Revelation 12:11 - Sa Ugud Apudyus

¹¹ Yaḵon illog da susunud taḵu we namati gapu'tte daḻan ni Ubbu we Karnero we pummoy-as atte natoyana ya gapu si nangitaḵdoḻanda'tte ḵatuttuwaan te adidapun patpatgon da biyagda taḵon ay nu siya gapun ni natoyanda.

Revelation 12:11 ပူးပေါင်းရင်းမြစ်များ

Luke 14:26

“Ngaimane maḻyade mitun-ud ḵan saḵon, ḵasapuḻane daḵdaḵoḻ ayatna ḵan saḵon nu sa ayatna'tta amana ḵan inana, sa asawana ya da abengna, da sunudna ya taḵon ay mismu we long-agna te nu adina ḵoon ḵaḵna, adipun maḵwae ambalin aḵ disipuluḵ.

John 16:33

Imbagaḵ sana ḵan diḵayu ta mipagapu ḵan saḵon lumin-awa ḵayu oḵyan. Ampaḵaḻamon diḵayu'tta adipun amati. Yaḵon tumuḻod ḵayu te illogyu da losane lawweng si annae lubung.”

Acts 20:24

Adipun ampatog ḵan saḵon nu mataguwaḵ baḵon nu matoyaḵ. Sa biyagḵu ampatog atte angigangputaḵ si ḵewaaḻe innatod Apu Jesus ḵan saḵone sa angiwaḻagawagaḵ si Ambaḻu we Damag mipanggob si ḵinabaḻun Apudyus.

Acts 21:13

Pun summongbat aḵ Paul woḵ ḵanana, “Ngaipa ḵayu sin-iibil ya paḻawengonyu somsomoḵḵu? Te naḵasaganaaḵe mibaḻud ya taḵon ay nu matoyaḵ ad Jerusalem mipagapu ḵan Apu Jesus.”

Romans 16:20

Adipun manunnuwan ya aḵ Apudyus we maḻpuwan ni lin-awa oḻgona'ḵ Satan we isun di gusgusdan taḵu. Awad oḵyan ḵan diḵayu ḵinabaḻu we maḻpu ḵan Apu Jesu Kristu.

1 Corinthians 15:57

Yaḵon anggappiya taḵu ḵan Apudyus we angitod si angngogan taḵu mipagapu ḵan Jesu Kristu we Apu taḵu.

1 John 4:4

Aabengḵu, diḵayu da abeng Apudyus ya illogyu da sinan profeta te adidapun lamog inallelaw diḵayu. Te sa Ispiritu Santu we awad ḵan diḵayu, amo maḵabooḻ nu aḵ Satan we angipangat atta tagu we adipun namati.

1 John 5:5

Te sa paḵḵog atta tagu we adipun amati ye sumullagi ḵan Apudyus, siya amati ye aḵ Jesus Abeng Apudyus.

Revelation 1:2

Inggiliḵ da losane nipaila ḵan saḵon. Ḵad pinanoḵnoḵaḵe tuttuwa Ugud Apudyus ya da impaigammun Jesu Kristu.

Revelation 1:9

Saḵon aḵ John we sunudyu ḵan Kristu ya buḻunyu we nangiyattome nampaḵaḻam gapu'tte niyossaanan taḵu ḵan Jesu Kristu si ampangatana. Gapu'tte nangiwaḻagawagaḵ si Ugud Apudyus ya sa namanoḵnoḵaḵ si mipanggob ḵan Jesus, naḵoddonganaḵ aḵ madusa woḵ inniyoyda saḵon ad Patmos, sa ban-oge ili ye niliḵwos ni baybay.

Revelation 11:7

Maabus ḵade ibagada da impaigammun Apudyus ḵan dida, tumoḵwaḻ ḵaog-ogyate ayame maḻpu si abute ippun patinggan ni ḵaadaḻomna ya maḵagubat ḵan dida. Ḵad angngog ya anggongat ḵan dida,

Revelation 12:17

Pun amo dummallu sangan ni dragon si bubai woḵ ummoy naḵagubat atta udume abengnae da anguunnud atta bilin Apudyus ya sissiyadae amati'tta impaigammun Jesus.

Revelation 19:10

Sa nangugudan ni anghel atte sadi, nanalluḵuwaḵe andayaw ḵan siya. Yaḵon ḵanana, “Adipun ḵasapuḻane ḵoom ḵaḵnat! Aḵ Apudyus abuse andayawam! Saḵon ḵad, anserserbiyaḵ ose isum ḵan Apudyus ya da susunudnu ḵan Kristu we sissiyae amati'tta impaigammun Jesus. Te da impaibagan ni Ispiritu Santu atta profeta, naḻpuda si impaigammun Jesus.”

Revelation 2:13

Igammuḵe sa iliyu, siya ampangatan Satan yaḵon taḵon ay nu ḵatti, adiyupun nan-awidan pammatiyu ḵan saḵon. Igammuḵ os naḵwa ḵan Antipas we mataḻgodane nangitaḵdoḻ si mipanggob ḵan saḵon. Taḵon ay nu gingngatda sinat atte ili ye ampangatan Satan, sissiyae pinagapagatupanyu we amati ḵan saḵon.

Revelation 2:17

“ ‘Diḵayu we naingaan, andongoḻ ḵayu si ibagan ni Ispiritu Santu atta gimung da namati. Da tagu we angngog si lawweng, ittaḵ dida si nitataḻu we maḵane ngannonda manna. Ittaḵ os sin-ossa ḵan dida'tte itaḵe batu we sa nigiliyan ni baru we ngadane naippun osa'ḵ angigammu si sadi ye ngadan nu adi sa tagu we maittana.’ ”

Revelation 2:26

Da tagu we angngog atte lawweng ya pagapagatupandae angwa'tta pinioḵ aḵ inggana si anungus ni biyagda, ittoḵ ḵan dida ḵaḻabbongane midoga ḵan saḵone ampangat atta ḵinailin di ili

Revelation 2:7

“ ‘Diḵayu we naingaan, andongoḻ ḵayu si ibagan ni Ispiritu Santu atta gimung da namati. Da tagu we angngog atta losane kalasin di lawweng, ittoḵ ḵan dida ḵaḻabbongane angan atte bungan ni ḵayu we angitod si biyage awad si igaw Apudyus ad langit.’ ”

Revelation 20:4

Pun innilaḵ da tummuḵdu'tta trono we naittan aḵ ḵaḻabbongane anḵuwis. Innilaḵ os da ḵalidodwan da nagongat gapu'tte nangitaḵdoḻanda'tte mipanggob ḵan Jesus ya sa nangiwaḻagawaganda si Ugud Apudyus. Dida da adipun nandaydayaw atte ḵaog-ogyate ayam ya sa sinan-ayame ḵais-isuna. Adidapun os impamaḻḵa da ḵidayda baḵon nu da imada. Nataguda bos ḵasin woḵ nidogada ḵan Kristu we nampangat si sillibu we tawon.

Revelation 3:12

Sa tagu we oḻgona lawweng, ambalinoḵ aḵ aliḵin ni templo we boḻoy Apudyus ḵad adipun paat magitot aḵ inggana. Maḻḵaaḵ os si ngadan Apudyus we Apuḵ ya sa ngadan ni siyudadna, sa baru we Jerusalem we dumoḻae maḻpu ḵan siya'd langit. Maḻḵaaḵ os atte baru we ngadanḵu.

Revelation 3:21

Da tagu we angngog si lawweng, ittaḵ dida'ḵ ḵaḻabbongane maḵatuḵdu ḵan saḵone ampangate isun ni nangngogaḵ ḵan Satan woḵ naḵatuḵduwaḵ ḵan Amaḵ atte tronona.

Revelation 3:5

Da tagu we angngog atte lawweng, ansilupda si itaḵ ya adiḵpun paat ḵaanon ngadanda si iblu we nigiliyan da ngadan da awad de biyagda'ḵ inggana. Ibabaggaḵ si sinagung Amaḵ ya da anghelnae dida da taguḵ.

Revelation 6:9

Niloḵtan ḵad ni Ubbu we Karnero ḵumalimae maḻḵan ni naḻuḵube ḵopel, innilaḵ atte dugun ni altar da ḵalidodwan da napatoy gapu si nangiwaḻagawaganda si Ugud Apudyus ya sa nanaḵdoḻanda si tuttudun Jesus.