Romans 14:19 - Sa Ugud Apudyus

¹⁹ Pun ḵasapuḻane igga taḵu ḵabooḻan taḵu ta allin-awa maḵabuḻbuḻunan taḵu'tta udum ya ngaimane amapigsa'tta pammati taḵu.

Romans 14:19 ပူးပေါင်းရင်းမြစ်များ

Matthew 5:9

Pian da tagu we angwa si maḵalin-awaan da udume tagu'tta sin-ossaossa te ibelang Apudyus dida'ḵ abengna.

Mark 9:50

Ambaḻu asin yaḵon nu ippun ogon tamtamna, ngai inonae mipauli tamtamna ḵasin? Ḵad sosomḵonyu mipanggob atte usar ni asin ya an-asibadang ḵayu ta allin-awa ambubuḻunanyu.”

Romans 12:18

Igga taḵu ḵabooḻan taḵu ta allin-awa ambubuḻunan taḵu'tta losane tagu.

Romans 15:2

Siya oḵyan somsomḵon taḵu mas-oman da sunud taḵu ḵan pumigsaan os da pammatida.

1 Corinthians 10:23

Awad da ḵanandae angibaga, “Nawayaaḵe angwa'tta ngaimane pioḵ ḵoon.” Tuttuwae nawayaan taḵu yaḵon daḵampun aḵ ambanag da losane ḵoon taḵu'tte bumaḻuwan taḵu ya daḵampun os aḵ ampapigsa'tta pammatin da buḻun taḵu.

1 Corinthians 10:33

Unudonyu saḵone pasigḵu ibagabagay biyagḵu'tta losane tagu. Te sa singsingtoḵ, daḵampun aḵ bumaḻuwaḵ yaḵon sa bumaḻuwan da adu ta mataguda.

1 Corinthians 14:26

Susunudḵu ḵan Kristu, nu magimung ḵayu we andayaw ḵan Apudyus, awad oḵyan anḵanta ya awad os angituttudu'tte Ugud Apudyus ya awad os angibaga'tta ngaimane impaigammun Apudyus ḵan siya. Ḵad awad os an-ugud atte sabali ye ugude adinapun inadaḻ ya awad oḵyan angipaḵaawat atta inugudna. Yaḵon ilanyu ta da sanae ḵoonyu, ambanag atte pumigsaan da pammatiyu losan.

1 Corinthians 14:3

Yaḵon sa tagu we angibaga'tte pinion Apudyus we mipaigammu ta papigsaona pammatin da udum, soḻgagona ḵan liwliwaona dida.

1 Corinthians 14:4

Sa tagu we an-ugud atte sabali ye ugud, sa pammatinae mismu pumigsa. Yaḵon sa tagu we angibaga'tte pinion Apudyus we ipaigammu, siya papigsaona pammatin da namati ye magimugimung.

1 Corinthians 14:5

Pioḵ oḵyan nu losan ḵayu nalainge an-ugud atta nansabasabali ye ugud yaḵon amo pipioḵ nu awad ḵabooḻanyu losane angipaigammu'tta losane gimung si pinion Apudyus. Te amo bumadang tagu we angipaigammu'tta pinion Apudyus nu sa an-ugud atta nansabasabali ye ugud. Malaksid nu awad angipaḵaawat ta masoḻgagan da losane namati.

1 Corinthians 7:15

Yaḵon nu pion ni daḵampun aḵ namati idangan asawanae namati, maḵwa. Nu awad ḵaḵnat aḵ maḵwa, mapuḵayan asawae namati, laḻaḵi man baḵon nu bubai. Te pinilin Apudyus ditaḵu ta lumin-awa maḵabuḻbuḻunan taḵu'tta udum.

1 Corinthians 8:1

Annaya bos ibagaḵ ḵan diḵayu si mipanggob atte anganan atte maḵane midatun atta sinan-apudyus. Tuttuwa anna ya igammu taḵu losan. Yaḵon umman taḵu te allasu we sumoḵaḻ taḵu gapu'tte anna igammu taḵu. Yaḵon nu an-asiayat taḵu, sanat pumigsaan da pammati taḵu.

2 Corinthians 12:19

Sa somsomoḵyu nin, ibagani da sana ta taḵdoḻanni da long-agni ḵan diḵayu. Yaḵon sa ḵatuttuwaan, abus aḵ ugudonni si sinagung Apudyus gapu ta niyossaan ḵani ḵan Kristu'tta piona ḵad da losane ḵoonni, ḵoonni susunud ta papigsaonni pammatiyu.

2 Corinthians 13:11

Susunudḵu ḵan Kristu, annaya anungus ni ibagaḵ ḵan diḵayu. Allaylayad ḵayu oḵyan! Papigsaonyu pammatiyu ta ippun kurangna. Ḵad ipapatiyu unudon da intuttuduḵ ḵan diḵayu ya an-asiunud ḵayu ya adi ḵayu ansusubog. Allin-awa oḵyan ambubuḻunanyu'tta udume tagu. Ḵad aḵ Apudyus we maḻpuwan ni ayat ḵan lin-awa awad ḵan diḵayu.

Ephesians 4:12

Ḵingwana ḵatti ta ansagana taḵu we tagun Apudyus we anserbi ḵan Kristu ta pumigsa taḵu we isun di long-agna,

Ephesians 4:29

Adi ḵayu oḵyane namati an-ugud aḵ lawweng. Siya oḵyan abus aḵ ugudonyu da bumadang ḵan pumigsaan da somsomoḵ da andongoḻ sigun atte ḵasapuḻan ni sin-ossaossa'tte bumaḻuwana.

1 Timothy 1:4

Ḵad ibagam ḵan dida ta adida dodongngon da ug-uggud da iyawe ya sa anduandu we listaan da ganaḵda. Te sana gapun ni ansosongbatan da tagu. Daḵampun aḵ bumadang si mituttuwaan ni planun Apudyus we ipaigammuna mipagapu si pammati.

2 Timothy 2:22

Pun adayuwam da pipion ni long-ag da babaḻu ta ipapuutnu we angwa si ummun-un ya amapigsa si pammatim. Ipapuutnu bose angayat atta udume tagu ya sa allin-awae maḵabuḻbuḻunam atta anḵodaw aḵ ḵadagu ḵan Apu we ampoḻḵas da somsomoḵda.

Hebrews 12:14

Pangganyu allin-awae maḵabuḻbuḻunanyu'tta losane tagu ya mitotoḵḵon ḵayu'ḵ taguna ta bumaḻu ugaliyu te nu adi tagu ḵaḵnat adinapun ilan aḵ Apu.

1 Peter 3:11

Ḵasapuḻane an-awidana lawweng ya ḵoona ambaḻu, ya masapuḻ ose ipapatina sington allin-awae maḵabuḻbuḻunana'tta buḻunna.