1 Timothy 3:15 - Sa Ugud Apudyus

¹⁵ Nu mataḵtaḵaḵ, igammuwom da inon ni antatagun da tagu we nidoga si baḻyan Apudyus. Ditaḵu we namati si matattagu we Apudyus nangitaḻgodana si tuttuwae tuttudu ta ilan taḵu we mituttudu we ustu ya adipun mapasantan.

1 Timothy 3:15 ပူးပေါင်းရင်းမြစ်များ

Matthew 16:16

Ḵanan Simon Peter, “Siḵa Kristu we Abeng ni matattagu we Apudyus.”

Matthew 18:18

Ibagaḵ ḵan diḵayu ḵatuttuwaan, ngaimane iyadiyu sina'd luta, iyadin os Apudyus ad langit. Ḵad ngaimane iyunudyu sina'd luta, iyunud os Apudyus ad langit.

John 1:17

Innatod Apudyus lintog mipagapu ḵan Moses yaḵon mipagapu ḵan Jesu Kristu we pinilin Apudyus aḵ Anagu ya An-ari, impailana ḵinabaḻu ḵan ḵatuttuwaan mipanggob ḵan siya.

John 14:6

Ḵanan Jesus, “Saḵon daḻan, ḵatuttuwaan ḵan biyag. Naippun maḵaoy ḵan Amaḵ nu adi angoy ḵan saḵon.

John 18:37

Ḵanan os Pilate, “Pun siḵa Ari?” Summongbat aḵ Jesus woḵ ḵanana, “Tuttuwa sadi ye ḵanam. Te niyanaḵaḵ ya ummaliyaḵ si annae lubung ta taḵdoḻaḵ ḵatuttuwaan. Ḵad da ngaimane angipatog atte ḵatuttuwaan, tuttuwaonda da ibagaḵ.”

John 6:69

Namati ḵani ḵan iniiggammuni ye siḵa nasantuwane imbuun Apudyus.”

Acts 1:2

inggana si aḻgawe nipangatuwana'd langit. Yaḵon sa daanna mipangatuwan ad langit, innatodna bilinna mipagapu'tte Ispiritu Santu atta apostol we pinilina.

Acts 14:15

“Susunud, ngaipayu ḵoon ḵaḵnat? Tagu ḵani bose isuyu. Ummali ḵani sina ta iwaḻagawagni ḵan diḵayu Ambaḻu we Damag ta an-awidanyu da annae ippun anudae sinan-apudyus ta amati ḵayu ḵan Apudyus we matattagu we nangwa si langit, luta, baybay ya da losane awad.

Romans 3:2

Sa ḵatuttuwaan, ampatog tagu we mibelang aḵ Judyu. Sa umuna, ditaḵu nangitaḻgodan Apudyus si nigili ye ugudna.

Romans 9:26

“Sa sadi ye lugar we nangibag-aḵe daḵampun aḵ taguḵ diḵayu, sanat os lugar we maawaganda'ḵ abeng ni matattagu we Apudyus.”

1 Corinthians 10:32

Ḵad ummanyu ta adiyu ḵoon bumasuḻan da udum taḵon ay da Judyu baḵon nu Gentil baḵon nu da magimugimunge namati ḵan Apudyus.

1 Corinthians 3:16

Adiyupun ḵamman igammu we diḵayu templo we boḻoy Apudyus gapu'tte Ispiritunae iinggaw ḵan diḵayu?

2 Corinthians 3:3

Ipailayu si antataguyu we diḵayu isun di suḻate inggilin Kristu mipagapu ḵan diḵani. Ḵad daḵampun aḵ lapis inusar ni nangigili yaḵon sa Ispiritun ni matattagu we Apudyus. Ḵad daḵampun aḵ batu nigiliyana yaḵon da pusuyu.

2 Corinthians 6:16

Ḵad maḵwa ḵamman antitimpuyug da templon Apudyus atta sinan-apudyus? Ditaḵu templo we boḻoy Apudyus we iinggawan ni matattagu we Apudyus. Te ḵanan Apudyus, “Iyyaḵ inggaw atta tagu ya iinggawaḵ ḵan dida ya saḵon Apudyusda ya dida da taguḵ.”

2 Corinthians 6:7

Ḵad mipaila bos gapu'tte angituttuduwanni si ḵatuttuwaan ḵan ḵabooḻan Apudyus we ipailana mipagapu ḵan diḵani. Anna ḵan diḵani naun-unane antatagu gapu ḵan Kristu, siya isun di ispada ḵan ḵaḻasage usaronni ye maḵagubat atta bumusuḻ ḵan Apudyus.

Galatians 2:9

Binigbig da James ḵan Peter ya aḵ John we mibelange angipangpangu we intaḻgod Apudyus ḵan saḵon annae ḵewaaḻ gapu'tte ḵinabaḻuna. Sana gapunae nilamanuwanda'ḵ Barnabas ya saḵon ta angipaila si ambuḻbuḻunanni. Nan-uunudanni ye iwaḻagawagni Ambaḻu we Damag atta Gentil ya dida angiwaḻagawag atta Judyu.

Galatians 3:1

Nadongdong-ogan ḵayu we iGalatia! Ngai ḵad ain da nangallelaw ḵan diḵayu? Nalawag ḵad ose nipaila ḵan diḵayu we nipattoḻ aḵ Jesu Kristu atte kros!

Ephesians 4:21

te dingngoḻyu mipanggob ḵan siya ya nituttudu ḵan diḵayu ḵatuttuwaane maḻpu ḵan Jesu Kristu.

Colossians 1:5

Ḵaḵnat te namnamaonyu we awad de inggagappot Apudyus ad langite para ḵan diḵayu. Dingngoḻyu'tte awe mipanggob si anna si nangngoḻanyu'tte ugude ḵatuttuwaane siya Ambaḻu we Damag.

1 Thessalonians 1:9

On didae mismu nangug-uggud atte inonyu we nammangili ḵan diḵani ya sa inonyu bose nangiyagaye amati'tta sinan-apudyus woḵ ansagung ḵayu anserbi'tte tuttuwa ḵan matattagu we Apudyus.

1 Timothy 3:14

Namnamaoḵe masapaaḵ umali sinat yaḵon isuḻatḵu da annae bilin ḵan diḵayu.

1 Timothy 3:16

Ḵad iniiggammu taḵu we ampatopatog pinati taḵu mipanggob ḵan Jesu Kristu. Adipun nipaigammu si awe yaḵon impaigammun Apudyus ḵan ditaḵu sinsadi. Nambalin aḵ tagu ya pinanoḵnoḵan ni Ispiritu Santu we siya Abeng Apudyus. Innilan da anghel, niwaḻagawag mipanggob ḵan siya'tta ḵinailin di ili. Namati da tagu'tte lubung ḵan siya woḵ nipangatu'd langit ta madaydayaw.

1 Timothy 3:2

Pun gapu ta ampatog sanae ḵewaaḻ, ḵasapuḻane ippun ḵadellawana, naannad ḵan lamogna tupodon long-agna. Ḵasapuḻane ossaan asawana ya adi maḵadagdagas. Ḵasapuḻane naangsan, ḵamamangili ya nalainge antuttudu.

1 Timothy 3:5

Te nu adinapun igammu we angidaḻan atte baḻyanna, ngai inonae angayyuwan atta namati ye magimugimung ḵan Apudyus?

1 Timothy 4:10

Siya gapunae igga taḵu ḵabooḻan taḵu te sadi namnamaon taḵu ḵan Apudyus we matattagu we anagu'tta losane tagu, dallu gay ditaḵu we namati.

1 Timothy 6:16

Ḵad adipun paat matoy ya ippun tagu'ḵ maḵaadani ḵan siya te ummamdan silingna. Naippun paat tagu'ḵ nangila baḵon nu maḵaila ḵan siya. Madaydayaw oḵyan ya siya ampangat aḵ inggainggana. Amen.

2 Timothy 2:19

Yaḵon taḵon ay nu awad da isudae angituttudu si tinutuli, adipun paat mabaliwan tuttuwae Ugud Apudyus te isun di ampagdot nisaadanae tinaḵad Apudyus we adipun paat magitot. Awad de nigili ye ḵanana, “Igammun Apudyus da tagu we ḵuwana.” Sa osa bose nigili si awe, ḵanana, “Nu ngai ḵananae namati ḵan Apu, ḵasapuḻane an-awidana da lawweng.”

2 Timothy 2:20

Awatna, sa daḵoḻe boḻoy ni baḵnang. Wadawad da kalasin di palatu we ḵaḵaḵḵanan. Awad da buḻawan ḵan silver ḵopyadae ampatog mausaranda. Awad os da ḵayu ḵan nadiwine luta ḵopyadae mausar atte baḻangna.

Hebrews 10:21

Awad de ḵangatuwane padi taḵu we angayyuwan ḵan ditaḵu we tagun Apudyus.

Hebrews 12:22

Yaḵon ummadani ḵani si beleg Zion ya sa siyudad ni matattagu we Apudyus ya sa baru we Jerusalem we awad ad langite madagudagupan da ḵalibulibu we anghel we andayaw ḵan siya.

Hebrews 3:12

Susunudḵu ḵan Kristu, ummanyu ta ippun ambalin aḵ lawweng ḵan diḵayu ya adipun namati ta adiyu an-awidan matattagu we Apudyus.

Hebrews 9:14

Sindumallu we pummoḻḵas taḵu si daḻan Kristu si nangidatunana si long-agna mipagapu'tte annanayune Ispiritu Santu. Ippun basuḻna ya mipagapu'tte natoyana pummoḻḵas somsomoḵ taḵu'tta ippun anunae ḵoon taḵu ta anserbi taḵu si matattagu we Apudyus.

1 Peter 2:5

Gapu si umadaniyanyu ḵan Jesu Kristu, mipani ḵayu bos si matattagu we batu we mausar si antaḵadan atte boḻoye ḵuwan Apudyus aḵ anserbiyanyu we papadi ye nitotoḵḵon para ḵan siya ya idatunyu da datun para ḵan siyae abuse mas-omana mipagapu ḵan Jesu Kristu.

1 Peter 4:17

Te dumatong timpu we anguwisan Apudyus atta losane tagu ḵad isaḻadna ḵan ditaḵu we tagun Apudyus. Ḵad nu isaḻadna ḵan ditaḵu we anḵuwis, ngai maḵwa'tta adipun tumuttuwa gapu si adidapun amatiyan si Ambaḻu we Damag we naḻpu ḵan Apudyus?

Revelation 7:2

Pun innilaḵ osae anghel we ngumatungatu we naḻpu'tte dumingitan inite oonnana maḻḵae ḵuwan ni matattagu we Apudyus. Pinoḵawana da opate buḻunnae anghel we innattan Apudyus aḵ ḵaḻabbongane anadail si luta ḵan baybay,