Colossians 1:28 - Sa Ugud Apudyus

²⁸ Iwaḻagawagni'ḵ Kristu atta losane tagu we usaronni losane laingni ye amagbaga ya angituttudu'tta losane tagu ta da pammatida ippun oḵyan kurangna'tte antotollong Apudyus yaḵon amo maangsanda'tte niyossaananda ḵan Kristu.

Colossians 1:28 ပူးပေါင်းရင်းမြစ်များ

Matthew 28:20

Ḵad tuttuduwanyu dida ta tuttuwaonda da losane imbilinḵu ḵan diḵayu. Sosomḵonyu we patilayune annaaḵ ḵan diḵayu inggana'ḵ anungus ni timpu.”

Matthew 3:7

Yaḵon innilan ḵad John da adu we Pharisee ḵan da Sadducee ye umoy ampabonyag ḵan siya, ḵanana, “Diḵayu we ganaḵ ni uḻog! Nankamali sinomsomoḵyu we nangibagae lamogyu iligsi da long-agyu'tte madusaanyu ḵan Apudyus nu pabonyag ḵayu.

Matthew 5:48

Pun ḵasapuḻane ippun angkuranganyu we isun Apudyus we Amayu'd langite ippun angkurangana.”

Mark 6:34

Dummatong ḵad da Jesus atte taḻantag ni baybay, lummogsadda'tte bangka. Innilana ḵad da amode tagu, ḵummadagu ḵan dida te isudan karnero we ippun anangḵon ḵan dida. Pune sadi, insaḻadnae nantuttudu'tta adu we banag ḵan dida.

Luke 21:15

Te saḵone mismu angitod ḵan diḵayu si laingyu we an-ugud ta ippun inon da losane ḵabusuḻyu we angngog ḵan diḵayu ya sumullagi'tta isongbatyu.

Acts 10:36

Igammuyu Ambaḻu we Damag we impaigammun Apudyus ḵan diḵani ye ganaḵ Israel. Impaigammun ni Ambaḻu we Damag ḵan ditaḵu inon ni allin-awae maḵabuḻbuḻunan taḵu ḵan Apudyus mipagapu ḵan Jesu Kristu we Apun da losane tagu.

Acts 11:20

Yaḵon da udume namati ye iCyprus ḵan iCyrene, ummoyda'd Antioch woḵ iwwaḻagawagda Ambaḻu we Damag mipanggob ḵan Apu Jesus atta Gentil.

Acts 13:38

“Pun mipaigammu ḵan diḵayu susunudḵu we ganaḵ Israel we sa iwaḻagawagni ye mipagapu ḵan Jesus, mapakawan da basuḻyu.

Acts 17:18

Inninggaw os da udume mimistulun da Epicurean ya da Stoic we naḵasossongbat ḵan siya. Ḵanan da udum, “Ngai ibagabagan ni annate aginlalaing?” Ḵanan os da udum, “Siya nin iwaḻagawagna sabali ye apudyus.” Imbagada ḵaḵna te iwwaḻagawag Paul mipanggob ḵan Jesus ya sa ummuliyana.

Acts 17:3

Impaḵaawat Paul ḵan pinanoḵnoḵanae ḵasapuḻane ampaḵaḻam aḵ Kristu ya matoy ḵad umuli. Pun ḵanana, “Sa annae Jesus we iwaḻagawagḵu ḵan diḵayu, siya Kristu.”

Acts 20:31

Pun dadaḵḵagonyu ya sosomḵonyu we sa tuḻun tawone inninggawaḵ ḵan diḵayu, adiḵpun ingginoḵe nangiwaḻagawag ḵan diḵayu si inaḻgaw ḵan nilabi ye maaḻuboy luwaḵ si ayatḵu ḵan ḵadaguḵ ḵan diḵayu.

Acts 3:20

Te nu ḵoonyu da sadi, ittan Apudyus diḵayu'ḵ lumin-awaan ni somsomoḵyu ya ibuunna bos ḵasin aḵ Jesus we Kristu.

Acts 5:42

Ḵad inaḻgawe ummoyda'tte paway ni templo ya da boboḻoy ta pagapagatupandae angituttudu ya angiwaḻagawage aḵ Jesus siya Kristu.

Acts 8:35

Pun illawlawag Philip we insaḻadna'tta sadi ye nigili ye Ugud Apudyus woḵ imbagana Ambaḻu we Damag mipanggob ḵan Jesus.

Acts 8:5

Aḵ Philip ḵade osa ḵan dida, ummoy atte osae siyudad ad Samaria woḵ iwwaḻagawagna mipanggob ḵan Kristu.

Acts 9:20

Pun ummoy atta sinagogan da Judyu woḵ daguse insaḻadnae nangiwaḻagawage aḵ Jesus Abeng Apudyus.

Romans 16:25

Madayaw oḵyan aḵ Apudyus! Te anna ḵabooḻanae amapigsa'tta pammatiyu we nibatay si Ambaḻu we Damag mipanggob ḵan Jesu Kristu we iwaḻagawagḵu. Sa annae Ambaḻu we Damag nitataḻu we adipun nipaigammu si awe.

1 Corinthians 1:23

Yaḵon siya iwwaḻagawagni mipanggob atte natoyan Kristu atte kros ḵad siya nisubuḵan da Judyu ya dinodong-og atta Gentil.

1 Corinthians 1:30

Yaḵon aḵ Apudyus naḻpuwan ni biyag taḵu mipagapu'tte niyossaanan taḵu ḵan Jesu Kristu we naḻpuwan ni ḵinalaing. Ḵad gapu ḵan siya, naun-unan taḵu ya mitotoḵḵon taḵu'ḵ taguna ta bumaḻu ugali taḵu ya masubut taḵu'tta dusan da basuḻ taḵu.

1 Corinthians 12:8

Sa osae namati, ittan ni Ispiritu Santu aḵ lainge angipaigammu si Ugud Apudyus. Ḵad sa osa, ittana'ḵ ḵabooḻane maḵaawat mipanggob ḵan Apudyus.

1 Corinthians 15:12

Sinsadi, nu iwwaḻagawagni ḵan diḵayu we ummuli'ḵ Kristu, ngai inonae ḵanan da udum ḵan diḵayu we adipun umuli da natoy?

1 Corinthians 2:15

Ḵad ngaimane iinggawan ni Ispiritu Santu, lamogna maawatan da ḵinapatog da losan. Yaḵon da udume tagu adidapun maawatan.

1 Corinthians 2:6

Yaḵon awad de ḵinalainge ituttuduni'tta naangsan si pammati, daḵampun aḵ naḻpu'tte ḵinalaing da tagu si sanae timpu ya ḵinalaing da pangat si sanae timpu we amungtu ḵabooḻanda.

1 Corinthians 4:14

Daḵampun aḵ siya anuḻataḵ pabainaḵ diḵayu yaḵon bagbagaaḵ diḵayu we isun di inaabbengḵu we ay-ayatoḵ.

2 Corinthians 10:14

Te adinipun tinuḻ-ayan biyangni si ummaliyanni ḵan diḵayu te diḵani da ummunae ummoy ḵan diḵayu nangiwaḻagawag si Ambaḻu we Damag si mipanggob ḵan Kristu.

2 Corinthians 11:2

Tuttuwae amo angimunaḵ ḵan diḵayu we isun os ni an-iimun Apudyus nu sabali unudonyu. Te isuyun babaḻasange ippun natnattoḵanae intuḻagḵu we miyasawa si os-ossaane laḻaḵi ye siya'ḵ Kristu.

2 Corinthians 4:5

Te daḵampun aḵ sa mipanggob atta long-agni iwwaḻagawagni yaḵon sa mipanggob ḵan Jesu Kristu we Apu. Ḵad anserbi ḵani ḵan diḵayu gapu ḵan Jesus.

Ephesians 3:8

Taḵon ay nu saḵon ḵababaan atta losane tagun Apudyus, impailana ḵinabaḻuna si nangittana ḵan saḵon atte gundawaye angipaigammu ḵan diḵayu we Gentil atte ippun miyisuwanae bindisyune awad ḵan Kristu.

Ephesians 5:27

Ḵingwana ḵatti ta umali ḵade angayag ḵan ditaḵu we namati ḵan siya, ambaḻu ugali taḵu si antotollongna ya ippun ḵadellawan taḵu we isun ni bubai ye mikasar we ambaḻubaḻu ya ippun ḵaissawna ḵan dipiḵtuna.

Colossians 1:22

Yaḵon sinsadi nagangpute nipaḻ-og maḵabuḻbuḻunanyu ḵan Apudyus te aḵ Kristu natoy si nangidatunana'tte mismu we long-agna ta bumaḻu ugaliyu ya ippun ḵadellawanyu ḵan ipabasuḻda ḵan diḵayu si amataḵdogana ḵan diḵayu si sinagungna.

Colossians 2:10

Ḵad gapu si niyossaananyu ḵan Kristu we pangat da losane pangat ya ḵaḻabbongan, naatod da losane awad ḵan diḵayu ta ippun angkuranganyu.

Colossians 2:3

Siya nangigammuwan taḵu'tta losane nililimode laing ya sa somsomoḵ Apudyus.

Colossians 3:16

Ḵad pasigyu oḵyan isisimoḵ mipanggob atta tuttudun Kristu. An-asituttudu ya an-asibagbaga ḵayu we usaronyu da losane ḵinalainge innatodna. Ḵantaonyu da ḵantae naḻpu'tta de Psalm, sa udume nigili'tte Ugud Apudyus ya da udume ḵantan da namati ye andayaw ḵan Apudyus ḵad pasig oḵyane anggappiya ḵayu ḵan Apudyus atta somsomoḵyu.

Colossians 4:12

Aḵ Epaphras ḵad, osae kagrupuwanyu we angipapuute anserbi ḵan Jesu Kristu, pakumustaona bos diḵayu ya ipapatina iluwaḻuwan diḵayu ta pumigsa da pammatiyu, ta adi ḵayu anduwaduwae angunud si pinion Apudyus.

1 Thessalonians 4:6

Ḵasapuḻane ippun oḵyan bumasuḻ ḵan diḵayu baḵon nu angallelaw si sunudna ḵan Kristu mipagapu'tte ḵaḵnae gunay te aaddi ye aḵ Apu bumaḻos atta ngaimane angwa'tte ḵatti. Sana da imbilibilinni ḵan diḵayu.

1 Timothy 3:16

Ḵad iniiggammu taḵu we ampatopatog pinati taḵu mipanggob ḵan Jesu Kristu. Adipun nipaigammu si awe yaḵon impaigammun Apudyus ḵan ditaḵu sinsadi. Nambalin aḵ tagu ya pinanoḵnoḵan ni Ispiritu Santu we siya Abeng Apudyus. Innilan da anghel, niwaḻagawag mipanggob ḵan siya'tta ḵinailin di ili. Namati da tagu'tte lubung ḵan siya woḵ nipangatu'd langit ta madaydayaw.

1 Timothy 3:2

Pun gapu ta ampatog sanae ḵewaaḻ, ḵasapuḻane ippun ḵadellawana, naannad ḵan lamogna tupodon long-agna. Ḵasapuḻane ossaan asawana ya adi maḵadagdagas. Ḵasapuḻane naangsan, ḵamamangili ya nalainge antuttudu.

Hebrews 10:14

Ḵad gapu'tte namingsane nangidatunan Apu Jesus si long-agna, nambalinona'ḵ maun-unan aḵ inggana da tagun Apudyus we pinapoḻḵasna.

Hebrews 13:21

Oḵyan pos ta ittona da ambaḻu we ḵasapuḻanyu ta ḵoonyu da piniona ya ḵoona ḵan ditaḵu da mas-omana mipagapu ḵan Jesu Kristu. Ḵad siya madaydayaw aḵ inggainggana. Amen.

2 Peter 3:15

Sosomḵonyu we sa gapunae naanus Apu taḵu, pionae awad wayan da tagu ta taguwona dida. Sadi da insuḻat Paul we ay-ayaton taḵu we sunud taḵu ḵan Kristu ḵan diḵayu sigun si lainge innatod Apudyus ḵan siya.