Hebrews 4:12 - Sa Ugud Apudyus

¹² Te sa Ugud Apudyus matattagu te maḵabooḻe awad da ambanaganda. Natadtadom nu sa ispadae nansupang ngaḻabnae lamogna sillauton da um-um ya da utoḵ te sa Ugud Apudyus lonḵona daḻome ḵamangay da tagu taḵon ay da ḵalidodwada ya da ispirituda ḵad lamogna bos usigon somsomoḵ da tagu ya imatunana da migagaḻae somsomoḵ.

Hebrews 4:12 ပူးပေါင်းရင်းမြစ်များ

Luke 8:11

“Annaya pion ni pani ḵanan. Sa buḵoḻ, siya Ugud Apudyus.

John 12:48

Sa angidiyan ḵan saḵon ya adipun anuttuwa'tte ugudḵu awad de anguwis. Sa inugudḵu siya anguwis ḵan siya si anungus ni aḻgaw.

John 6:51

Saḵon maḵane angitod si biyag aḵ ingganae naḻpu'd langit. Ḵad ngaimane angan atte annae maḵan, matagu'ḵ inggana. Sa sanae maḵan, sa long-agḵu we ittoḵ ta matagu da tagu si lubung.”

Acts 2:37

Dingngoḻ ḵad da adu we tagu imbagan Peter, amod de babawida woḵ ḵananda ḵan Peter ya da udume apostol, “Susunude ganaḵ Israel, ngai ḵoonni?”

Acts 4:31

Nalluwaḻuda ḵad, nayyugayug boḻoye nadagupanda. Pun ummoy ḵabooḻan ni Ispiritu Santu ḵan dida woḵ tummuḻoddae nangiwaḻagawag si Ugud Apudyus.

Acts 5:33

Dingngoḻ ḵad da ḵuḵunsisaḻ sadi, amod de sangada woḵ pionda gongaton da apostol.

Acts 7:38

Inninggaw si gimung da danaḵḵoḻ taḵu si bumbummaawe sa naḵaugudan ni anghel ḵan siya'tte beleg Sinai woḵ inawatna matattagu we Ugud Apudyus ta ittona ḵan ditaḵu.

Romans 1:16

Adiḵpun ibaine angiwaḻagawag atte Ambaḻu we Damag te siya Ugud Apudyus we maḵabooḻ anagu'tta losane amati, umuna'tta Judyu ya asiyot da Gentil.

1 Corinthians 1:24

Yaḵon ḵan ditaḵu we pinilin Apudyus, Judyu man baḵon nu Gentil, igammu taḵu we aḵ Kristu siya ḵabooḻan Apudyus ḵan ḵinalaingna.

2 Corinthians 2:17

Yaḵon ḵan diḵani, daḵampun aḵ isuni da adu we nantuttududa'tte Ugud Apudyus ta angaḻ-anda'ḵ mabalinda. Te imbuun Apudyus diḵani ya abus aḵ ugudonni ḵatuttuwaan atte sinagungna si niyossaananni ḵan Kristu.

2 Corinthians 4:2

Nan-awidanni da losane ḵoḵoḵḵon da tagu we nililimod ḵan ḵababbain ya ippun inallelawni. Adinipun imbos Ugud Apudyus. Yaḵon atte sinagung Apudyus impaḵaawatni'tta losane tagu da losane ḵatuttuwaan te pionni ye igammuwonda'tta somsomoḵdae ambaḻu ḵewaaḻni.

Ephesians 5:13

Te nu masilawan da awad atte anggiḵbot, aaddi ye maila nu ngai isuda.

Ephesians 5:26

ta itotoḵḵon ditaḵu we namati'ḵ taguna gapu ta pinapoḻḵasna ditaḵu'tte danum ya sa Ugud Apudyus.

Ephesians 6:17

Pasigyu sosomḵone tinagun Apudyus diḵayu. Sanat isun di helmet da suḻdadu we anaḻaḵnib si uḻuda. Ibagayu Ugud Apudyus we paiḵagasmoḵ ni Ispiritu Santu. Sanat isun di ispadan da suḻdadu we usarondae angiduḵḵus atta ḵabusuḻda.

1 Thessalonians 2:13

Susunudḵu ḵan Kristu, pasig ḵani anggappiya ḵan Apudyus te dingngoḻyu ḵad ugudnae imbagani, namati ḵayu we daḵampun aḵ naḻpu'tta tagu yaḵon tuttuwae naḻpu ḵan Apudyus. Ḵad sa Ugud Apudyus, siya anḵewaaḻ atta biyagyu we namati.

1 Thessalonians 5:23

Papoḻḵapoḻḵason oḵyan Apudyus we puun ni lin-awa da biyagyu. Ḵad ayyuwanana oḵyan da somsomoḵyu, da ḵalidodwayu ya da long-agyu ta naippun mipabasuḻ ḵan diḵayu'tte umaliyan Apu Jesu Kristu.

Hebrews 13:7

Iḵagasmoḵyu da ummun-unae nangipangate nangituttudu ḵan diḵayu si Ugud Apudyus. Sosomḵonyu nambanagan ni nantataguda ya inunudyu pammatida.

James 1:18

Mismu we piniona nambalinon ditaḵu'ḵ abengna gapu si ugude ḵatuttuwaan ta ditaḵu ḵapatogan atta losane ḵingwana.

1 Peter 1:23

Te niyanaḵ ḵayu ḵasin ḵad sa baru we biyagyu daḵampun aḵ naḻpu si tagu we matoy yaḵon naḻpu ḵan Apudyus we adipun matoy. Nambalinona diḵayu'ḵ abengna mipagapu si matattagu ḵan annanayune Ugud Apudyus.

Revelation 1:16

Ḵad oonnan ni madawinane imana da pitu we bituwon, maḻpu si sungadna nansupang ngaḻabnae ispada. Sa bosaḻna ḵad, isunan init atte mamatuḵe amod de pigsana.

Revelation 19:15

Sa nangadanan aḵ Ugud Apudyus, awad ḵan siya antadome ispadae maḻpu si sungadnae siya usaronae angngog atta ḵinailin di ili. Sa angipangatana ḵan dida, usarona bastune ḵaga ya dusaonae ustu da ngaimane adi amigbig si ḵaḻabbongana. Ipailana ampaḵimute sangan ni maḵabooḻe Apudyus atta basuḻ. Te sa anusaana ḵad ḵan dida, isuna angasotan ni tagu'tta de grape atte aassotan ta mapospos baḻatda.

Revelation 19:21

Naamin nanḵaḵatoy da suḻdaduda si isun di antadotadome ispadae tumoḵwaḻ atte sungad ni nangabayu si itaḵe ḵabayu. Ḵad nandatdatong da sissiwit ya isudan anggayagayae angan atta long-ag da nanḵaḵatoy inggana'ḵ nassunassugda.

Revelation 2:16

Pun ambabawi ḵayu'tta basuḻyu ya agayyu we angwa te nu adi ḵayu ambabawi, madanatongaḵ ḵan diḵayu ya usaroḵ ispadae maḻpu'tte sungadḵu we maḵagubat ḵan diḵayu.

Revelation 2:23

Gongatoḵ os da angunud ḵan siya. Ḵad siya angigammuwan da losane gimung da namati ḵan saḵone tuttuwae angigammu'tte awad atta somsomoḵ ḵan pusun da tagu. Ḵad gungunaaḵ sin-ossaossa ḵan diḵayu sigun atta ḵingwayu.

Revelation 20:4

Pun innilaḵ da tummuḵdu'tta trono we naittan aḵ ḵaḻabbongane anḵuwis. Innilaḵ os da ḵalidodwan da nagongat gapu'tte nangitaḵdoḻanda'tte mipanggob ḵan Jesus ya sa nangiwaḻagawaganda si Ugud Apudyus. Dida da adipun nandaydayaw atte ḵaog-ogyate ayam ya sa sinan-ayame ḵais-isuna. Adidapun os impamaḻḵa da ḵidayda baḵon nu da imada. Nataguda bos ḵasin woḵ nidogada ḵan Kristu we nampangat si sillibu we tawon.