Galatians 3:1 - Sa Ugud Apudyus

¹ Nadongdong-ogan ḵayu we iGalatia! Ngai ḵad ain da nangallelaw ḵan diḵayu? Nalawag ḵad ose nipaila ḵan diḵayu we nipattoḻ aḵ Jesu Kristu atte kros!

Galatians 3:1 ပူးပေါင်းရင်းမြစ်များ

Matthew 24:24

Te ampaila da umallelawe tagu ya ibagadae dida Kristu ya awad os da angibagae dida profeta. Ḵad angipailada'tta amo nakaskasdaaw ta amanoḵnoḵe awad ḵabooḻanda ta allelawonda da tagu, taḵon ay da pinilin Apudyus nu maḵwa.

Matthew 7:26

Sa andongoḻ ya adinapun tuttuwaon ḵoon, isuna nadong-oge tagu we nantaḵad aḵ boḻoyna si galgallis.

Luke 24:25

Pun ḵanan Jesus ḵan dida, “Anḵadong-og ḵayu! Ngaipa anḵamnut amatiyanyu'tta losane imbagan da profetan Apudyus?

Acts 16:6

Pun ummoy da Paul atte probinsiya'd Phrygia ya sa probinsiya'd Galatia te adimpun ni Ispiritu Santu iyyunud didae umoy angiwaḻagawag atte Ugud Apudyus si probinsiya'd Asia.

Acts 6:7

Pun amo nandinongoḻ Ugud Apudyus ya amo nadog-an belang da namati'd Jerusalem. Inggaw da adu we papadi ye inunudda ustu we pammati.

Romans 10:16

Yaḵon adimpun da losane tagu tinuttuwa Ambaḻu we Damag. Te ḵanan Profeta Isaiah, “Apu, ngai da namati'tta imbagabagani?”

Romans 2:8

Yaḵon da tagu we siya sosomḵonda da pionda ya adidapun tuttuwaon gapu si adidapun amatiyan si ḵatuttuwaan ḵad siya ḵoonda lawweng, aaddi ye dida angipail-an Apudyus si ummamdane sangana'tte timpu we anusaana ḵan dida.

Romans 6:17

Yaḵon anggappiyaaḵ ḵan Apudyus te taḵon ay nu musassun ni basuḻ diḵayu'tte awe, sinsana tuttuwae insisimoḵyu tuttuwaon ḵatuttuwaane nituttudu ḵan diḵayu.

1 Corinthians 11:26

Sa timpu we angan ḵayu si tinapay ḵan uminum ḵayu si bayas, ipaigammuyu natoyan Apu inggana'ḵ angulinana.

1 Corinthians 2:2

Te simsimmoḵḵu we sa inninggawaḵ ḵan diḵayu, naippun udum aḵ intuttuduḵ yaḵon abus mipanggob ḵan Jesu Kristu ya sa nipattoḻana'tte kros.

2 Corinthians 10:5

Dadailonni da gapun ni ansosongbatan da ngaimane ampasindayawe anupod atte angigammuwan da tagu si mipanggob ḵan Apudyus. Ḵad pasantanni da losane somsomoḵ ta tuttuwaonda'ḵ Kristu.

2 Corinthians 11:3

Yaḵon umogyataḵ aḵ maallelaw somsomoḵyu ya maawis ḵayu'tta sabali ye tuttudu ḵad nan-awidanyu sipupusu ḵan ampoḻḵase somsomoḵyu ḵan Kristu we isuna naḵwa ḵan Eve we inallelaw ni uḻog.

Galatians 1:2

Annaya suḻatḵu ḵan diḵayu'tta gimung da namati'tta ili'd Galatia. Da losane susunudḵu ḵan Kristu sinae namati, pakumustaonda bos diḵayu.

Galatians 1:6

Nataagaḵ si daguse nan-awidanyu'ḵ Apudyus we namili ḵan diḵayu mipagapu si ḵinabaḻun Kristu ḵad siya unudonyu sabali ye tuttudu we ḵanan da udume ambaḻu we damag.

Galatians 2:14

Yaḵon innilaḵ sumullagi si ḵatuttuwaan ni Ambaḻu we Damag we ḵoonda, ḵanaḵ ḵan Peter si sinagung da losan, “Taḵon ay nu Judyuḵa, nalligligammuḵa si udume ugalin da Judyu we isun di daḵanḵapun aḵ Judyu. Ḵad nu ḵingwam ḵatti, ngaipam os ay ipatut paunud atta Gentil ugali taḵu?”

Galatians 3:3

Nadongdong-ogan ḵayu ḵamman? Ummunae namati ḵayu ḵan Apudyus mipagapu'tte Ispiritu Santu. Pun sinsadi, ngaipayu ḵanane lamogyu baliwan da long-agyu ta naippun angkuranganyu mipagapu'tta mismu we ḵabooḻanyu?

Galatians 4:9

Yaḵon sinsana inigammuyu'ḵ Apudyus baḵon nu inigammuna diḵayu, ngaipayu bos ḵasin sanguwon da ug-ugalin da tagu si annae lubunge inunudyu? Adiyupun ḵamman igammu we naippun ḵabooḻandae anagu ḵan diḵayu ya naippun ittonda'ḵ bindisyun? Ngaipayu bos pione anserbi ḵasin ḵan didae isun di musassu?

Galatians 5:11

Yaḵon saḵon ḵad susunudḵu ḵan Kristu, awad da udume angibagae sissiyae ituttuduḵe ḵasapuḻane tuttuwaon taḵu lintog mipanggob si sogyat ta mibelang taḵu'ḵ naun-unan ḵan Apudyus. Yaḵon sa ḵatuttuwaan, adiḵpun ituttudu sogyat te da Judyu sissiyae ampaḵaḻamonda saḵon. Ḵad nu ituttuduḵe ḵasapuḻane masogyatan da tagu, ippun ogon lasunda'ḵ anasanga ḵan saḵon te adiyaḵpun ogon antuttudu we siya abus aḵ mataguwan taḵu mipagapu si natoyan Kristu atte kros.

Ephesians 3:8

Taḵon ay nu saḵon ḵababaan atta losane tagun Apudyus, impailana ḵinabaḻuna si nangittana ḵan saḵon atte gundawaye angipaigammu ḵan diḵayu we Gentil atte ippun miyisuwanae bindisyune awad ḵan Kristu.

Ephesians 4:14

Ḵad nu miyisu taḵu ḵan siya, aditaḵupun ogon isun di abenge allasu mabaliwan ni somsomoḵna ya maallelaw atta tinutuli ye ituttudun da tuliyan.

Ephesians 5:15

Pun ummanyu'tta antataguyu. Daḵampun oḵyan aḵ matagu ḵayu we isun di nadong-og yaḵon matagu ḵayu we isun di nalaing ḵan naangsane tagu.

2 Thessalonians 1:8

Ḵad dusaona'tte apuy ta bumaḻos atta adipun angigammu ḵan Apudyus ya da adipun tumuttuwa gapu si adidapun amatiyan atte Ambaḻu we Damag mipanggob ḵan Jesus we Apu taḵu.

1 Timothy 6:4

Ḵad maḵwa igammuwome napasindayaw somsomoḵna yaḵon sa ḵatuttuwaan naippun igammuna. Da tagu we ḵaḵna, siya pionda maḵaduddunggaḻ ḵan maḵasubog atta banage ippun anuna. Ḵad siya ibungana apos, uḵ-usit, lilliḵud, lawwenge ansosomsomoḵ,

Hebrews 11:8

Gapu si pammatin Abraham, tinuttuwana'ḵ Apudyus si nangayagana ḵan siyae umoy si ili ye inkarin Apudyus ḵan siyae tawidona. Tinenana mismu we ilina taḵon ay nu adinapun igammu nu dinu ayana.

Hebrews 5:9

Ḵingwana ḵad da losane ḵasapuḻane ḵoona, nambaline siya anagu'tta losane tagu we anuttuwa ḵan siya'tte angittana ḵan dida si biyag aḵ inggana.

1 Peter 1:22

Te pummoḻḵas ḵayu we ustu si tummuttuwaanyu gapu si namatiyanyu'tte ḵatuttuwaan, gattoḵe ayatonyu da susunudyu ḵan Kristu we namati. Pun pagapagatupanyu we an-asiayat atta losane somsomoḵyu.

1 Peter 4:17

Te dumatong timpu we anguwisan Apudyus atta losane tagu ḵad isaḻadna ḵan ditaḵu we tagun Apudyus. Ḵad nu isaḻadna ḵan ditaḵu we anḵuwis, ngai maḵwa'tta adipun tumuttuwa gapu si adidapun amatiyan si Ambaḻu we Damag we naḻpu ḵan Apudyus?

2 Peter 2:18

Amod pagay os soḵaḻdae angibagabaga'tta ippun patogdae ugud. Usaronda da pipion ni long-agda'ḵ anulisug ya angawis atta tagu we ḵaḵ-isaḻaddae namati ya ḵaḵ-iwaḻangda'tta maḵabasuḻan ya da ugali ye ḵoḵoḵḵon da tagu.

Revelation 18:3

Te binuuḵna da tagu'tta losane ili'tte ampigsae bayasna, piona ḵanan, inawisna didae nangunud atta ḵaissawe ugalinae angidaḻan atte madusaanda. Ḵad naḵadagdagas da ari'd luta ḵan siya ya da allaḵlaḵu'd luta, nambalindae baḵnang atte ummamdane ḵamommodnae bumaḵnang.”

Revelation 2:20

“ ‘Yaḵon awad de adiḵpun pion ḵan diḵayu, iyyunudyu we midoga sanae bubai ye aḵ Jezebel ḵan diḵayu. Ḵananae siya profeta we angituttudu'tta imbagan Apudyus yaḵon gapu si tuttuduna, awisona da anserbi ḵan saḵon ta adaḻugonda da daḵampun aḵ asawada ḵan anganda'tta maḵane nidatun atta sinan-apudyus.