Romans 2:14 - Sa Ugud Apudyus

¹⁴ Te da Gentil ippun igammuda'tte lintoge inggilin Moses yaḵon nu ḵoonda da ambaḻu we paḵwan ni lintog, ambalin aḵ lintog ḵan didae mismu.

Romans 2:14 ပူးပေါင်းရင်းမြစ်များ

Acts 10:35

yaḵon awatona da ngaimane tagu, Judyu man baḵon nu Gentil we angisipog ḵan Apudyus ya ustu da ḵoonda.

Acts 14:16

Sa naḻaḵpuse lunap, iyyunud Apudyus da losane tagu we angwa'tta ngaimane pionda ḵoon.

Acts 17:30

Sa awe, inan-anusan Apudyus da ḵingwan da tagu te daandapun igammuwon. Yaḵon sinsadi, imbilinnae losane tagu ibabawida da basuḻda ya agaydae angwa.

Romans 1:32

Taḵon ay nu igammuda tuttudun Apudyus we labbongdae madusa'ḵ inggana da tagu we angwa'tta ḵatti, sissiyae ḵoonda. Daḵampun aḵ abus ḵoonda nu adi ayunanda bos da udume angwa'tta ḵaḵnat.

Romans 2:12

Te da losane naḵabasuḻ, misinada ḵan Apudyus ya madusada'ḵ inggana. Da Gentil ḵad adidapun inigammu Lintog Apudyus, pun adimpun Apudyus ibatay si lintog nu ḵuwisona dida mipagapu'tta basuḻda. Yaḵon da Judyu, igammuda sanae lintog, pun siya ambatayan Apudyus we anguwis ḵan dida.

Romans 2:15

Ḵad sa angwaanda'tta ustu, sadi angipailae nigili lintog atta pusuda. Ḵad taḵdoḻan ni somsomoḵdae tuttuwa sana te nu ḵoonda ambaḻu, igammun ni somsomoḵdae ambaḻu. Ḵad nu ḵoonda lawweng, igammun os ni somsomoḵdae lawweng.

Romans 2:27

Ḵad taḵon ay adidapun nasogyatan nu tuttuwaonda lintog, dida angoddong atte madusaan da Judyu te taḵon ay nasogyatanda ya awad de nigili ye lintog ḵan dida, nilisalisda.

1 Corinthians 11:14

Ḵad gagangay atte ugalin da tagu we ḵababbain nu andu buuḵ ni laḻaḵi.

1 Corinthians 9:21

Isun ni antuttuduwaḵ atta Gentil we adidapun unudon lintog da Judyu, ambalinaḵ aḵ dogada ta adu da maawisḵu ḵan dida. Yaḵon daḵampun aḵ ḵanaḵe adiḵ tuttuwaon Lintog Apudyus te sissiyae unudoḵ da lintog Kristu.

Ephesians 2:12

Sosomḵonyu we sa awe, nisisina ḵayu ḵan Kristu. Nanaḻsin ḵayu'tta ganaḵ Israel we pinilin Apudyus aḵ taguna. Adiḵayupun os nidoga si intuḻag Apudyus we inkarina'tta tagunae awad de umali ye anagu ḵan dida ya diḵayu we tagu we adipun amati ippun namnamayu ḵan ippun Apudyusyu.

Ephesians 2:3

Ḵatti losan antatagu taḵu si awe ye siya ḵooḵoon taḵu da pipion ni long-ag taḵu. Ngaimane amaamayon ni long-ag taḵu ḵan somsomoḵ taḵu, dida da unudon taḵu. Pun sa gagangaye antatagu taḵu labbongnae nidoga taḵu'tta tagu we dusaon Apudyus.

Philippians 4:8

Sa anungus ni ibagaḵ ḵan diḵayu we susunudḵu ḵan Kristu, siya oḵyan pasigyu sosomḵon da tuttuwa, ampatog, ustu, ampoḻḵas, ambaḻu ḵan ḵadayawan. Ḵad taḵon ay da udume ambaḻu baḵon nu nanggodonge ugud, sadi oḵyan da imumuḻayu'tta somsomoḵyu.