Ephesians 6:12 - Sa Ugud Apudyus

¹² Te daḵampun aḵ tagu da ḵabusuḻ taḵu yaḵon da losane kalasin di ispiritu we adipun mailae angipangat atta tagu sina'd lutae sissiya si pongot ya da udume awad ad langite lawweng.

Ephesians 6:12 ပူးပေါင်းရင်းမြစ်များ

Matthew 16:17

Pun ḵanan Jesus, “Pianḵa ḵammos, Simon we abeng Jonah te daḵampun aḵ tagu nangipaigammu ḵan siḵa nu adi aḵ Amaḵ we awad ad langit.

Mark 4:19

Yaḵon gapu'tta binimbinsawda'tta biyagda si annae lubung ya piondae bumaḵnang ya da udume amaamayonda, adidapun tungaguwon ugude dingngoḻda ḵad adipun mabaliwan da ugalida.

Luke 13:24

“Iggayu ḵabooḻanyu we lumnoḵ atte ansuḻpite lewangan ad langit atte sissiyae anna gundawayyu. Te dumatong timpu we iyonob ni simboḻoy lewangan ya amod da angipadas lumnoḵ yaḵon annaya ibagaḵ ḵan diḵayu we ippun maḵaḻnoḵ. Taḵon ay nu asi ḵayu anḵugḵug ya ḵananyu, ‘Apu, buḵtam ud lewangan ta lumnoḵ ḵani.’ Asina ḵanan, ‘Ippun igammuḵ ḵan diḵayu ya sa naḻpuwanyu.’

Luke 22:53

Inaḻgawe inninggawaḵ ḵan diḵayu'tte paway ni templo we antuttudu, adiyupun saḵon dinoḵmaan. Yaḵon sinsadi, annae dummatong timpuyu we inḵoddong Apudyus ya dummatong os timpun Satan we angipangat atte giḵbot.”

John 12:31

Sinsadi ḵuwison Apudyus da tagu si annae lubung ya sinsadi aḵ Satan we pangat da tagu we adipun amati, maabaḵ.

John 14:30

“Adipun ogon andu maḵaug-uggudaḵ ḵan diḵayu te annate umali'ḵ Satan we pangat da adipun amati ḵan saḵon. Naippun ḵabooḻana ḵan saḵon,

John 16:11

Nankamalida mipanggob atte anḵuwisan Apudyus te da tagu we adipun amati naḵoddonganda'ḵ dusaon Apudyus te nagangpute inḵoddongnae dusaona'ḵ Satan we pangat da adipun amati.

Acts 26:18

Ibuunḵu siḵa ḵan dida ta igammuwonda ḵatuttuwaan ta masilawan da somsomoḵda ya an-awidanda da lawweng ya ansagungda si padda. Ḵad an-awidanda ḵabooḻan Satan ḵad ansagungda si ḵabooḻan Apudyus ta amatida ḵan saḵon ḵad mapakawan da basuḻda ya mibelangda'tta intotoḵḵon Apudyus aḵ taguna.’

Romans 8:38

Ḵad aaddi ye naippun ḵallamog maḵaisina'tte ayatna ḵan ditaḵu. Te taḵon ay nu matoy taḵu baḵon nu matattagu taḵu, ay-ayatona ditaḵu. Taḵon ay da anghel, da aḻan, da turaye adipun maila, da maḵwa ḵan ditaḵu sinsana ya sa umali ye aḻgaw ya da ḵabooḻan.

1 Corinthians 15:50

Susunudḵu ḵan Kristu, annaya pioḵ ibaga ḵan diḵayu. Sa long-ag taḵu ḵan daḻa taḵu, adidapun gangganason da laḵsunda si midog-anda si ampangatan Apudyus te da long-ag taḵu madadail, adidapun maḵwae midoga'tte igaw da losane matagu'ḵ inggana.

2 Corinthians 11:14

Ḵad adi taḵu oḵyan mataag si sana te taḵon ay aḵ Satan maḵwa gay ipailana long-agna'ḵ isun di ambaḻu we anghel Apudyus.

2 Corinthians 4:4

Adidapun amati te aḵ Satan we apudyus da tagu si annae lubung si sanae timpu, tatallingdana da somsomoḵda ta adida ilan silawe maḻpu'tte Ambaḻu we Damag mipanggob si ḵinangatun Kristu we ḵais-isun Apudyus.

Galatians 1:16

Pun impailana ḵan saḵon abengna ta iwaḻagawagḵu mipanggob ḵan siya'tta Gentil. Naippun tagu'ḵ ummoyḵu nampatuttuduwan.

Ephesians 1:21

Sidi ampangatana sinsana ḵad nangatngatu'ḵ adayu ḵabooḻana nu da anna ḵaḻabbonganda ḵan ḵabooḻanda ya da ngadan da ngaimane pangat si annae lubung ya da losane adipun maila'd langite awad de ampangatanda. Naippun paat nangatngatu nu siya sinsana ya sa umali ye timpu.

Ephesians 1:3

Dayawon taḵu'ḵ Apudyus we Aman Jesu Kristu we Apu taḵu we siya bos de Apudyusna te gapu si niyossaanan taḵu ḵan siya, innatodna ḵan ditaḵu da losane naispirituwane bindisyune naḻpu'd langit.

Ephesians 2:2

Te siya inunudyu da antatagun da tagu we adipun amati ya tinuttuwayu gapu si namatiyanyu'tte pangat da ispiritu we adipun mailae siya angidaḻan atta tagu we adipun amati.

Ephesians 3:10

Sadi panggob Apudyus we mipagapu ḵan ditaḵu we namati, igammuwon da losane adipun mailae ampangat ya anna ḵabooḻanda ḵinalaing Apudyus we nipaila si nansabasabali ye inon.

Colossians 1:13

Te siya nanagu ḵan ditaḵu si ḵabooḻan ni pangat atte giḵbot woḵ indogana ditaḵu si ampangatan ni ay-ayatonae Abengna,

Colossians 2:15

Ḵad gapu'tte natoyan Kristu atte kros, ḵinaan Apudyus ḵabooḻan ḵan ḵaḻabbongan ni adipun maila ḵad impailanae illogna dida si antotollong da losan.

2 Timothy 2:5

Sa osae mipaniyan ni anserbi ḵan Jesu Kristu, isuna bos athlete we maḵatodtoddaḵ. Naippun maaḻana'ḵ gungunana nu adina unudon da lintog si todtoddaḵ.

Hebrews 12:1

Ditaḵu ḵad, naliḵwos taḵu'tta aduadu we anaḵdoḻ atte pammatida. Pun ḵasapuḻane ḵaanon taḵu da losane maḵatupod atte amatiyan taḵu amod ay basuḻe allaḵod ḵan ditaḵu, we isun di maḵatodtoddaḵe iggana ḵabooḻanae anoddaḵ.

Hebrews 12:4

Te naippun pummoy-as daḻana ḵan diḵayu si nangipapattiyanyu ta adi ḵayu maḵabasuḻ.

1 Peter 3:22

Nipauli'ḵ Kristu ad langit woḵ awad si madawinan Apudyus we maḵapangat ḵan siya ya ipangatana da losane anghel ya da udume adipun mailae ḵingwanae awad de saadda ḵan ḵabooḻanda.