2 Corinthians 2:12 - Sa Ugud Apudyus

¹² Dummatongaḵ ḵad ad Troas we umoy angiwaḻagawag si Ambaḻu we Damag mipanggob ḵan Kristu, innatod Apu gundawayḵu we angiwaḻagawag sidi.

2 Corinthians 2:12 ပူးပေါင်းရင်းမြစ်များ

Acts 14:27

Dummatongda ḵad ad Antioch, nandaḵdaḵngonda da losane namati woḵ imbagada da losane ḵingwan Apudyus ḵan dida ya sa inonae nangitod si gundaway da Gentil ta amatida.

Acts 16:11

Pun nambapur ḵani ye naḻpu'd Troas woḵ nangaw-as ḵani'd Samothrace we ili si gawan ni baybay. Mabigat ḵad, ummoy ḵani'd Neapolis.

Acts 16:8

Pun nangoyda'd Mysia woḵ nan-osogda'd Troas.

Acts 20:8

Inggaw da adu we silaw atte ngatu we kuwartun ni nadagupanni.

Romans 1:1

Saḵon aḵ Paul we osa'tta sammilun Jesu Kristu. Pinilin Apudyus saḵon aḵ osa'tta apostolna ya dinutuḵana bos saḵon aḵ umoy angiwaḻagawag si Ambaḻu we Damag we naḻpu ḵan Apudyus.

1 Corinthians 16:9

Te taḵon ay adu bos da sumullagi ḵan saḵon, ad-adu wayaḵe antuttudu te adu da maḻyad andongoḻ.

1 Corinthians 9:12

Pun nu awad ḵaḻabbongan da udume ampabadang ḵan diḵayu, amo sindumallu ḵan diḵani? Yaḵon taḵon ay nu awad ḵaḻabbonganni ye ampabadang ḵan diḵayu, adinipun ipatut te inan-anusanni taḵon ay ngai ampaḵaḻamanni ta ippun matupodan ni Ambaḻu we Damag si mipanggob ḵan Kristu.

1 Corinthians 9:14

Isuna bos bilin Apu we ḵanana, da angiwaḻagawag atte Ambaḻu we Damag ippun udum aḵ maḻpuwan ni iḵataguda nu adi abus ḵewaaḻda.

1 Corinthians 9:16

Te nu iwaḻagawagḵu Ambaḻu we Damag ippun ḵaḻabbongaḵe angiyisḵaḻ. Te naitod ḵan saḵon biyang, pun ḵasapuḻane iwaḻagawagḵu. Ḵad ḵaddaguwaḵ nu adiḵ iwaḻagawag Ambaḻu we Damag.

2 Corinthians 10:14

Te adinipun tinuḻ-ayan biyangni si ummaliyanni ḵan diḵayu te diḵani da ummunae ummoy ḵan diḵayu nangiwaḻagawag si Ambaḻu we Damag si mipanggob ḵan Kristu.

2 Corinthians 11:4

Te nu awad umali sinat aḵ angiwaḻagawag ḵan diḵayu'tte sabali nu sa iwwaḻagawagni ye mipanggob ḵan Jesus, allasu we umapyu ḵayu. Ḵad isuna bose allasu we tumimpuyug ḵayu'tta sabali ye ispiritu ya allasu we unudonyu da sabali ye tuttudu we adipun miyisu'tte Ispiritu Santu ya sa Ambaḻu we Damag we dingngoḻyu ḵan diḵani.

2 Corinthians 11:7

Sa nangiwaḻagawagaḵ ḵan diḵayu si Ambaḻu we Damag we naḻpu ḵan Apudyus, naippun ḵindawḵu'ḵ tangdan te impababaḵ long-agḵu ta midayaw ḵayu. Naḵabasuḻaḵ ḵamman si sadi ye ḵingwaḵ?

2 Corinthians 4:3

Ḵad taḵon ay adimpun da udume tagu maawatan Ambaḻu we Damag we iwaḻagawagni ye isun di natatallingdan, abuse natalingdan atta madusa'ḵ inggana.

2 Corinthians 4:4

Adidapun amati te aḵ Satan we apudyus da tagu si annae lubung si sanae timpu, tatallingdana da somsomoḵda ta adida ilan silawe maḻpu'tte Ambaḻu we Damag mipanggob si ḵinangatun Kristu we ḵais-isun Apudyus.

2 Corinthians 8:18

Ḵad ibuḻunni ḵan Titus osae sunud taḵu ḵan Kristu we madaydayaw atta losane gimung da namati gapu'tte ambaḻu inonae angiwaḻagawag si Ambaḻu we Damag.

2 Corinthians 9:13

Pun gapu'tte sadi ye ḵoonyu we angitod, ipanoḵnoḵna ḵatuttuwaan ni pammatiyu ya paaduwonyu da tagu we angidayaw ḵan Apudyus gapu ta mailadae uunnudonyu Ambaḻu we Damag si mipanggob ḵan Kristu we ibagayu we patiyonyu. Ḵad tuttuwae anggappiyada ḵan Apudyus gapu si laayyu we angitod si ḵasapuḻan da losane namati.

Colossians 4:3

Iluwaḻuwanyu bos diḵani ta itton Apudyus ambaḻu we timpu si angiwaḻagawaganni'tte banage adipun nipaigammu si awe mipanggob ḵan Kristu te sana gapun ni nabaḻudaḵ.

1 Thessalonians 3:2

Ḵad ibuunni'ḵ Timothy ye sunud taḵu ḵan Kristu ta siya umali ḵan diḵayu. Buḻunni ye anserbi ḵan Apudyus we angiwaḻagawag atte Ambaḻu we Damag mipanggob ḵan Kristu. Imbuunni ta papigsaona ya soḻgagona da pammatiyu,