Ephesians 6:10 - Sa Ugud Apudyus

¹⁰ Annaya anungus ni ibagaḵ ḵan diḵayu. Pumigsa oḵyan da pammatiyu mipagapu si niyossaananyu ḵan Apu ya sa ummamdane ḵabooḻana.

Ephesians 6:10 ပူးပေါင်းရင်းမြစ်များ

1 Corinthians 16:13

Dadaḵḵagonyu ya popotpotanyu bos da pammatiyu, tumuḻod ḵayu oḵyan ya pumigsa ḵayu.

2 Corinthians 13:11

Susunudḵu ḵan Kristu, annaya anungus ni ibagaḵ ḵan diḵayu. Allaylayad ḵayu oḵyan! Papigsaonyu pammatiyu ta ippun kurangna. Ḵad ipapatiyu unudon da intuttuduḵ ḵan diḵayu ya an-asiunud ḵayu ya adi ḵayu ansusubog. Allin-awa oḵyan ambubuḻunanyu'tta udume tagu. Ḵad aḵ Apudyus we maḻpuwan ni ayat ḵan lin-awa awad ḵan diḵayu.

Ephesians 1:19

Ḵad giḵnaonyu oḵyan ḵinapigsan ni ḵabooḻanae bumadabadang ḵan ditaḵu we namati. Sana nakaskasdaawe ḵabooḻane

Ephesians 3:16

Ḵad ḵodawoḵ ḵan siya ta mipagapu'tte ḵabooḻan ni Ispirituna we anna'tta pusuyu, pumigsa oḵyan somsomoḵyu we mibatay si ḵinabaḵnang ni ḵinaapudyusnae ippun miyisuwana,

Philippians 3:1

Annaya osan ibagaḵ ḵan diḵayu susunudḵu ḵan Kristu, allaylayad ḵayu oḵyan gapu si niyossaananyu ḵan Apu. Adiyaḵpun mappoge angisassaud atte ibagaḵ ḵan diḵayu ta mabantayan pammatiyu.

Philippians 4:13

Gapu'tte miyossaanaḵ ḵan Kristu we siya amapigsa ḵan saḵon, lamogḵu ḵoon da losan.

Philippians 4:8

Sa anungus ni ibagaḵ ḵan diḵayu we susunudḵu ḵan Kristu, siya oḵyan pasigyu sosomḵon da tuttuwa, ampatog, ustu, ampoḻḵas, ambaḻu ḵan ḵadayawan. Ḵad taḵon ay da udume ambaḻu baḵon nu nanggodonge ugud, sadi oḵyan da imumuḻayu'tta somsomoḵyu.

Colossians 1:11

Oḵyan pos ta sa nakaskasdaawe ḵabooḻan Apudyus amapigsa'tta somsomoḵyu ya lumayad ḵayu ta taḵon ay nu ngai maḵwa ḵan diḵayu, lamogyu maattomane angiyanus.

2 Timothy 2:1

Ḵan siḵae abengḵu, papigsaom pammatim mipagapu si ḵinabaḻun Jesu Kristu ḵan ditaḵu we niyossaan ḵan siya.

2 Timothy 4:17

Yaḵon taḵon ay nu ḵatti ḵingwada, adiyaḵpun nan-awidan ḵan Apu. Siya ḵingwana pinapigsana saḵon ta awad inoḵe angiwaḻagawag atte Ambaḻu we Damag ta dongngon da losane Gentil. Sinaḻaḵnibana saḵon atta tagu we pionda gongaton saḵon.

1 Peter 3:8

Annaya mungimung ni ibagabagaḵ. Ḵasapuḻane an-os-ossaan ḵayu losan atte somsomoḵ ḵan maḵagiḵna ḵayu'tta buḻunyu. An-asiayat ḵayu we isun di mismu we ansusunud, an-asiḵadagu ḵayu ya ipakumbabayu da long-agyu.

1 Peter 4:11

Sa innattan Apudyus aḵ ḵabooḻane angiwaḻagawag, ḵasapuḻane sosomḵonae siya iwaḻagawagna Ugud Apudyus. Sa naittan aḵ ḵabooḻane anserbi'tta buḻunna, ḵasapuḻane anserbi ye usarona pigsae itton Apudyus ḵan siya ta da losane banage ḵoonyu, midaydayaw aḵ Apudyus mipagapu ḵan Jesu Kristu. Siya madaydayaw ḵan maḵabooḻe ampangat aḵ inggainggana. Amen.

1 Peter 5:10

Nu maabus sin-aḵitane ampaḵaḻamanyu, aḵ Apudyus we naḻpuwan ni losane ḵinabaḻu, pabaruwona biyagyu ya papigsaona pammatiyu ta adi mayugayug. Siya namili ḵan diḵayu we midoga si ḵabaḻuwane antatagu ḵan Apudyus ad langite ippun anungusna mipagapu si niyossaananyu ḵan Kristu.

1 John 2:14

Iḵasinḵu bos ibaga ḵan diḵayu gapun ni nanuḻataḵ ḵan diḵayu we aabengḵu te igammuyu'ḵ Ama taḵu. Nanuḻataḵ ḵan diḵayu we aamma te igammuyu'ḵ Apudyus we inninggaw inggan ni laplapu. Nanuḻataḵ os ḵan diḵayu we babaḻu te anḵaḵosdoḻ ḵayu ḵad iinggaw Ugud Apudyus atta somsomoḵyu ḵad siya nangngoganyu ḵan Satan.