Galatians 4:19 - Sa Ugud Apudyus

¹⁹ Gapu ḵan diḵayu ay-ayatoḵe aabeng, ampaḵaḻamaḵ ose isun ni inae anggumut inggana'ḵ awad ḵan diḵayu ugalin Kristu.

Galatians 4:19 ပူးပေါင်းရင်းမြစ်များ

Luke 22:44

Ḵad gapu'tte ummamdane ampaḵaḻamana, pummangoge nalluwaḻu woḵ sa lingotna isunan daḻae nantottod si luta.

Romans 13:14

Yaḵon sa ḵoon taḵu oḵyan, unudon taḵu ugalin Apu taḵu we Jesu Kristu ya adi taḵu oḵyan iyunud da pion da long-ag taḵu.

Romans 8:29

Te da pinilin Apudyus misaḻad atte laplapu, inunana dida dinutuḵan aḵ ambalin aḵ isun Jesu Kristu we Abengna ta aḵ Jesus nambalin aḵ panguḻu'tta adu we susunud ḵan Kristu.

2 Corinthians 12:14

Naḵasaganaaḵe umali ḵan diḵayu ḵad sana piḵluḵe umali. Ḵad nu umaliyaḵ daḵampun aḵ siya singtoḵ badangyu te daḵampun atta ittonyu gamgamaḵ yaḵon diḵayu we mismu pioḵ. Te saḵon isun di amayu si namatiyanyu ḵad daḵampun atta abeng maḻpuwan ni ḵasapuḻan da ama ḵan ina. Yaḵon da ama ḵan ina maḻpuwan ni ḵasapuḻan da abeng.

Ephesians 4:13

inggana'ḵ an-ossaan pammati taḵu ya madog-an an-aawat taḵu ḵan ambubuḻunan taḵu ḵan Kristu we Abeng Apudyus. Ḵad ambalin taḵu'ḵ naangsan si pammati ya sa ugali taḵu miyisu si ḵabaḻun ni ugalin Kristu we naippun nangkurangana.

Ephesians 4:24

ya awatonyu baru we ansosomsomoḵ ya sa ugali ye maḻpu ḵan Apudyus we isun ni ansosomsomoḵna ḵan ugalina. Mipaila sana si antataguyu si tuttuwae naun-unan atte ambaḻu we ugali.

Philippians 1:8

Igammun Apudyus ummamdane ayuḵ ḵan diḵayu te ay-ayatoḵ diḵayu we isun ni an-aayat Jesu Kristu ḵan diḵayu.

Philippians 2:17

Ḵad gapu ta madam-an angongatanda ḵan saḵon, allaylayadaḵ taḵon ay nu ḵasapuḻane mibuḵbuḵ daḻaḵe midoga si datune midatun gapu si pammatiyu ḵan Apudyus. Pun maḵagangganasaḵ ḵan diḵayu losan.

Philippians 2:5

Ḵasapuḻane patilayunonyu unudon ansosomsomoḵ ḵan nantatagun Jesu Kristu.

Colossians 2:1

Te pioḵe ipaigammu we inniggaḵ ḵabooḻaḵe anḵewaaḻ para ḵan diḵayu we iColossae ya iLaodicea ya da losane daampun angila ḵan saḵon,

Colossians 3:10

ya awatonyu baru we ansosomsomoḵ ḵan ugali ye itton Apudyus ḵan diḵayu ḵad pagatupana pabaruwon ta miyisu ḵayu ḵan siya ya igammuwonyu we ustu.

Colossians 4:12

Aḵ Epaphras ḵad, osae kagrupuwanyu we angipapuute anserbi ḵan Jesu Kristu, pakumustaona bos diḵayu ya ipapatina iluwaḻuwan diḵayu ta pumigsa da pammatiyu, ta adi ḵayu anduwaduwae angunud si pinion Apudyus.

1 Thessalonians 2:7

Yaḵon an-anggom ḵani si timpu we inninggawanni ḵan diḵayu we isun ni inae angayyuwan atta abengna.

1 Timothy 1:2

Annaya suḻatḵu ḵan siḵa Timothy ye ibelangku'ḵ tuttuwae abengḵu'tte pammati ḵan Jesu Kristu. Awad oḵyan ḵan siḵa ḵinabaḻu, ḵadagu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu.

Titus 1:4

Annaya suḻatḵu ḵan siḵa Titus we imbelangḵu'ḵ abengḵu gapu si pammati taḵu. Awad oḵyan ḵan siḵa ḵinabaḻu ḵan lin-awae maḻpu ḵan Apudyus we Ama taḵu ya aḵ Jesu Kristu we anagu ḵan ditaḵu.

Philemon 1:10

Ilam ḵappos ta badangam aḵ Onesimus we nambalin aḵ abengḵu si pammati si nibabaḻḻudaḵ.

Philemon 1:19

Ilam ḵad! Saḵone mismu nangigili si anna ya nampilma ta angigammuwame ituttuwaḵ da imbagaḵ. Saḵon aḵ Paul. Bayadaḵ utang Onesimus. Yaḵon adim maliwatane nautanganḵa ḵan saḵon gapu'tte baru we biyagnu te binadangaḵ siḵae nambalin aḵ kristianu.

Hebrews 5:7

Sa inninggawan Jesus si annae lubung, indangsoḻna iyyibile nalluwaḻu ḵan nanḵodaw ḵan Apudyus we ḵallamog anagu ḵan siya si ḵatoy. Pun dingngoḻ Apudyus luwaḻuna te tummuttuwa ya impakumbabana long-agna.

James 1:18

Mismu we piniona nambalinon ditaḵu'ḵ abengna gapu si ugude ḵatuttuwaan ta ditaḵu ḵapatogan atta losane ḵingwana.

1 John 2:1

Diḵayu we abengḵu, nanuḻataḵ ḵan diḵayu ta adi ḵayu bumasuḻ. Yaḵon nu awad bumasuḻ, awad de angiyugud ḵan ditaḵu ḵan Apudyus we Ama, siya'ḵ Jesu Kristu we naun-unan.

1 John 2:12

Nanuḻataḵ ḵan diḵayu we aabengḵu te napakawan da basuḻyu gapu ḵan Jesu Kristu.

1 John 5:21

Ay-ayatoḵe aabengḵu, adayuwanyu da sinan-apudyus.

3 John 1:4

Naippun udum aḵ amo nabaḻbaḻu'ḵ allaylaydaḵ yaḵon sa nangngoḻaḵe da abengḵu unudonda ḵatuttuwaan.