1 Timothy 3:1 - Sa Ugud Apudyus

¹ Tuttuwa sanae ugud: Nu awad osa'ḵ piona ambalin aḵ angipangpangu'tta namati, ampatoge ḵewaaḻ gamgamana.

1 Timothy 3:1 ပူးပေါင်းရင်းမြစ်များ

Luke 15:10

Ḵanan Jesus we nangiyanungus, “Annaya ibagaḵ ḵan diḵayu, ḵatti bos gangganas ni bubai si nangdasana si nataḻaḵe palatana, anggangganas aḵ Apudyus ya da anghelna nu awad ambabawi'tta basuḻna ya agaynae angwa taḵon ay ossaane ḵabasbassuḻan.”

Acts 1:20

Pinagatupan Peter woḵ ḵanana, “Sa inggilin Ari David atte iblu we Psalm, ḵanana, “ ‘Mabaawan oḵyan boḻoyna ya ippun umoy inggaw’ ya ‘awad oḵyan osa'ḵ mipasani si saadna.’ ”

Acts 20:28

“Pun ummanyu ayyuwanan da long-agyu ya da losane tagu we ipaayyuwan ni Ispiritu Santu ḵan diḵayu te sanat biyangyu we angipangpangu. Ayyuwananyu we ustu da magimugimunge namati ḵan Apudyus te sinubutna dida si daḻan ni mismu we abengna.

Romans 11:13

Sinsadi awad de ibagaḵ ḵan diḵayu we Gentil. Gapu ta dinutuḵan Apudyus saḵon aḵ an-apostolna'tta Gentil, ipatpatogḵu annae ḵewaaḻe nitaḻgod ḵan saḵon

Ephesians 4:12

Ḵingwana ḵatti ta ansagana taḵu we tagun Apudyus we anserbi ḵan Kristu ta pumigsa taḵu we isun di long-agna,

Philippians 1:1

Diḵani ḵan da Paul ya aḵ Timothy ye anserbi ḵan Jesu Kristu. Annaya suḻatni ḵan diḵayu losan sinat ad Philippi we tagun Apudyus gapu si niyossaananyu ḵan Jesu Kristu, midoga da angipangpangu ḵan diḵayu ya da deacon.

1 Thessalonians 5:14

Bilibilinonni bos diḵayu susunudḵu ḵan Kristu ta bagbagaanyu da baduuḻ, soḻgagonyu da allasu we madismaya, badanganyu da anḵuya pammatida ya anusanyu dida losan.

1 Timothy 1:15

Sana tuttuwae tuttudu ya labbongnae patiyon da losane tagu: Ummali'ḵ Jesu Kristu atte lubung ta taguwona da ḵabasbassuḻan. Saḵon ḵapaatan ḵan dida.

1 Timothy 4:9

Tuttuwa annae imbagaḵ ya ḵaḻabbonganae matuttuwa.

2 Timothy 2:11

Tuttuwa uuggudone ḵanana, “Nu naḵaḵatoy taḵu ḵan Jesu Kristu, midoga taḵu matagu ḵan siya.

Titus 1:7

Sa gapuna oḵyane ambaḻu ugalina ippun mipabasuḻ ḵan siya. Siya angipangpangu'tte gimunge nitaḻgodan ni ḵewaaḻ Apudyus. Pun ḵasapuḻane adi ampasindayaw, adi allasu sumang-ana ya adi pasig mabartek. Adipun oḵyan os gumuggulu ya adipun ḵamommod atte pilaḵ.

Titus 3:8

Tuttuwa da sadi ye imbagaḵ ya matuttuwada oḵyan. Pun pioḵe pagapagatupame antuttudu'tta namati ḵan Apudyus sinat ta ummanda ipapuute angwa'tta ambaḻu. Da sadi ye tuttudu, ambaḻubaḻu ya idaḻanna da losane tagu'tte bumaḻuwanda.

Hebrews 12:15

Ḵasapuḻane ilanyu ta naippun oḵyan osa ḵan diḵayu'ḵ an-awidana ḵinabaḻun Apudyus gapu'tte angiyagayanae amati ḵan siya. Te ngaimane angwa ḵan diḵayu'tte ḵaḵnat isuna ampaite muḻae tumubu'ḵ madadailan da adu.

1 Peter 2:25

Te sa awe, nalimu taḵu we isun da karnero yaḵon sinsadi annae nipauli taḵu ḵan Kristu we angaayyuwan atta ḵalidodwa taḵu.

1 Peter 4:15

Yaḵon nu ampaḵaḻam ḵayu, daḵampun oḵyan aḵ gapu si pummatoyanyu, nan-aḵawanyu, nangwaanyu si lawweng baḵon nu maḵabiyanganyu'tte ḵoon da buḻunyu.

1 Peter 5:2

Annaya da bilinḵu ḵan diḵayu. Ummanyu ayyuwanan da tagun Apudyus we intaḻgodna ḵan diḵayu we isudan karnero. Adi ḵayu oḵyan mapattupattut yaḵon allaylayad ḵayu oḵyane angayyuwan ḵan dida te sadi pinion Apudyus. Ḵoonyu ḵewaaḻyu we daḵampun aḵ gapu si angamgamanyu si pilaḵ yaḵon gapu si ayatyu we anserbi ḵan Apudyus ya da buḻunyu.