Galatians 3:13 - Sa Ugud Apudyus

¹³ Yaḵon sinubut Kristu ditaḵu si madusaan taḵu te aditaḵupun lamog tuttuwaon da losane lintog si natoyana'tte kros para ḵan ditaḵu. Te sa nigili ye Ugud Apudyus ḵanana, “Ngaimane madusa ta matoy gapu si mitayunana'tte ḵayu, nadusa ḵan Apudyus.”

Galatians 3:13 ပူးပေါင်းရင်းမြစ်များ

Matthew 26:28

te sana daḻaḵe amanoḵnoḵ atte Baru we Tuḻag Apudyus atta tagu. Mibuḵbuḵ nu matoyaḵ ta adu da tagu we mapakawan da basuḻda.

Matthew 27:5

Pune sadi, impitlaḵ Judas pilaḵ ad daḻom si templo, pun ummoyon woḵ ummoy namposoḻ.

Acts 5:30

Sa Apudyus da danaḵḵoḻ taḵu tinaguna'ḵ Jesus we gingngatyu si nangipattoḻanyu'tte kros.

Romans 4:25

Impuḻang Apudyus aḵ matoy aḵ Jesus ta bayad da basuḻ taḵu ya tinaguna ta ibelang Apudyus ditaḵu'ḵ naun-unan.

Romans 9:3

Te nu maḵwa oḵyan, taḵon ay saḵon mipasani'tta susunudḵu we ganaḵ Israel madusa ya misina ḵan Kristu ta mataguda.

2 Corinthians 5:21

Aḵ Kristu, ippun paat basuḻna. Yaḵon gapu ḵan ditaḵu, imbelang Apudyus aḵ ḵabasbassuḻan ta mipagapu si niyossaanan taḵu ḵan siya, aḵ Apudyus angwa si maun-unan taḵu.

Galatians 3:10

Yaḵon losan atta antaḻgod si anuttuwaanda'tte lintog ta mibelangda'ḵ maun-unan, andagson dusada te awad de Ugud Apudyus we ḵanana, “Ngaimane adi patilayun anuttuwa'tta losane biline nigili si Lintog Apudyus, andagson dusana.”

Galatians 4:5

Ḵingwana ḵatti ta subutona da nampaituray atte lintog ta mibelang taḵu'ḵ dummaḵoḻe abeng Apudyus.

Ephesians 5:2

ta miyisu oḵyan an-aayatyu si nan-aayat Kristu ḵan ditaḵu. Te innatodna long-agna'ḵ matoy para ḵan ditaḵu ya sa natoyana, isunan ambangu we datun ḵan Apudyus we mas-omana.

Titus 2:14

Siya nangitod si long-agna'ḵ matoy para ḵan ditaḵu ta mapuḵayan taḵu'tta losane ḵabooḻan ni basuḻ ya papoḻḵasona ditaḵu'tta basuḻ taḵu aḵ mitotoḵḵone tagunae sillalaylayade angwa'tta ambaḻu.

Hebrews 9:12

Namingsan nillumnoḵ aḵ Kristu si tuttuwae igaw Apudyus ad langit. Ḵad daḵampun aḵ daḻan da kalding ya da ubbun di baḵa ummoyna indatun yaḵon sa mismu we daḻana ta puḵayana ditaḵu si dusan da basuḻ taḵu ya taguwon ditaḵu'ḵ inggana.

Hebrews 9:15

Pun sadi gapunae aḵ Kristu angiyugud si Baru we Tuḻag Apudyus atta tagu ta da pinilin Apudyus awatonda annanayune tawide inkarina. Gapu'tte natoyana, sinubutna dida ta mapuḵayan da naḵabasuḻ si ummunae tuḻag.

Hebrews 9:26

Te nu ḵatti ḵingwana, iḵasiḵasinna ampaḵaḻam inggan ni naḵwaan ni lubung. Yaḵon sa anungus ni timpu namingsan ummali'ḵ Kristu si annae lubung ta ḵaanona da basuḻ da tagu si nangidatunana si mismu we long-agna.

Hebrews 9:28

Isuna bos ḵan Kristu, namingpingsane indatunna long-agna ta ḵaanona da basuḻ da adu we tagu. Ḵad nu umali ḵasin, daḵampun aḵ gapu'tta basuḻ yaḵon taguwona da anguuway ḵan siya.

1 Peter 2:24

Aḵ Kristu we mismu nangiḵaḻu'tta basuḻ taḵu si natoyana'tte kros ta sadi mapuḵayan taḵu'tte ḵabooḻan ni basuḻ ya unudon taḵu naun-unane antatagu. Gapu'tta sugatna, naḵaan da saḵit taḵu.

1 Peter 3:18

Te aḵ Kristu, namingpingsane nampaḵaḻam ya natoy gapu'tta basuḻ taḵu. Sa naun-unan, natoy para ḵan ditaḵu we adipun naun-unan ta iyadanina ditaḵu ḵan Apudyus. Gingngatda nainlubungane long-agna yaḵon ummuli ḵad, daguse naispirituwan long-agna.

1 John 4:10

Ḵad sana gattoḵe ayat: Daḵampun atte ayat taḵu ḵan Apudyus yaḵon sa ayatnae impailana ḵan ditaḵu si nangibuunana si Abengna ta siya angidatun atte long-agna ta maḵaan sangan Apudyus ya mapakawan da basuḻ taḵu.

Revelation 1:5

Naḻpu bos ḵan Jesu Kristu we mataḻgodane amanoḵnoḵ atte mipanggob ḵan Apudyus. Siya ummunae natagu ḵasin atta natoy ya siya pangat da losane ari'd luta. Ay-ayatona ditaḵu ḵad pinuḵayana ditaḵu we isun di baḻud ni basuḻ mipagapu'tte daḻanae pummoy-as atte natoyana.

Revelation 13:8

Ḵad daydayawon da losane tagu si annae lubung sanae ḵaog-ogyate ayam yaḵon da tagu we nigili da ngadanda'tte iblu we nigiliyan da ngadan da awad da biyagda'ḵ inggana, adidapun daydayawon sanae ḵaog-ogyate ayam. Te sa daan ni lubung maḵwaan, nagagangpute nigili da ngadan da sanae tagu si iblun ni biyage sa ḵuwan ni Ubbu we Karnero we nagongat.

Revelation 5:9

Ḵanandae angiḵanḵanta'tta baru we ḵanta, “Siḵa ḵallabbong angaḻa si naḻuḵube ḵopel ya alloḵta'tte maḻḵa. Te napatoyḵa woḵ sa daḻam nanubutnu'tta tagu ta ambalindae tagun Apudyus. Ḵad maḻpuda'tta losane ili ya da losane tribu ya da tagu we nansabasabali gingada ḵan naḻpuwanda.