2 Corinthians 13:4 - Sa Ugud Apudyus

⁴ Te taḵon ay nu awad osa'ḵ ḵananae anḵuya'ḵ Kristu atte natoyana'tte kros, matattagu gapu'tte ḵabooḻan Apudyus. Pun isuna bos ḵan diḵani ye isunin anḵuya gapu si niyossaananni ḵan Kristu yaḵon nu mipanggob si ḵoonni ḵan diḵayu, ipailani ḵabooḻanae naḻpu ḵan Apudyus gapu si maḵabuḻbuḻunanni ḵan Kristu atte matattaguwana.

2 Corinthians 13:4 ပူးပေါင်းရင်းမြစ်များ

John 10:18

Naippun paat maḵaaḻa'tte biyagḵu yaḵon sipupusuwaḵe angitod. Anna ḵabooḻaḵe angitod atte biyagḵu ya anna bos ḵabooḻaḵe amauli. Sa imbilin Amaḵ, ḵasapuḻane ḵooḵ.”

Acts 2:36

“Pun ipaigammuḵ ḵan diḵayu we losane ganaḵ Israel we aḵ Jesus we impattoḻyu'tte kros, pinilin Apudyus aḵ Apu ya Kristu.”

Acts 3:16

Mipagapu'tte ḵabooḻan Jesus, pummigsa annae tagu we itotollongyu ya igammuyu. Ḵad gapu si pammatina ḵan Jesus, lummin-awa annae tagu si sinagungyu losan.

Romans 1:4

Nu mipanggob os si ḵinaapudyusna, impailan Apudyus we siya maḵabooḻe Abengna atte ummuliyana. Siya'ḵ Jesu Kristu we Apu taḵu.

Romans 14:9

Te natoy ya ummuli'ḵ Jesu Kristu ta siya an-Apun da matattagu ya da natoy.

Romans 6:4

Pun sa nabonyagan taḵu, nidoga taḵu ḵan Jesu Kristu si natoyana ya nilibonana ta matagu taḵu'tte baru we antatagu we isun ni ummuliyan Jesu Kristu mipagapu'tte nakaskasdaawe ḵabooḻan Apudyus.

1 Corinthians 1:25

Te sa ḵanandae dinodong-og Apudyus nangatu'ḵ adayu nu sa ḵinalaing da tagu ḵad sa ḵanandae ḵinaḵuyan Apudyus naḵosḵosdoḻ aḵ adayu nu sa ḵosdoḻda.

1 Corinthians 15:43

Ḵad sa long-ag taḵu we milibon, lawweng ḵatollongana ḵan naippun ḵabooḻana. Yaḵon sa long-age taguwon Apudyus ḵasin, nabaḻbaḻu ya anna ḵabooḻana.

1 Corinthians 2:3

Sa inninggawaḵ ḵan diḵayu, anḵuya long-agḵu ya amilpilpilaḵ atte ḵimutḵu.

1 Corinthians 6:14

Awad os ḵausaran ni long-ag taḵu si umali ye aḻgaw te aḵ Apudyus taguwona ditaḵu gapu'tte ḵabooḻanae isun ni nanaguwana ḵan Apu.

2 Corinthians 10:10

Awad nin da udum ḵan diḵayu we ḵanandae antuḻodaḵe anuḻat atta pioḵ ibaga ḵan diḵayu yaḵon nu annaaḵ si sinagungyu anḵuyaaḵ ya ippun os anun da ibagaḵ.

2 Corinthians 12:10

Gapu ḵan Kristu, mat-opaḵ atta ḵinaḵuyaḵ, nan-ugudanda saḵon aḵ lawweng, ampaḵaḻamaḵ, ampaḵaḻamonaḵ ya napadasḵu da udume ḵaog-ogyate naḵwa. Te nu ḵumuyaaḵ, amo paḵosdoḻon Kristu saḵon.

2 Corinthians 13:9

Te allaylayad ḵani nu anḵuya ḵani ya anḵosdoḻ ḵayu. Ḵad sa iluwaḻuni ḵan Apudyus, bumaḻubaḻu oḵyan antataguyu ya pumigsa pammatiyu we ippun kurangna.

Philippians 3:10

Pioḵ da sana ta igammuwoḵ aḵ Kristu we ustu ya sa ḵabooḻan ni ummuliyana. Ḵad daḵampun aḵ abus sadi, padasoḵ oḵyan ose ampaḵaḻam ya miyisuwaḵ ḵan siya si natoyana

Hebrews 5:7

Sa inninggawan Jesus si annae lubung, indangsoḻna iyyibile nalluwaḻu ḵan nanḵodaw ḵan Apudyus we ḵallamog anagu ḵan siya si ḵatoy. Pun dingngoḻ Apudyus luwaḻuna te tummuttuwa ya impakumbabana long-agna.

1 Peter 3:18

Te aḵ Kristu, namingpingsane nampaḵaḻam ya natoy gapu'tta basuḻ taḵu. Sa naun-unan, natoy para ḵan ditaḵu we adipun naun-unan ta iyadanina ditaḵu ḵan Apudyus. Gingngatda nainlubungane long-agna yaḵon ummuli ḵad, daguse naispirituwan long-agna.

1 Peter 3:22

Nipauli'ḵ Kristu ad langit woḵ awad si madawinan Apudyus we maḵapangat ḵan siya ya ipangatana da losane anghel ya da udume adipun mailae ḵingwanae awad de saadda ḵan ḵabooḻanda.