Hebrews 6:19 - Sa Ugud Apudyus

¹⁹ Ḵad sa annae namnama taḵu, siya amapagdot si pammati taḵu te aaddi ye mituttuwa. Gapu'tte namnama taḵu, isu taḵun naganggangput nillumnoḵ si gattoḵe igaw Apudyus we isun ni nillumnoḵan ni ḵangatuwane padi si Ḵasantuwane kuwartun ni templo we boḻoy Apudyus we natalingdan si kortina.

Hebrews 6:19 ပူးပေါင်းရင်းမြစ်များ

Matthew 27:51

Pun baag-en nanḵagwa napissay kortinan ni templo, nisaḻad ad ngatu inggana'd doḻa. Ḵad nallunig lubung woḵ nandoswaḵ da balintuugan.

Acts 23:6

Inigammun ḵad Paul we nanḵagwa da papangate Sadducee da udum ya da udum Phariseeda, indangsoḻna gingana'tta ḵuḵunsisaḻ woḵ ḵanana, “Susunudḵu we ganaḵ Israel, Phariseeyaḵ. Pharisee bos da danaḵḵoḻḵu. Pun namnamaoḵe umuli da natoy ḵad sana gapunae sumaḻyaonyu saḵon.”

Acts 27:29

Maḵimutda nu maag ay mitupaḵ bapur atte batbatu. Pun inuyudda opate angkla si ubotan ni bapur ta guminoḵ ya illuwaḻuda ta pumadda.

Acts 27:40

Ḵingwada ḵad, ginsatda da tali ye nitaḵodan da angkla ta matenanda si baybay woḵ inuḵasanda tali ye nitaḵodan ni tablae angipaoy si bapur. Ḵad impangatuda layab atte sangun ni bapur ta ipaoy ni bibbid si taḻantag.

Romans 4:16

Pun sana gapunae mibatay atte pammati ta sa inkarin Apudyus mibatay si ḵinabaḻuna ya aaddi ye mituttuwa'tta losane mibelang aḵ ganaḵna, daḵampun aḵ abus da Judyu aḵ angigammu'tte lintog yaḵon da losane amati ye isun ni pammatin Abraham. Te siya ama taḵu losan.

Romans 4:18

Pinatin Abraham imbagan Apudyus ḵan siya taḵon ay nu ippun namnamana'ḵ mituttuwa, siya nambalin aḵ aman da adu we ili ye sa ḵaadun da ganaḵna isuna ḵaadun da bituwon ad langit. Sadi nigili'tte Ugud Apudyus we maḵwa.

Romans 5:4

Ḵad sa ḵinaattom siya ibungana ambaḻu we ugali. Ḵad sa ambaḻu we ugali siya ibungana namnama taḵu.

1 Corinthians 13:13

Pun sana da tuḻu we iinggaw aḵ inggana: sa pammati, namnama ya sa ayat. Yaḵon sa ḵapatogan atta anna ayat.

1 Corinthians 15:58

Pun susunudḵu ḵan Kristu we ay-ayatoḵ, popotpotanyu da pammatiyu ya adi oḵyan magitot. Ḵad ipapatiyu bose angwa'tta ngaimane pinion Apudyus paḵwa ḵan diḵayu te igammu taḵu we losane ḵoon taḵu we para ḵan siya adipun matangga.

Ephesians 2:6

Ḵad gapu ta niyossaan taḵu ḵan Jesu Kristu we natagu ḵasin, impangatuna bos ditaḵu ta midoga taḵu maḵapangat ḵan Kristu'd langit.

Colossians 3:1

Gapu ta nidoga ḵayu si ummuliyan Kristu, singtonyu da banage awad ad langit si igaw Kristu we tutuḵdu si madawinan Apudyus we maḵapangat ḵan siya.

2 Timothy 2:19

Yaḵon taḵon ay nu awad da isudae angituttudu si tinutuli, adipun paat mabaliwan tuttuwae Ugud Apudyus te isun di ampagdot nisaadanae tinaḵad Apudyus we adipun paat magitot. Awad de nigili ye ḵanana, “Igammun Apudyus da tagu we ḵuwana.” Sa osa bose nigili si awe, ḵanana, “Nu ngai ḵananae namati ḵan Apu, ḵasapuḻane an-awidana da lawweng.”

Hebrews 4:16

Ḵad antaḻgod taḵu we umadani alluwaḻu ḵan Apudyus we ampangat ad langit gapu'tte ḵinabaḻuna ta awaton taḵu ḵadagu ḵan ḵinabaḻu ḵan siyae bumadang ḵan ditaḵu si timpu we anḵasapuḻ taḵu.

Hebrews 9:3

Sa ḵumagwae kuwartu we naboḻdaḵ si kortina, sadi ngannonda Ḵasantuwane Kuwartu we para ḵan Apudyus.

Hebrews 9:7

Yaḵon abus ḵangatuwane padi'ḵ maḵaḻnoḵ si uḵuḵ ni ḵumagwae kuwartu ḵad amingsane abus si sintawon lumnoḵ. Adipun os maḵwae lumnoḵ nu ippun daḻa'ḵ idatunna ḵan Apudyus gapu'tte basuḻna ya da basuḻ da tagu we adipun nigagaḻa.

1 Peter 1:3

Madaydayaw aḵ Apudyus we sa Apudyus ya Aman Jesu Kristu we Apu taḵu. Gapu si amode ḵadaguna, niyanaḵ taḵu ḵasin te innatodna ḵan ditaḵu baru we biyag mipagapu si ummuliyan Jesu Kristu. Pun awad de namnamaon taḵu we aaddi ye mituttuwa,