Philippians 1:20 - Sa Ugud Apudyus

²⁰ Igammuḵe taguwonaḵ gapu'tte namnamaḵ ya sa pioḵ pagay, adiyaḵpun mabain si sinagung Apudyus gapu si adiḵpun daydayawon yaḵon amo tumuḻodaḵ pagay sinsanae isuna awe ta mipagapu'tte long-agḵu midayaw aḵ Kristu, matattaguwaḵ man baḵon nu matoyaḵ.

Philippians 1:20 ပူးပေါင်းရင်းမြစ်များ

John 21:19

Imbagan Jesus sana ta ipaigammuna inon Peter we matoy ta midayaw aḵ Apudyus. Ḵanana ḵan Peter, “Tun-udonaḵ.”

Acts 20:24

Adipun ampatog ḵan saḵon nu mataguwaḵ baḵon nu matoyaḵ. Sa biyagḵu ampatog atte angigangputaḵ si ḵewaaḻe innatod Apu Jesus ḵan saḵone sa angiwaḻagawagaḵ si Ambaḻu we Damag mipanggob si ḵinabaḻun Apudyus.

Acts 21:13

Pun summongbat aḵ Paul woḵ ḵanana, “Ngaipa ḵayu sin-iibil ya paḻawengonyu somsomoḵḵu? Te naḵasaganaaḵe mibaḻud ya taḵon ay nu matoyaḵ ad Jerusalem mipagapu ḵan Apu Jesus.”

Acts 4:31

Nalluwaḻuda ḵad, nayyugayug boḻoye nadagupanda. Pun ummoy ḵabooḻan ni Ispiritu Santu ḵan dida woḵ tummuḻoddae nangiwaḻagawag si Ugud Apudyus.

Romans 12:1

Pun susunud ḵan Kristu, ḵodawoḵ ḵan diḵayu we gapu'tte ḵadagun Apudyus idatunyu da long-agyu ḵan siya'ḵ matattagu we datun ya mitotoḵḵon ḵan Apudyus ya mas-omana. Sana ustu we inonyu we andayaw ḵan siya.

Romans 5:5

Ḵad nu awad namnama taḵu, aditaḵupun oḵyan madismaya te impailan Apudyus amode ayatna para ḵan ditaḵu mipagapu'tte Ispiritu Santu we innatodna ḵan ditaḵu.

Romans 6:13

Ḵad adi taḵu usaron ngaimane ḵamangay da long-ag taḵu we angwa'ḵ lawwenge isun ni dagus taḵu ḵingwa si daan taḵu amatiyan woḵ nibelang taḵu'ḵ nanattoye patilayun angwa'ḵ basuḻ. Yaḵon idatun taḵu da long-ag taḵu ḵan Apudyus we angwa'tta maun-unane panggobna te sinsadi innatod Apudyus ḵan ditaḵu baru we biyage anserbi ḵan siya.

Romans 6:19

An-ugudaḵ atte allasu we maawatan da tagu we daampun aḵ maangsan. Sa awe, iyyunudyu da long-agyu'ḵ nammusassu'tta angwaanyu'tta ngaimane lawweng ḵan maḵabasuḻanyu'ḵ amod. Pun sinsana, iyunudyu da long-agyu'ḵ ammusassu we angwa'tta naun-unan ta mitotoḵḵon ḵayu'ḵ taguna ta bumaḻu ugaliyu.

Romans 8:19

Te da losane ḵingwan Apudyus, uuwayonda timpu we angipail-an Apudyus atte ḵinangatun da abengna.

Romans 9:33

Te ḵanan ni nigili'tte Ugud Apudyus, “Ilanyu, isaadḵu'd Zion annae batu we amapagdot si boḻoy. Sana batu we ampasanga ya misubuḵan ḵan maottagan da tagu. Yaḵon ngaimane amati ḵan siya adipun paat madismaya.”

1 Corinthians 15:31

Susunud ḵan Kristu, tuttuwae sasaggungoḵ ḵatoy si inaḻgaw. Ibagaḵ sana te isḵaḻḵu niyossaananyu ḵan Jesu Kristu we Apu taḵu.

1 Corinthians 6:20

te nasubut taḵu'ḵ amod. Pun ḵasapuḻane usaron taḵu long-ag taḵu'ḵ madayawan Apudyus.

1 Corinthians 7:34

ḵad nagogwa somsomoḵna. Isuna bos atte babaḻasang baḵon nu sa bubai ye ippun asawana. Naippun udum aḵ somsomḵona nu adi sa mas-oman Apu te piona idatun long-agna ya sa somsomoḵna ḵan siya. Yaḵon sa bubai ye naasaw-an, adu somsomḵona'tte mabiyagana'tte annae lubung ya sa mas-oman ni asawana.

2 Corinthians 10:8

Te taḵon ay nu isun di natuḻ-ayan aḵ aḵit inoḵe nangiyisḵaḻ si mipanggob atte ḵaḻabbonganni ye innatod Apudyus ḵan diḵani ta papigsaonni pammatiyu ya daḵampun aḵ maḵadadail ḵan diḵayu, adiyaḵpun mabain.

2 Corinthians 3:12

Gapu ta anna ḵan diḵani ḵaḵnate namnamaonni ye iinggaw aḵ inggana Baru we Tuḻag, amod de tuḻodni ye angiwaḻagawag si Ambaḻu we Damag.

2 Corinthians 4:10

Pasigni tataggaḻon ḵatoye isun ni naḵwa ḵan Jesus ta mipaila nantatagun Jesus atte nantataguni.

2 Corinthians 5:15

Natoy aḵ para'tta losane tagu ta da matattagu adidapun ogon ḵoon pipion ni long-agda yaḵon sa pinion Kristu we natoy woḵ natagu ḵasin para ḵan dida.

2 Corinthians 7:14

Te impasindayawḵu diḵayu ḵan siya ḵad adiyaḵpun nadismaya'tta imbagaḵ. Te tuttuwa pagay da sadi ye imbagani ya napanoḵnoḵane tuttuwa da sadi ye iyyisḵaḻḵu ḵan Titus.

2 Corinthians 7:4

Antaḻgodaḵ ḵan diḵayu ya ipasindayawḵu diḵayu ya pumigsa pammatiḵ mipagapu ḵan diḵayu. Taḵon ay nu ampaḵaḻamaḵ, allaylayadaḵ gapu ḵan diḵayu.

Philippians 1:14

Gapu bos atte nibaḻudaḵ, pummigsa taḻgodda ḵan Apu da ḵaaduwane susunud taḵu ḵan Kristu. Pun adidapun umogyat yaḵon amo tummuḻoddae angiwaḻagawag si Ugud Apudyus.

Philippians 2:17

Ḵad gapu ta madam-an angongatanda ḵan saḵon, allaylayadaḵ taḵon ay nu ḵasapuḻane mibuḵbuḵ daḻaḵe midoga si datune midatun gapu si pammatiyu ḵan Apudyus. Pun maḵagangganasaḵ ḵan diḵayu losan.

Colossians 1:24

Sinsadi allaylayadaḵ atta ampaḵaḻamaḵ te igammuḵe bumaḻuwanyu te da sanae ampaḵaḻamaḵ dogan ni ampaḵaḻamane nilaḵ-am Kristu para'tta losane namati ye isun di long-agna.

1 Thessalonians 5:23

Papoḻḵapoḻḵason oḵyan Apudyus we puun ni lin-awa da biyagyu. Ḵad ayyuwanana oḵyan da somsomoḵyu, da ḵalidodwayu ya da long-agyu ta naippun mipabasuḻ ḵan diḵayu'tte umaliyan Apu Jesu Kristu.

1 Peter 4:16

Yaḵon nu ampaḵaḻam ḵayu gapu ta Kristianu ḵayu, adi ḵayu mabain yaḵon dayawonyu'ḵ Apudyus te nibelang ḵayu we tagun Kristu.

1 John 2:28

Pun sinsadi, diḵayu we aabengḵu, iinggaw ḵayu ḵan siya ta ippun umogyatan taḵu ḵan mabainan taḵu nu ḵasin umali.