Revelation 19:15 - Sa Ugud Apudyus

¹⁵ Sa nangadanan aḵ Ugud Apudyus, awad ḵan siya antadome ispadae maḻpu si sungadnae siya usaronae angngog atta ḵinailin di ili. Sa angipangatana ḵan dida, usarona bastune ḵaga ya dusaonae ustu da ngaimane adi amigbig si ḵaḻabbongana. Ipailana ampaḵimute sangan ni maḵabooḻe Apudyus atta basuḻ. Te sa anusaana ḵad ḵan dida, isuna angasotan ni tagu'tta de grape atte aassotan ta mapospos baḻatda.

Revelation 19:15 ပူးပေါင်းရင်းမြစ်များ

2 Thessalonians 2:8

Ḵad nu mipaila ḵaḻawengane sumusullagi'tta Lintog Apudyus, umali'ḵ Apu Jesus ya dadailona sadi ye ḵaḻawengan atte ampail-ana. Ḵad gongatona taḵon ay abuse pog-awana.

Revelation 1:16

Ḵad oonnan ni madawinane imana da pitu we bituwon, maḻpu si sungadna nansupang ngaḻabnae ispada. Sa bosaḻna ḵad, isunan init atte mamatuḵe amod de pigsana.

Revelation 12:5

Nibuḵnag ḵad abengnae laḻaḵi, naḻapsut woḵ naiyoy si tronon Apudyus te sa umali ye aḻgaw siya ambaline pangat atta losane ili ye usarona bastune ḵaga ya aaddi ye oḻgona da adipun anuttuwa si ḵaḻabbongana.

Revelation 14:10

uminumda bos si ampigsae bayas Apudyus we adipun naḵamsan. Sa piona ḵanan mapadasda ummamdane andudusan Apudyus we ippun ḵadaguna te ummamdan sangana. Ḵad ampaḵaḻamda'tte gumilgillayabe apuy ya sa sulfur atte antotollong da anghelna ya sa Ubbu we Karnero.

Revelation 19:21

Naamin nanḵaḵatoy da suḻdaduda si isun di antadotadome ispadae tumoḵwaḻ atte sungad ni nangabayu si itaḵe ḵabayu. Ḵad nandatdatong da sissiwit ya isudan anggayagayae angan atta long-ag da nanḵaḵatoy inggana'ḵ nassunassugda.

Revelation 2:12

Ḵanana bos, “Annaya isuḻatnu'tte anghel we angayyuwan atta namati ye magimugimung ad Pergamum, ‘Saḵon aangdon si antadome ispadae nansupang ngaḻabna. Annaya ibagaḵ ḵan diḵayu.

Revelation 2:16

Pun ambabawi ḵayu'tta basuḻyu ya agayyu we angwa te nu adi ḵayu ambabawi, madanatongaḵ ḵan diḵayu ya usaroḵ ispadae maḻpu'tte sungadḵu we maḵagubat ḵan diḵayu.

Revelation 2:27

ye isun ni ḵaḻabbongane innatod Amaḵ ḵan saḵon. Ḵad naippun osa'ḵ ḵallabbong angngog ḵan dida yaḵon amo dallu we oḻgonda da adipun amigbig si ḵaḻabbongandae isuna angabuḵan ni ḵagae bastun atte banga.