2 Timothy 4:17 - Sa Ugud Apudyus

¹⁷ Yaḵon taḵon ay nu ḵatti ḵingwada, adiyaḵpun nan-awidan ḵan Apu. Siya ḵingwana pinapigsana saḵon ta awad inoḵe angiwaḻagawag atte Ambaḻu we Damag ta dongngon da losane Gentil. Sinaḻaḵnibana saḵon atta tagu we pionda gongaton saḵon.

2 Timothy 4:17 ပူးပေါင်းရင်းမြစ်များ

Matthew 10:19

Ḵad nu sumaḻyaonda diḵayu, adi ḵayu ambinsaw mipanggob si inonyu we anaḵdoḻ si mipanggob ḵan saḵon ya sa isongbatyu te sa sadi ye timpu mipaigammu da ustu we ugudonyu.

Luke 1:1

Madaydayawe Theophilus, Adu da tagu we nangipapangoge nangigili'tta losane naḵwa ḵan diḵani'ḵ mituttuwaan da imbagan Apudyus.

Luke 21:15

Te saḵone mismu angitod ḵan diḵayu si laingyu we an-ugud ta ippun inon da losane ḵabusuḻyu we angngog ḵan diḵayu ya sumullagi'tta isongbatyu.

Acts 23:11

Sa sadi ye labi, nampaila'ḵ Apu Jesus ḵan Paul woḵ ḵanana, “Papigsaom somsomoḵnu te ḵasapuḻane taḵdoḻam mipanggob ḵan saḵon ad Rome we isun ni nanaḵdoḻam ḵan saḵon sina'd Jerusalem.”

Acts 9:15

Yaḵon ḵanan Apu ḵan siya, “Inḵa te siya piniliḵe anserbi ḵan saḵon ta umoyna ipaigammu mipanggob ḵan saḵon atta Gentil, da ari ya diḵayu we ganaḵ Israel.

Romans 15:31

Iluwaḻuyu we iligsin Apudyus saḵon atta adipun namati'tte probinsiya'd Judea. Ḵad iluwaḻuyu bos ta awatonaḵ atta tagun Apudyus ad Jerusalem we anserbi ḵan dida sidi.

2 Corinthians 12:9

Yaḵon sa insongbatna ḵan saḵon ḵanana, “Lamog ni ḵinabaḻuḵe bumadang ḵan siḵa'ḵ angan-anusam si sanate ampaḵaḻamam. Te amo mipaila ḵabooḻaḵ nu anḵuyaaḵ.” Pun amod de layadḵu we angiyisḵaḻ si ḵinaḵuyaḵ ta iinggaw ḵabooḻan Kristu ḵan saḵon.

Ephesians 3:8

Taḵon ay nu saḵon ḵababaan atta losane tagun Apudyus, impailana ḵinabaḻuna si nangittana ḵan saḵon atte gundawaye angipaigammu ḵan diḵayu we Gentil atte ippun miyisuwanae bindisyune awad ḵan Kristu.

1 Timothy 1:12

Anggappiyaaḵ ḵan Jesu Kristu we Apu taḵu we amaḵosdoḻ ḵan saḵon. Te imbelangna saḵon aḵ mataḻgodan woḵ dinutuḵana saḵon aḵ anserbi ḵan siya.

2 Timothy 2:1

Ḵan siḵae abengḵu, papigsaom pammatim mipagapu si ḵinabaḻun Jesu Kristu ḵan ditaḵu we niyossaan ḵan siya.

2 Timothy 2:9

Gapu si nangiwaḻagawagaḵ si annae Ambaḻu we Damag, ampaḵaḻamaḵ ya maḵawadanaḵ sina si annae babaḻḻudane isun di pumappatoy. Yaḵon adipun maḵwae maḵawadan Ugud Apudyus.

2 Timothy 3:11

Igammum os da losane naḵwa ḵan saḵon ad Antioch, Iconium ya ad Lystra we ummamdan nampaḵaḻamaḵ. Yaḵon sinaḻaḵnibanaḵ ḵan Apudyus.

2 Timothy 4:5

Yaḵon ḵan siḵa, ḵasapuḻane tupudom long-agnu. Attomam da ampaḵaḻamam. Iggaiggame angiwaḻagawag atte Ambaḻu we Damag ya ummam ḵoon da ḵewaaḻ ni anserbi ḵan Apudyus we sa intaḻgodna ḵan siḵa.

Titus 1:3

Ḵad sa ustu we timpu, impaigammuna'tta tagu mipagapu'tte Ambaḻu we Damag. Ḵad sa sadi ye Ambaḻu we Damag, intaḻgodna ḵan saḵon ta siya iwaḻagawagḵu. Te aḵ Apudyus we nanagu ḵan ditaḵu, siya bos imbilinna ḵan saḵone ḵooḵ.

Hebrews 11:33

Mipagapu si pammatida, illogda da ḵagubatdae sabali ye ili, ustu inondae nampangat ya inawatda inkarin Apudyus, pinaginoḵda da lion ta adida ḵotban dida.

1 Peter 5:8

Ansasaggana ḵayu ḵan an-annad ḵayu. Te sa ḵabusuḻ taḵu we aḵ Satan, andaḵidaḵiwase isun di ngumoḻngoḻngoḻe layone ansingisingit aḵ sokmaḻona.

2 Peter 2:9

Losan da sadi ye naḵwa'tte awe, sadi angigammuwan taḵu we aḵ Apudyus igammunae anagu'tta naapudyusane tagu'tta ampaḵaḻamanda. Ḵad igammuna bose angibaḻud atta tagu ta asida madusa si aḻgawe anguwisana'tta tagu.