John 7:39 - Sa Ugud Apudyus

³⁹ Siya inugud Jesus mipanggob si Ispiritu Santu we awaton da amati ḵan siya. Yaḵon daampun maatod ḵan dida te daampun mipauli'ḵ Jesus ta midayaw ad langit.

John 7:39 ပူးပေါင်းရင်းမြစ်များ

Matthew 16:14

Ḵananda, “Ḵanan da udum, siḵa'ḵ John we Ambobonyag. Da udum, ḵanandae siḵa'ḵ Profeta Elijah. Da udum os, ḵanandae siḵa'ḵ Profeta Jeremiah baḵon nu osa'tta profeta si awe.”

Matthew 21:11

Ḵanan da tagu we nibuḻun ḵan Jesus, “Siya'ḵ Jesus we profeta we iNazareth si probinsiya'd Galilee.”

Luke 24:49

Ḵad saḵone mismu angibuun si inkarin Amaḵ ḵan diḵayu. Yaḵon ḵasapuḻane uwayonyu sina'd Jerusalem inggana'ḵ awatonyu ḵabooḻane maḻpu'd langit.”

Luke 3:16

Ḵanan John ḵan dida, “Bonyagaḵ diḵayu si danum. Yaḵon sa umali ye nangatngatu nu saḵon, bonyagana diḵayu si Ispiritu Santu ḵan apuy. Gapu si ḵinangatuna, naippun labbongḵu we anguḵas si sandalna.

Luke 7:16

Pun naḵimtan da losane tagu woḵ indaydayawda bos aḵ Apudyus. Ḵananda, “Atopay! Sa annae profeta we ummali ḵan ditaḵu, amod pagay ḵabooḻana!” Ḵanan os da udum, “Ummali'ḵ Apudyus ta badangana ditaḵu we taguna!”

John 1:21

Pun ḵanandae nangimus, “Ḵad ngaiḵa nu? Siḵa'ḵ Profeta Elijah?” Ḵanana, “Naid! Daḵanaḵpun.” Pun ḵananda bos, “Siḵa ḵad ain profeta we an-uuggudon Apudyus we uuwayonni?” Ḵanan os John, “Naid! Daḵanaḵpun.”

John 1:25

Ḵanandae nangimus ḵan siya, “Ḵad nu daḵanḵapun aḵ Kristu baḵon nu aḵ Profeta Elijah baḵon nu sa profeta we uuwayonni, ngaipaḵa dam-on ambonyag nu?”

John 12:16

Adimpun da disipulun Jesus naawatan da sadi ye naḵwa. Yaḵon nipauli ḵad aḵ Jesus ta midayaw ad langit, inḵagasmoḵdae da naḵwa ḵan siya dida da nituttuwaan ni nigili'tte Ugud Apudyus.

John 12:23

Ḵanan Jesus, “Saḵone Abeng Di Tagu, dummatong timpu we midayawaḵ.

John 14:13

Ḵad ngaimane ḵodawonyu mipagapu'tte ḵaḻabbongaḵ, ḵooḵ ta midayaw Ama mipagapu'tte Abeng.

John 14:26

Yaḵon sa bumadange ibuun Amaḵ, siya Ispiritu Santu we angiyugud ḵan saḵon. Ituttuduna ḵan diḵayu da losan ya paiḵagasmoḵna ḵan diḵayu da losane imbagaḵ.

John 16:14

Ḵad padayawana saḵon te da losane maḻpu si somsomoḵḵu, dida ipaigammuna ḵan diḵayu.

John 16:7

Yaḵon ibagaḵ ḵan diḵayu ḵatuttuwaan, bumaḻuwanyu nu iyyaḵon te nu adiyaḵ umoyon, adipun umali Bumadang ḵan diḵayu. Yaḵon nu iyyaḵon, ibuunḵu ḵan diḵayu.

John 17:1

Inabus ḵad Jesus imbaga da anna, nantangad ad langit woḵ ḵanana, “Ama, dummatong timpu we padayawam Abengnu ta padayawana bos siḵa.

John 17:5

Sinsadi Ama, mipauliyaḵ ḵan siḵa ya ipailam ḵinaapudyusḵu we isun ni nangipail-am si awe atte inninggawaḵ ḵan siḵa si daan ni lubung maḵwaan.

John 20:22

Imbagana ḵad sana, sinap-uyana dida woḵ ḵanana, “Awatonyu Ispiritu Santu.

John 6:14

Innilan ḵad da amode tagu da nakaskasdaawe sinyale ḵingwan Jesus ḵananda, “Sana pagay tuttuwae profeta we inkarin Apudyus we umali si annae lubung.”

John 7:12

Da nandatdatonge tagu'tte gayagaya, siya uguugudonda mipanggob ḵan Jesus. Ḵanan da udum, “Ambaḻu ugalin Jesus.” Yaḵon ḵanan os da udum, “Lawwelawweng te uḻ-uḻnugana da tagu.”

John 8:54

Ḵanan Jesus, “Nu saḵone mismu angidayaw si long-agḵu, naippun anun ni dayawḵu. Yaḵon siya angidayaw ḵan saḵon aḵ Amaḵ we ngannonyu Apudyusyu.

Acts 19:2

woḵ ḵanana ḵan dida, “Inawatyu ḵad ain Ispiritu Santu si namatiyanyu?” Ḵananda, “Naid, ippun paat nangngoḻanni ye awad de Ispiritu Santu.”

Acts 2:17

“ ‘Ḵanan Apudyus, “Sa anungus ni aḻgaw, ibuunḵu Ispirituḵ ta iinggaw atta tagu. Da aabengyu, ipadtuda da ibagaḵ ḵan dida. Da babaḻuyu, awad da mipaila ḵan didae isun di in-inop. Ḵad da anḵamaḻong-ag, an-in-inopda bos.

Acts 2:33

Nipangatu'ḵ Jesus atte madawinan Apudyus woḵ innatod Amana ḵan siya ḵaḻabbongane angitod ḵan diḵani si Ispiritu Santu we inkarina ya imbuunna ḵan diḵani ta ilanyu ḵan dongngonyu da ḵingwan ni Ispiritu Santu.

Acts 2:38

Ḵanan Peter ḵan dida, “Ibabawiyu da basuḻyu ya agayyu we angwa ya awad osa ḵan diḵayu ampabonyag atte ngadan Jesu Kristu ta mapakawan da basuḻyu ya awatonyu atod ni Ispiritu Santu.

Acts 2:4

Pune sadi, ummoy ḵabooḻan ni Ispiritu Santu ḵan dida woḵ insaḻaddae an-ugud atta nansabasabali ye ugude adidapun inadaḻe impaibagan ni Ispiritu ḵan dida.

Acts 3:13

Daḵampun ḵan diḵani yaḵon sa Apudyus da Abraham, Isaac, Jacob ya da losane danaḵḵoḻ taḵu. Siya namataddaḻan si laḻaḵi ta maila ḵinaapudyus Jesus we nanserbi ḵan siya si annae lubung. Aḵ Jesus, siya impuḻangyu'tta papangat ya indiyanyu si sinagung Gobernor Pilate atte simsimmoḵnae piona puḵayan.

Acts 4:31

Nalluwaḻuda ḵad, nayyugayug boḻoye nadagupanda. Pun ummoy ḵabooḻan ni Ispiritu Santu ḵan dida woḵ tummuḻoddae nangiwaḻagawag si Ugud Apudyus.

Romans 8:9

Yaḵon ḵan diḵayu, daḵampun ogon si gagangaye pipion ni long-ag angituray ḵan diḵayu yaḵon sa Ispiritu Santu angituray ḵan diḵayu nu tuttuwae siya iinggaw ḵan diḵayu. Ngaimane tagu we naippun Ispiritu Santu we inkarin Jesus, daḵampun aḵ tagun Kristu.

2 Corinthians 3:8

maguḻaman adi amo nasiling mipailae dayaw ḵan ḵabooḻana si anḵewaaḻan ni Ispiritu Santu we angitod si biyag aḵ inggana.

Ephesians 4:30

Ḵad adi ḵayu oḵyan angwa'ḵ lawweng aḵ adin ni Ispiritu Santu andadauyan te sanat innatod Apudyus we isun di maḻḵae taguna diḵayu. Ḵad sadi angipaigammu we subutona diḵayu si umali ye aḻgaw.