Ephesians 5:8 - Sa Ugud Apudyus

⁸ Te diḵayu ḵad, isun di anggiḵbot somsomoḵyu si awe yaḵon sinsana nasilawanda gapu si niyossaananyu ḵan Apu. Pun matagu ḵayu oḵyane isun da tagu we iinggaw atte padda.

Ephesians 5:8 ပူးပေါင်းရင်းမြစ်များ

Matthew 3:8

Adipun paat maḵwa te ḵasapuḻane ḵoonyu da losan ta ipailayu we tuttuwae imbabawiyu da basuḻyu ya agayyu we angwa.

Matthew 4:16

Da tagu ḵad sidi, isudan inggaw si pongot te isunan nalibuuwan ilida si ḵatoy. Yaḵon sa umali ye aḻgaw, ilanda ampigsapigsae silaw te ampaila ḵan dida anilaw atta somsomoḵda.”

Luke 1:79

Dumatong ḵad, langḻangana da tagu we iinggaw si giḵbote maḵimute matoy, ya ipuyutna ditaḵu ta lumin-awa somsomoḵ taḵu.”

Luke 16:8

“Inigammun ḵad ni apuna, intaḻayagna sanae adipun mataḻgodane anḵeḵewwaaḻona si ḵinalaingnae namnammoḵ si iḵataguna. Te tuttuwae da tagu we adipun namati, nalaingdae angwa'tta inondae maḵaug-uggud atta udume tagu we isuna didae adipun nasilawan da somsomoḵda.

John 1:9

Sa tuttuwae silaw, ummali si annae lubung ta silawana somsomoḵ da losane tagu.

John 12:35

Ḵanan Jesus we nangipani, “Sin-aḵitan inggawan ni silaw ḵan diḵayu. Pun ummanyu we anaddaḻan si annaan ni silaw ḵan diḵayu ta adi ḵayu magiḵbotan. Te sa anoḻwap, ippun igammuna'tte ḵapnona.

John 12:36

Sa annaan ni silaw ḵan diḵayu, amati ḵayu atte silaw ta ambalin ḵayu'ḵ tagun ni silaw.” Naabus ḵade imbagan Jesus anna, tinenana dida woḵ adipun ogon nampappaila.

John 12:46

Ummaliyaḵ atte annae lubung aḵ isun di silaw ta ngaimane amati ḵan saḵon, adidapun iinggaw atte giḵbot.

John 8:12

Ḵasin ḵad aḵ Jesus nan-ug-uggud atta adu we tagu ḵananae nangipani, “Saḵon silaw da tagu si annae lubung. Ḵad ngaimane angunud ḵan saḵon, adipun ogon inggaw atte giḵbot te nasilawan somsomoḵna ya maatod ḵan siya biyag aḵ inggana.”

Acts 17:30

Sa awe, inan-anusan Apudyus da ḵingwan da tagu te daandapun igammuwon. Yaḵon sinsadi, imbilinnae losane tagu ibabawida da basuḻda ya agaydae angwa.

Acts 26:18

Ibuunḵu siḵa ḵan dida ta igammuwonda ḵatuttuwaan ta masilawan da somsomoḵda ya an-awidanda da lawweng ya ansagungda si padda. Ḵad an-awidanda ḵabooḻan Satan ḵad ansagungda si ḵabooḻan Apudyus ta amatida ḵan saḵon ḵad mapakawan da basuḻda ya mibelangda'tta intotoḵḵon Apudyus aḵ taguna.’

Romans 1:21

Te taḵon ay nu iniiggammudae awad aḵ Apudyus, adidapun andayaw ya adidapun os anggappiya ḵan siya. Yaḵon nambalin ippun anun da ansosomsomoḵda ya gummiḵbot somsomoḵda.

Romans 13:12

Te sa ḵatuttuwaan, naḻaḵpus labi ya madam-an mabigat. Pun ḵaanon taḵu da ḵoḵoḵḵon taḵu si giḵbot ta iḵabot taḵu aggom ni padda.

Romans 2:19

Ḵad nu aaddi ye diḵayu angidaḻan atta naḵuḻape ippun igammuda si mipanggob ḵan Apudyus, diḵayu silawe allangḻang atta awad atte pongot.

1 Corinthians 1:30

Yaḵon aḵ Apudyus naḻpuwan ni biyag taḵu mipagapu'tte niyossaanan taḵu ḵan Jesu Kristu we naḻpuwan ni ḵinalaing. Ḵad gapu ḵan siya, naun-unan taḵu ya mitotoḵḵon taḵu'ḵ taguna ta bumaḻu ugali taḵu ya masubut taḵu'tta dusan da basuḻ taḵu.

2 Corinthians 3:18

Pun losan ḵan ditaḵu we namati, daḵampun aḵ isu taḵu'ḵ Moses we natalingdan bosaḻna yaḵon ipaila taḵu we isun di ladawan dayaw ḵan ḵabooḻan Apu ya patilayune mabaliwan taḵu bumaḻu inggana'ḵ miyisu taḵu ḵan siya. Te aḵ Apu we sa Ispiritu Santu amagatupe amabaru ḵan amabaḻu ḵan ditaḵu.

2 Corinthians 4:6

Te aḵ Apudyus nangibaga ḵanane, “Awad oḵyan padda” ta papaddaona anggiḵbot. Siya bos amapadda'tte somsomoḵni ta igammuwonni dayaw ḵan ḵabooḻan Apudyus we maila ḵan Kristu.

2 Corinthians 6:14

Ḵan ditaḵu we namati, adi taḵu oḵyan mitipun atta daḵampun aḵ namati te adipun maḵwae antipun naun-unan ḵan lawweng. Maḵwa ḵamman antipun padda ḵan giḵbot?

Galatians 5:25

Pun gapu ta naḻpu si Ispiritu Santu baru we biyag taḵu, ḵasapuḻan ose siya angidaḻan ḵan ditaḵu.

Ephesians 2:2

Te siya inunudyu da antatagun da tagu we adipun amati ya tinuttuwayu gapu si namatiyanyu'tte pangat da ispiritu we adipun mailae siya angidaḻan atta tagu we adipun amati.

Ephesians 4:18

Ḵad sissiyae anggiḵbot da an-aawatda ya naippun ḵan dida biyage itton Apudyus te naippun igammuda ḵan tummungitong da somsomoḵda.

Ephesians 5:2

ta miyisu oḵyan an-aayatyu si nan-aayat Kristu ḵan ditaḵu. Te innatodna long-agna'ḵ matoy para ḵan ditaḵu ya sa natoyana, isunan ambangu we datun ḵan Apudyus we mas-omana.

Ephesians 6:12

Te daḵampun aḵ tagu da ḵabusuḻ taḵu yaḵon da losane kalasin di ispiritu we adipun mailae angipangat atta tagu sina'd lutae sissiya si pongot ya da udume awad ad langite lawweng.

Colossians 1:12

Pasig ḵayu anggappiya ḵan Apudyus we Ama taḵu we nangitod ḵan ditaḵu si ḵaḻabbongane maḵatawid atta insaganana'tta losane taguna si ampaddae ampangatana.

Colossians 1:13

Te siya nanagu ḵan ditaḵu si ḵabooḻan ni pangat atte giḵbot woḵ indogana ditaḵu si ampangatan ni ay-ayatonae Abengna,

Titus 3:3

Te taḵon ay ditaḵu we namati, nandongdong-og taḵu si awe ḵad aditaḵupun os tummuttuwa. Gattoḵe naallelaw taḵu ḵan nipuyut taḵu'tta daḵampun aḵ ustu ya nambalin taḵu'ḵ musassu'tta nansabasabali ye amaamayon da long-ag taḵu ya da ginangganas taḵu. Losane aḻgaw taḵu lawweng ḵasomsomḵan taḵu'tta buḻun taḵu, an-aḵ-apos taḵu, lalawwengon ditaḵu ya an-sassanga taḵu.

1 John 1:7

Yaḵon nu sissiyae mabiyag taḵu'tte paddae isun Apudyus we anna'tte padda, maḵabuḻbuḻun taḵu'tta doga taḵu we namati ḵad pumoḻḵas losan da basuḻ taḵu gapu'tte daḻan Jesus we Abengna.