1 Timothy 3:2 - Sa Ugud Apudyus

² Pun gapu ta ampatog sanae ḵewaaḻ, ḵasapuḻane ippun ḵadellawana, naannad ḵan lamogna tupodon long-agna. Ḵasapuḻane ossaan asawana ya adi maḵadagdagas. Ḵasapuḻane naangsan, ḵamamangili ya nalainge antuttudu.

1 Timothy 3:2 ပူးပေါင်းရင်းမြစ်များ

Luke 1:6

Naun-unandae an-asawa'tte antotollong Apudyus ya ippun nangkuranganda si nanuttuwaanda'tta losane lintogna ya sa tuttuduna.

Luke 2:36

Inninggaw os sidi mammad-ane profeta we nangngadan aḵ Anna. Abeng Phanuel we naḻpu'tta ganaḵ Asher. Nangasawa ḵad, pitun tawon woḵ natoy asawana.

Romans 12:13

Ḵad badanganyu da tagun Apudyus we anḵasapuḻ ya mangiliyonyu dida.

Philippians 2:15

ta naippun idellawda ḵan diḵayu we abeng Apudyus ya ambaḻu da losane ugaliyu. Te taḵon ay nu maḵaigaw ḵayu'tta lawweng ya ḵabasbassuḻane tagu si annae lubung, naippun oḵyan angkuranganyu ta miyisu ḵayu'tta bituwone lumanglangḻang silawda'tte labi.

1 Timothy 3:12

Da ambalin aḵ deacon ḵasapuḻane ossaan asawana ya adipun maḵadagdagas ḵan igammunae angidaḻane ustu'tta abengna ya sa baḻyanna.

1 Timothy 3:8

Isun da deacon, ḵasapuḻane labbongdae mapatgan ḵan maun-unan an-uugudda. Ḵasapuḻan ose adida bartekero baḵon nu ḵamommod si pilaḵ.

1 Timothy 4:3

Da sanae tagu, iyadida da angasawa ya da udume maḵan. Yaḵon sa ḵatuttuwaan, ḵingwan Apudyus da sanae maḵan ta ḵanon taḵu. Ditaḵu we namati ḵan Kristu ya angigammu si ḵatuttuwaan, anggappiya taḵu ta maḵwae ḵanon taḵu da ngaimane maḵan.

1 Timothy 5:10

Ḵasapuḻan ose da ambaḻu we ḵingwada, nan-asidongoḻ inondae namadaḵoḻ atta abengda, ḵamamangilida ḵan impakumbabada da long-agdae nanserbi'tta tagun Apudyus, binadanganda da ampaḵaḻame tagu ya pummangogdae angwa'tta ngaimane ambaḻu.

1 Timothy 5:22

Adim oḵyan ḵamḵammuwone andutuḵ atte ngaimane mabigbige angipangpangu'tta namati. Te nu maigammuwane naḵabasuḻ sadi ye tagu, madusaḵa'tte basuḻna. Ummam ta adiḵa maḵabasuḻ.

1 Timothy 5:9

Ḵad da baḻu we midoga si listaanyu, ḵasapuḻane lumabos aḵ onompuḻu tawonda ya ḵasapuḻane namingsan nangasawa ya adipun naḵadagdagas.

2 Timothy 2:24

Ḵad sa anserbi ḵan Apu, ḵasapuḻane adipun oḵyan maḵasubog yaḵon ḵasapuḻane nalaing, naanus atta losan ya ḵabooḻanae antuttudu,

Titus 2:2

Da anḵamaḻong-ag ḵad, ummam dida bagbagaan ta noandae uminum si bayas ya da udume ḵoḵoḵḵonda ta mibagaye mapatganda gapu'tta ambaḻu we ugalida ya tupodonda da long-agda. Bagbagaam os dida ta ipapatida pammatida, sipupusu oḵyan ayatda ya naattomda.

Hebrews 13:2

Adiyu maliwatane ammangili'tta mangili ye umali'tte boḻoyyu te inggaw da nammangili'tta ḵaili ye adidapun igammu we anghel da minangilida.

Hebrews 3:14

Te buḻun taḵu'ḵ Kristu nu gogomgoman taḵu pammati taḵu si inggan ni namatiyan taḵu inggana si anungus ni timpu.

1 Peter 4:7

Madam-an anungus da losane banag, pun ḵasapuḻane ansomsomoḵ ḵayu we ustu ya tupodonyu da long-agyu ta ambaḻu alluwaḻuwanyu.

1 Peter 4:9

Ḵad an-asimangili ḵayu oḵyane ippun ngonot.

1 Peter 5:8

Ansasaggana ḵayu ḵan an-annad ḵayu. Te sa ḵabusuḻ taḵu we aḵ Satan, andaḵidaḵiwase isun di ngumoḻngoḻngoḻe layone ansingisingit aḵ sokmaḻona.