu umali ḵasin, daḵampun aḵ gapu'tta basuḻ yaḵon taguwona da anguuway ḵan siya.

Hebrews 9:5

Sa ngatuwon ni sanae ḵasun, awad da anghel we ngannonda Cherubim we angipaila si ḵinadayaw Apudyus. Inalidungan da payaḵda tangob ni ḵasune nawaḻagisan si daḻa si tinawon ta laḵḵobana da basuḻ da tagu. Yaḵon daḵampun aḵ sinsadi angipaḵaawataḵ atta sanae banag.

1 John 1:10

Yaḵon nu ḵanan taḵu we aditaḵupun naḵabasuḻ, ambalinon taḵu we tuliyan aḵ Apudyus ḵad sa Ugudna naippun ḵan ditaḵu.

1 John 2:2

Siya bos nangidatun atte long-agna ta maḵaan sangan Apudyus ya mapakawan da basuḻ taḵu ya daḵampun aḵ abus da basuḻ taḵu yaḵon da basuḻ os da losane tagu'tte annae lubung.

1 John 4:10

Ḵad sana gattoḵe ayat: Daḵampun atte ayat taḵu ḵan Apudyus yaḵon sa ayatnae impailana ḵan ditaḵu si nangibuunana si Abengna ta siya angidatun atte long-agna ta maḵaan sangan Apudyus ya mapakawan da basuḻ taḵu.

Revelation 1:5

Naḻpu bos ḵan Jesu Kristu we mataḻgodane amanoḵnoḵ atte mipanggob ḵan Apudyus. Siya ummunae natagu ḵasin atta natoy ya siya pangat da losane ari'd luta. Ay-ayatona ditaḵu ḵad pinuḵayana ditaḵu we isun di baḻud ni basuḻ mipagapu'tte daḻanae pummoy-as atte natoyana.

Revelation 13:8

Ḵad daydayawon da losane tagu si annae lubung sanae ḵaog-ogyate ayam yaḵon da tagu we nigili da ngadanda'tte iblu we nigiliyan da ngadan da awad da biyagda'ḵ inggana, adidapun daydayawon sanae ḵaog-ogyate ayam. Te sa daan ni lubung maḵwaan, nagagangpute nigili da ngadan da sanae tagu si iblun ni biyage sa ḵuwan ni Ubbu we Karnero we nagongat.

Revelation 20:15

Ḵad ngaimane adipun nigili ngadanna'tte iblu we nigiliyan da ngadan da awad da biyagda'ḵ inggana, niballuda si igaw ni gumilgillayabe apuy ḵan sulfur.

Revelation 5:9

Ḵanandae angiḵanḵanta'tta baru we ḵanta, “Siḵa ḵallabbong angaḻa si naḻuḵube ḵopel ya alloḵta'tte maḻḵa. Te napatoyḵa woḵ sa daḻam nanubutnu'tta tagu ta ambalindae tagun Apudyus. Ḵad maḻpuda'tta losane ili ya da losane tribu ya da tagu we nansabasabali gingada ḵan naḻpuwanda.