Hebrews 12:23 - Sa Ugud Apudyus

²³ Umadani ḵani'tta losane namati ḵan Apudyus we mibelang aḵ panguḻu we abengnae andatdatong. Da nigili da ngadanda'd langit. Ḵad umadani ḵani ḵan Apudyus we anguwis atta losane tagu ya umadani ḵani'tta ḵalidodwan da naun-unane natoye da nambalinona'ḵ ippun angkuranganda.

Hebrews 12:23 ပူးပေါင်းရင်းမြစ်များ

Luke 10:20

Taḵon ay os nu lamogyu paḻyawon da aḻan, daḵampun aḵ siya gapunae allaylayad ḵayu. Sa gapunae allaylayad ḵayu oḵyan, nigili da ngadanyu'd langit.”

John 5:27

Innatodna bos ḵaḻabbongaḵe anḵuwis te saḵon Abeng Di Tagu.

Acts 20:28

“Pun ummanyu ayyuwanan da long-agyu ya da losane tagu we ipaayyuwan ni Ispiritu Santu ḵan diḵayu te sanat biyangyu we angipangpangu. Ayyuwananyu we ustu da magimugimunge namati ḵan Apudyus te sinubutna dida si daḻan ni mismu we abengna.

1 Corinthians 13:12

Isuna ḵan ditaḵu we namati te sa antotollong taḵu ḵan Apudyus sinsana an-ugabbae isun di alladawan si an-ugabbae ladawan. Yaḵon sa umali ye timpu ilan taḵu we mismu. Sinsana aḵit igammu taḵu ḵan siya yaḵon sa umali ye timpu igammuwon taḵu losan mipanggob ḵan siyae isun ni nangigammuwana mipanggob ḵan ditaḵu.

1 Corinthians 15:49

Sinsadi, miyisu ḵatollongan ni long-ag taḵu'tte ḵatollongan ni long-ag ni tagu we naḻpu'tte luta, ḵatti bose sa umali ye aḻgaw, miyisu ḵatollongan ni long-ag taḵu'tte long-ag Jesu Kristu we naḻpu'd langit.

1 Corinthians 15:54

Nu ḵatti ye maḵwae mapasantan long-ag taḵu we maḻpos atte long-age adipun maḻpos, sa long-ag taḵu we matoy mapasantan atte annanayune adipun matoy. Ḵad sadi mituttuwaan ni nigili ye Ugud Apudyus we ḵanana, “Naippun ogon ḵabooḻan ni ḵatoy te naabaḵ.”

2 Corinthians 5:8

Pun antuḻod somsomoḵni ya mangnuwonni tenanni da long-agni'd luta ta inḵani maḵaigaw ḵan Apu.

Ephesians 1:22

Impangatun Apudyus aḵ Kristu ta siya angipangat atta losane banag ya siya bos dinutuḵan Apudyus we pangat da losane namati.

Philippians 4:3

Siḵa ḵad ose mataḻgodane buḻunḵu, badangam ḵappos da sanae bubai ta an-asipakawanda ya mipaḻ-og an-ossaananyu. Te pummangogdae naḵaḵewaaḻ ḵan saḵon atte nangiwaḻagawagaḵ si Ambaḻu we Damag, nidoga da Clement ya da udume naḵaḵewaaḻ ḵan saḵone awad da ngadanda si iblu we nigiliyan da ngadan da awad biyagda'ḵ inggana.

Colossians 1:12

Pasig ḵayu anggappiya ḵan Apudyus we Ama taḵu we nangitod ḵan ditaḵu si ḵaḻabbongane maḵatawid atta insaganana'tta losane taguna si ampaddae ampangatana.

Colossians 1:24

Sinsadi allaylayadaḵ atta ampaḵaḻamaḵ te igammuḵe bumaḻuwanyu te da sanae ampaḵaḻamaḵ dogan ni ampaḵaḻamane nilaḵ-am Kristu para'tta losane namati ye isun di long-agna.

1 Timothy 3:5

Te nu adinapun igammu we angidaḻan atte baḻyanna, ngai inonae angayyuwan atta namati ye magimugimung ḵan Apudyus?

Hebrews 11:4

Mipagapu si pammatin Abel, naḵaay-ayu indatunnae datun ḵan Apudyus nu sa datun Cain. Gapu si pammatina, imbelang Apudyus aḵ naun-unan te inawatna indatun Abel. Ḵad taḵon ay nu natoy sissiyae an-ugud gapu si pammatina.

Hebrews 11:40

Te awad de nabaḻu we planun Apudyus para ḵan ditaḵu losan. Sa planuna, buḻun taḵu didae angawat si inkarina ta ambalinona dida'ḵ ippun angkuranganda.

Hebrews 2:12

Ḵanan Jesus ḵan Apudyus, “Ipaigammuḵ siḵa'tta susunudḵu, ya idaydayawḵu siḵa si gimung.”

Hebrews 9:27

Niḵoddonge amingsan tagu matoy, magangput ḵad, maḵuwis ḵan Apudyus.

James 1:18

Mismu we piniona nambalinon ditaḵu'ḵ abengna gapu si ugude ḵatuttuwaan ta ditaḵu ḵapatogan atta losane ḵingwana.

1 Peter 2:23

Inang-angyagda ḵad, adipun os ummang-angyag. Nampaḵaḻamonda ḵad, adinapun inḵoḻkog dusa ḵan dida yaḵon nantaḻgod ḵan Apudyus we naun-unan anḵuḵuwisna.

Revelation 13:8

Ḵad daydayawon da losane tagu si annae lubung sanae ḵaog-ogyate ayam yaḵon da tagu we nigili da ngadanda'tte iblu we nigiliyan da ngadan da awad da biyagda'ḵ inggana, adidapun daydayawon sanae ḵaog-ogyate ayam. Te sa daan ni lubung maḵwaan, nagagangpute nigili da ngadan da sanae tagu si iblun ni biyage sa ḵuwan ni Ubbu we Karnero we nagongat.

Revelation 14:4

Dida bos da adipun naḵabasuḻ mipanggob atta bubai te pasigda ampoḻḵas. Siya inunudda Ubbu we Karnero taḵon ay dinu ayana. Dida da nasubut ta misinada'tta udume tagu ta midatunda ḵan Apudyus ya sa Ubbu we Karnero we isun di umunae maapit ya midatun ḵan Apudyus.

Revelation 20:15

Ḵad ngaimane adipun nigili ngadanna'tte iblu we nigiliyan da ngadan da awad da biyagda'ḵ inggana, niballuda si igaw ni gumilgillayabe apuy ḵan sulfur.

Revelation 6:11

Pun naittan da sadi ye ḵalidodwa si itaḵe langgoyode silup. Ḵad nibaga ḵan didae an-illongda yan aḵ sin-aḵitan inggana'ḵ maganggangput belang da susunudda ḵan Kristu we anserbi ḵan Apudyus we patoyon da tagu we isun os ni napatoyanda.

Revelation 6:9

Niloḵtan ḵad ni Ubbu we Karnero ḵumalimae maḻḵan ni naḻuḵube ḵopel, innilaḵ atte dugun ni altar da ḵalidodwan da napatoy gapu si nangiwaḻagawaganda si Ugud Apudyus ya sa nanaḵdoḻanda si tuttudun Jesus.