2 Corinthians 12:14 - Sa Ugud Apudyus

¹⁴ Naḵasaganaaḵe umali ḵan diḵayu ḵad sana piḵluḵe umali. Ḵad nu umaliyaḵ daḵampun aḵ siya singtoḵ badangyu te daḵampun atta ittonyu gamgamaḵ yaḵon diḵayu we mismu pioḵ. Te saḵon isun di amayu si namatiyanyu ḵad daḵampun atta abeng maḻpuwan ni ḵasapuḻan da ama ḵan ina. Yaḵon da ama ḵan ina maḻpuwan ni ḵasapuḻan da abeng.

2 Corinthians 12:14 ပူးပေါင်းရင်းမြစ်များ

Acts 20:33

Saḵon ḵad, ippun nanḵodawaḵ aḵ pilaḵ, buḻawan baḵon nu silup atta ngaiman ḵan diḵayu.

1 Corinthians 10:24

Daḵampun oḵyan aḵ abus bumaḻuwan taḵu'ḵ somsomḵon taḵu yaḵon sa bumaḻuwan os da udum.

1 Corinthians 10:33

Unudonyu saḵone pasigḵu ibagabagay biyagḵu'tta losane tagu. Te sa singsingtoḵ, daḵampun aḵ bumaḻuwaḵ yaḵon sa bumaḻuwan da adu ta mataguda.

1 Corinthians 11:34

Ḵad nu awad nauḻat, umuna oḵyane angan atte boḻoyna ta magimung ḵayu ḵad adin diḵayu ḵan Apudyus ḵuwison. Ḵad sa mipanggob atta udume ibilinḵu ḵan diḵayu, asiḵ ibaga nu umaliyaḵ sinat.

1 Corinthians 16:5

Sa planuḵ sinsadi angoyaḵ ad Macedonia ta antuttuduwaḵ sidi ḵad asiyaḵot umoy bumisita ḵan diḵayu.

1 Corinthians 4:19

Nu iyunud oḵyan Apudyus, masapaaḵe umali sinat. Ḵad sadi angil-aḵ atta sanate ansoḵaḻ, nu awad ḵabooḻanda baḵon nu abus sungadda'ḵ an-uguugud.

1 Corinthians 9:12

Pun nu awad ḵaḻabbongan da udume ampabadang ḵan diḵayu, amo sindumallu ḵan diḵani? Yaḵon taḵon ay nu awad ḵaḻabbonganni ye ampabadang ḵan diḵayu, adinipun ipatut te inan-anusanni taḵon ay ngai ampaḵaḻamanni ta ippun matupodan ni Ambaḻu we Damag si mipanggob ḵan Kristu.

1 Corinthians 9:18

Pun nu ḵatti, ngai gungunaḵ nu? Annayae abus: Naippun udum nu adi sa layadḵu we angiwaḻagawag si Ambaḻu we Damag we ippun tangdanḵu taḵon ay awad de ḵaḻabbongaḵe pataḻ-un ḵan dida.

1 Corinthians 9:19

Te taḵon ay nu nawayaaḵe daḵanaḵpun aḵ musassu'tta ngaimane tagu, ambalinoḵ long-agḵu'ḵ musassu'tta losane tagu ta lamogḵu awison da adu we tagu ta amatida ḵan Jesu Kristu.

2 Corinthians 1:15

Gapu ta aaddi ye antaḻgod ḵayu ḵan saḵon, simsimmoḵḵu we iyyaḵ unaon diḵayu gaggaḵayon ya asiḵaniyot angaw-as ad Macedonia ḵad angoyaḵ ḵasin sinat nu angulinaḵe maḻpu'd Macedonia ta amigwa amadangaḵ ḵan diḵayu ta masoḻgaganyu ya pioḵ ose ampabadang ḵan diḵayu si sanae ayonaḵ atte probinsiya'd Judea.

2 Corinthians 11:9

Sa inninggawaḵ ḵan diḵayu, adiyaḵpun nanḵodaw ḵan diḵayu si awad de ḵasapuḻaḵ te da susunud ḵan Kristu we naḻpu'd Macedonia da nangitod atta masapuḻḵu. Ḵad ḵatti bos ḵooḵ si umali ye aḻgawe adiḵpun paat ampaḵaḻamon diḵayu'tta masapuḻḵu.

2 Corinthians 12:13

Te da losane ḵingwaḵ atta gimung da namati'tta udume ili, dida bos da ḵingwaḵ ḵan diḵayu. Nu adi abus adiyaḵpun nanḵodaw ḵan diḵayu'tta ḵasapuḻaḵ. Pun nu iḵagasmoḵyu ḵingwaḵe lawweng, ḵodawoḵe pakawanonaḵ.

Galatians 4:19

Gapu ḵan diḵayu ay-ayatoḵe aabeng, ampaḵaḻamaḵ ose isun ni inae anggumut inggana'ḵ awad ḵan diḵayu ugalin Kristu.

Philippians 4:1

Pun diḵayu we susunudḵu ḵan Kristu, ipapatiyu we amati ḵan Apu. Ay-ayatoḵ ya amod ayuḵ ḵan diḵayu te diḵayu da amalayad ḵan saḵon ya diḵayu da isun di gungunaḵ atte ḵewaaḻḵu.

Philippians 4:17

Yaḵon pioḵ ipaigammu ḵan diḵayu we siya singtoḵ madog-an oḵyan gungunayu, daḵampun atte ittonyu.

1 Thessalonians 2:11

Te inigammuyu we binadanganni sin-ossaossa ḵan diḵayu we isun ni ambabadang ni ama'tta abengna.

1 Thessalonians 2:8

Gapu'tte amode ayatni ḵan diḵayu, allaay ḵani ye nangibillay ḵan diḵayu. Ḵad daḵampun aḵ abus Ambaḻu we Damag we naḻpu ḵan Apudyus yaḵon midoga biyagni gapu ta patpatgonni diḵayu.