Hebrews 11:39 - Sa Ugud Apudyus

³⁹ Losan atta sanae tagu, gapu'tte pammatida ambaḻu ḵaugudanda. Yaḵon adidapun inawat inkarin Apudyus.

Hebrews 11:39 ပူးပေါင်းရင်းမြစ်များ

Hebrews 10:36

Ḵasapuḻane anusanyu we angwa'tta pinion Apudyus, ḵad awatonyu inkarina.

Hebrews 11:13

Namati losan da sanae tagu ḵan Apudyus inggana'ḵ natoyda. Ḵad taḵon ay nu adidapun inawat da inkarin Apudyus si matattaguwanda, isun di oottapondae abus nu ngai maatod ḵan dida si umali ye aḻgaw taḵon ay nu manunnuwan mituttuwaanda. Binigbigdae mangilidae abuse naippun ustu'ḵ ilida sina'd luta.

Hebrews 11:2

Gapu si pammatin da danaḵḵoḻ taḵu si awe, inawatdae inon-onan Apudyus dida.

Hebrews 9:15

Pun sadi gapunae aḵ Kristu angiyugud si Baru we Tuḻag Apudyus atta tagu ta da pinilin Apudyus awatonda annanayune tawide inkarina. Gapu'tte natoyana, sinubutna dida ta mapuḵayan da naḵabasuḻ si ummunae tuḻag.

1 Peter 1:12

Ḵad impaigammun Apudyus atta profetanae da sanae imbagada, daḵampun aḵ bumaḻuwanda yaḵon sa bumaḻuwanyu. Te sadi bos imbagabagan da nangiwaḻagawag sinsadi si Ambaḻu we Damag ḵan diḵayu mipagapu si Ispiritu Santu we nibuune naḻpu'd langit. Sana da banage taḵon ay da anghel, pionda maawatane ustu.