1 Timothy 5:10 - Sa Ugud Apudyus

¹⁰ Ḵasapuḻan ose da ambaḻu we ḵingwada, nan-asidongoḻ inondae namadaḵoḻ atta abengda, ḵamamangilida ḵan impakumbabada da long-agdae nanserbi'tta tagun Apudyus, binadanganda da ampaḵaḻame tagu ya pummangogdae angwa'tta ngaimane ambaḻu.

1 Timothy 5:10 ပူးပေါင်းရင်းမြစ်များ

Matthew 25:17

Siya bos ḵingwan ni ḵumagwae nitaḻgodan ni duwallibu we palata, pun naḵagalansiya bos aḵ duwallibu we palata.

Matthew 5:16

Isuna bose ḵasapuḻane silawanyu oḵyan da tagu ta ilanda ambaḻu we ḵoonyu ḵad dayawonda'ḵ Amayu'd langit.”

Luke 7:38

Nillumnoḵ ḵad, summiḵad si daḻnig Jesus woḵ ummibil. Nantottodtod luwana inggana'ḵ nas-ob suḵin Jesus. Pun pinunasana'tte buuḵna ḵan inogoḵana bos suḵina woḵ inisigna sadi ye bangbanglu si suḵin Jesus.

Luke 7:44

Nansinagung atte bubai woḵ ḵanana ḵan Simon, “Ilam ḵad annae bubai! Taḵon ay nu ḵoḵoḵḵon taḵu lumnoḵ ḵad ay mangili si boḻoy ya itton taḵu danume amaḻbaḻna si suḵina, naippun nangitod aḵ danum ḵan saḵon sina. Yaḵon sa anna ḵad, binaḻbaḻana suḵiḵ atte luwana woḵ pinunasana'tte buuḵna.

Acts 10:22

Ḵananda, “Aḵ Kapitan Cornelius nangibuun ḵan diḵani'ḵ angayag ḵan siḵa te imbagan ni anghel Apudyus we ayagana siḵa ta dongngona da ibagam. Siya ḵad naun-unan ya isipogna'ḵ Apudyus ya mapatgan atta losane Judyu.”

Acts 22:12

“Inninggaw sidi nangngadan aḵ Ananias we naapudyusane tuttuwaona lintog taḵu ya ambaḻu ḵaugudana'tta losane Judyu we ummili.

Acts 6:3

Susunud ḵan Kristu, pumili ḵayu'ḵ pitu we laḻaḵi ḵan diḵayu we da ambaḻu ugalida ya naittanda si ḵabooḻan ni Ispiritu Santu ya ḵinalaing. Ḵad dida da dutuḵan taḵu'ḵ awwaḻas atta maḵan

Acts 9:36

Ad Joppa inninggaw bubai ye namati ye Tabitha ngadanna. Sa ngadanna'tte Greek we ugud Dorcas, piona ḵanan ugsa. Pasig ambaḻu da ḵoona ya bumabbadang atta ḵapus.

Acts 9:39

Pun nallibbat aḵ Peter woḵ nibuḻun ḵan dida. Dummatongda ḵad, impuyutda'tte ngatu we kuwartu we igaw ni natoy. Sin-iibil da losane baḻu we sisiḵad si daḻnig Peter woḵ ipailada ḵan Peter da langgoyod ya da udume silupe ḵingwan Dorcas si inninggawana ḵan dida.

Romans 12:13

Ḵad badanganyu da tagun Apudyus we anḵasapuḻ ya mangiliyonyu dida.

Ephesians 2:10

Te planun Apudyus we pabaruwon da biyag taḵu mipagapu si niyossaanan taḵu ḵan Jesu Kristu ta siya oḵyan ḵoon taḵu da ambaḻu we implanuna si awe ye ḵoon taḵu.

Colossians 1:10

Te nu ḵatti, maḵwae unudonyu antatagu we mibagay atte ḵinabaḻun Apu ya pasigyu ḵoon da amalayad ḵan siya. Ḵad ambaḻu ibungan da losane ḵoonyu ya madog-an igammuyu mipanggob ḵan Apudyus.

1 Timothy 2:10

Yaḵon sa ambaḻu oḵyane ḵoonda, ipailada pammatida te sadi ustu atta bubai ye angibagae andaydayawda ḵan Apudyus.

1 Timothy 3:2

Pun gapu ta ampatog sanae ḵewaaḻ, ḵasapuḻane ippun ḵadellawana, naannad ḵan lamogna tupodon long-agna. Ḵasapuḻane ossaan asawana ya adi maḵadagdagas. Ḵasapuḻane naangsan, ḵamamangili ya nalainge antuttudu.

1 Timothy 3:7

Ḵasapuḻane ambaḻu ugalina si antotollong da adipun amati ta adi mibabbain ya maḵna si tappoḵ Satan.

1 Timothy 5:16

Nu awad namati'ḵ bubai ye awad sunudna'ḵ baḻu, siya oḵyan angayyuwan ta adi masaliduduwan da namati ye magimugimung. Ta da baḻu we ippun sunudda, dida ayyuwanan ni gimung da namati.

1 Timothy 5:25

Isuna bos da udume tagu, nalawage maila da ambaḻu we ḵoonda yaḵon taḵon ay nu adipun maila sinsadi, adipun os mitataḻu'ḵ inggana.

1 Timothy 6:18

Bilinom os dida ta ḵoonda da adu we ambaḻu we banag ta da adu we ambaḻu we ḵoonda isudan tuttuwae binaḵnang. Allaayda oḵyan ya ibillayanda da buḻunda.

2 Timothy 1:5

Adiḵpun os maliwatan gattoḵe pammatim, isun ni pammatin Lois we apum ya aḵ Eunice we inam ḵad aaddi ye siya annat ḵan siḵa sinsadi.

2 Timothy 2:21

Isuna bos atte tagu, nu awad tagu'ḵ papoḻḵasona long-agna'tta ngaimane lawweng, ampatog angusaran Apu ḵan siya te nitotoḵḵon ya nisaganae anserbi'tta losane panggob Apudyus.

2 Timothy 3:15

Sosomkome inggan ni ḵaban-ognu, inigammum da nigili ye Ugud Apudyus we siya nituttudu ḵan siḵa mipanggob si mataguwan gapu si pammatim ḵan Jesu Kristu.

2 Timothy 3:17

ta ippun angkurangan taḵu we anserbi ḵan Apudyus yaḵon naḵasagana taḵu we angwa'tta losane kalasin di ambaḻu.

Titus 2:14

Siya nangitod si long-agna'ḵ matoy para ḵan ditaḵu ta mapuḵayan taḵu'tta losane ḵabooḻan ni basuḻ ya papoḻḵasona ditaḵu'tta basuḻ taḵu aḵ mitotoḵḵone tagunae sillalaylayade angwa'tta ambaḻu.

Titus 2:7

Siḵa ḵad os, pasig oḵyane ambaḻu ugalim ta sa ḵinabaḻum, siya unudon da buḻunnu. Ilam ta sa antuttuduwam, maḻpu si naimpusuwane ḵasomsomḵam. Ḵad sa inome angibaga, mibagay os atta ampatoge ituttudum.

Titus 3:1

Ipaspasmoḵnu'tta namati sinate ḵasapuḻane paipangatda'tta nangatu da saadda ya da udume anna ḵaḻabbonganda ta tuttuwaonda dida. Ḵad naḵasaganada oḵyane bumadang atta ambaḻu we maḵwa.

Titus 3:14

Ilam os ta paingsaonda da doga taḵu'tte pammati ye angwa'tta ambaḻu ta badanganda da tuttuwae anḵasapuḻ ta ambaḻu ambanagan da biyagda.

Titus 3:8

Tuttuwa da sadi ye imbagaḵ ya matuttuwada oḵyan. Pun pioḵe pagapagatupame antuttudu'tta namati ḵan Apudyus sinat ta ummanda ipapuute angwa'tta ambaḻu. Da sadi ye tuttudu, ambaḻubaḻu ya idaḻanna da losane tagu'tte bumaḻuwanda.

Hebrews 10:24

Sosomḵon taḵu inon taḵu we amapigsa si an-aayat taḵu ḵan ḵoon taḵu da ambaḻu.

Hebrews 13:2

Adiyu maliwatane ammangili'tta mangili ye umali'tte boḻoyyu te inggaw da nammangili'tta ḵaili ye adidapun igammu we anghel da minangilida.

Hebrews 13:21

Oḵyan pos ta ittona da ambaḻu we ḵasapuḻanyu ta ḵoonyu da piniona ya ḵoona ḵan ditaḵu da mas-omana mipagapu ḵan Jesu Kristu. Ḵad siya madaydayaw aḵ inggainggana. Amen.

1 Peter 2:12

Ḵasapuḻane unudonyu ambaḻu we antatagu ta taḵon ay nu ḵanan da adipun amati ye lawweng da ḵoonyu nu ilanda da ambaḻu we ḵoonyu, idayawda'ḵ Apudyus atte umaliyana.

1 Peter 4:9

Ḵad an-asimangili ḵayu oḵyane ippun ngonot.

3 John 1:12

Aḵ Demetrius ḵad, ambaḻu ibagabagan da adu we tagu atte mipanggob ḵan siya ya tuttuwa da sana te maila si antataguna. Panoḵnoḵanni bos mipanggob ḵan siya ya igammume tuttuwa da annae ibagani.