1 Thessalonians 5:12 - Sa Ugud Apudyus

¹² Ḵodawonni ḵan diḵayu susunudḵu ḵan Kristu ta patganyu da angipapati antuttudu, da angipangat, da angayyuwan ya da amagbaga ḵan diḵayu ta pumigsa ḵayu'tte pammati ḵan Apu.

1 Thessalonians 5:12 ပူးပေါင်းရင်းမြစ်များ

Luke 10:7

Nu awad ammangili ḵan diḵayu, inggaw ḵayu si boḻoyda inggana'ḵ tenanyu sadi ye ili. Adi ḵayu an-attuattun. Ḵanonyu ḵan inumonyu da ilusnuda te labbongnae matangdanan da anḵewaaḻ.

John 4:38

Te ibuunḵu diḵayu'ḵ umoy an-ani'tte adiyupun inayong. Maḵḵon da nanḵewaaḻ ya diḵayu angaaw atta inayongda.”

Acts 20:28

“Pun ummanyu ayyuwanan da long-agyu ya da losane tagu we ipaayyuwan ni Ispiritu Santu ḵan diḵayu te sanat biyangyu we angipangpangu. Ayyuwananyu we ustu da magimugimunge namati ḵan Apudyus te sinubutna dida si daḻan ni mismu we abengna.

Acts 20:35

Sana pasigḵu ḵingwa ta awad unudonyu te ḵasapuḻane pumangog taḵu we anḵewaaḻ ta awad ibadang atta anḵasapuḻ, sosomḵonyu imbagan Apu Jesus we ḵanana, ‘Amo pian angitod nu sa an-awat.’ ”

Romans 16:12

Pakumustaonyu da Tryphaena ḵan Tryphosa we anserbi ḵan Apu Jesus, isuna bos ḵan Persis we ay-ayatoḵe pummangog nanserbi ḵan Apu.

Romans 16:6

Ḵad idogayu'ḵ Mary ye pummangoge nanḵewaaḻ para ḵan diḵayu.

1 Corinthians 12:28

Ḵad da dinutuḵan Apudyus atte gimung da namati, ummuna da apostol, ḵumagwa da profeta we an-uuggudona, ḵumaḵlu da angituttudu'tte ugudna, asiyot da angwa'tta nakaskasdaaw, da naittan aḵ ḵabooḻane angaan atta saḵit. Awad os da naittan aḵ ḵabooḻane bumadang ya da naittan aḵ ḵabooḻane angipangpangu'tta namati. Ḵad awad os da naittan aḵ ḵabooḻane an-ugud atta nansabasabali ye ugude adidapun inadaḻ.

1 Corinthians 15:10

Yaḵon gapu'tte ḵinabaḻun Apudyus ḵan saḵon, binaliwanaḵ atte nambalinaḵ sinsadi, daḵampun aḵ ippun nambanagana. Sa naḵwa, nadaldallu pawotḵu we nanḵewaaḻ nu da udume apostol. Yaḵon daḵampun aḵ ḵingwaḵ da sadi gapu'tte mismu we ḵosdoḻḵu yaḵon gapu'tte ḵinabaḻun Apudyus we anna ḵan saḵon.

1 Corinthians 16:16

Patganyu oḵyan da tagu we ḵassadi ḵad taḵon ay os da losane maḵaḵewaaḻ ḵan maḵaserbi ḵan dida.

1 Corinthians 16:18

Te sinoḻgagda somsomoḵḵu ya isuna bose sinoḻgagda da somsomoḵyu. Labbongnae mabigbig da tagu we ḵaḵna.

1 Corinthians 3:9

Te diḵani ḵan Apollos an-asibadang ḵani ye angwa'tta paḵwan Apudyus. Ḵad diḵayu isun di payawe ḵewaaḻonni. Ipaniḵ os diḵayu si boḻoye taḵadon Apudyus.

2 Corinthians 11:23

Ḵad nu ḵanandae anserbida ḵan Kristu, amo nabaḻbaḻu anseserbiḵ ḵan siya nu dida. Isuḵ nin nadongdong-ogane angibaga'tta ḵassana! Amo nasigab ḵewaaḻḵu nu dida, adu timpu we nibaḻudaḵ, naap-aplitaḵ ya adu naamusanaḵ si ḵatoy gapu'tte anserbiyaḵ ḵan Kristu.

2 Corinthians 5:9

Pun taḵon ay nu inggaw taḵu'd luta baḵon nu ad langit, igga taḵu ḵabooḻan taḵu we angwa'tta mas-oman Apudyus.

2 Corinthians 6:1

Pun diḵani ye maḵaḵewaaḻ ḵan Apudyus, ḵodawonni ḵan diḵayu ta sa ḵinabaḻun Apudyus we inawatyu, awad oḵyan ustu'ḵ ambanagana si antataguyu.

Galatians 4:11

Pun iyogyatḵu mipanggob ḵan diḵayu te ippun nin anun ni pangogḵu we nantuttudu ḵan diḵayu.

Philippians 2:16

Ḵad popotpotanyu Ugud Apudyus we angitod si biyag aḵ inggana. Te nu ḵoonyu da sadi, diḵayu da isḵaḻḵu si ḵasine umaliyan Kristu. Igammuḵ ose adipun natangga pangogḵu we nanḵewaaḻ.

Philippians 2:19

Nu iyunud Apu Jesus, namnamaoḵe adipun manunnuwan ya ibuunku'ḵ Timothy ḵan diḵayu ta mipauli ḵad ya ug-uggudona mipanggob ḵan diḵayu, lumayadaḵ ya lumayad ḵayu bos.

Colossians 1:29

Iggaḵ losane ḵabooḻaḵ ta mituttuwa da sana'tte angusaraḵ si ampigsae ḵabooḻane innatod Kristu ḵan saḵon.

1 Thessalonians 2:9

Susunudḵu ḵan Kristu, aaddi ye adiyupun naliwatan inonni ye pummangog ta adi ḵani ambalin aḵ problema ḵan diḵayu. Aḻgaw ḵan labi ye antuttudu ḵani ya anḵewaaḻ ḵani si inninggawanni sinate nangiwaḻagawag atte Ambaḻu we Damag we naḻpu ḵan Apudyus.

1 Thessalonians 4:1

Sinsadi susunudḵu ḵan Kristu, ibagani inonyu we matagu we mas-oman Apudyus. Ḵad siya annate ḵoonyu yaḵon mipagapu'tte ngadan Apu Jesus, ḵodawonni ḵasin ḵan diḵayu ta amo ipapatiyu oḵyane angwa.

1 Thessalonians 5:14

Bilibilinonni bos diḵayu susunudḵu ḵan Kristu ta bagbagaanyu da baduuḻ, soḻgagonyu da allasu we madismaya, badanganyu da anḵuya pammatida ya anusanyu dida losan.

1 Timothy 5:1

Adim suppaḵan da naḻaḵlaḵay nu siḵa yaḵon ummam bagbagaan didae isun ni angwam atte amam. Ḵad ibelangnu da babaḻu we isun di sinusunnudnu.

1 Timothy 5:20

Yaḵon nu pagapagatupan ni angipangpangu we maḵabasuḻ, suppaḵam si sinagung ni gimung ta umogyat da udume angwa'tte ḵingwana.

2 Timothy 2:6

Annaya bos osae mipaniyana. Sa ampangoge anḵewaaḻ si uma, siya umuna an-apit atta bungan da immuḻana.

Titus 1:3

Ḵad sa ustu we timpu, impaigammuna'tta tagu mipagapu'tte Ambaḻu we Damag. Ḵad sa sadi ye Ambaḻu we Damag, intaḻgodna ḵan saḵon ta siya iwaḻagawagḵu. Te aḵ Apudyus we nanagu ḵan ditaḵu, siya bos imbilinna ḵan saḵone ḵooḵ.

Titus 1:5

Sa gapun ni nanenaḵ ḵan siḵa'd Crete, uḻnusom yan da daampun miyuḻnus ya dutuḵam da angipangpangu'tta gimung atta losane ili. Sosomḵom da imbilinḵu.

Titus 2:15

Sana da ituttudum atta tagu sinat, dam-om dida bagbagaan ya suppaḵam nu awad lawweng aḵ ḵoonda. Sa angwaam atta sadi, ipailam da losane ḵaḻabbongam ta adida siḵa potogon.

Hebrews 13:17

Tuttuwaonyu da angipangpangu ḵan diḵayu ya unudonyu da bilinda te dida angayyuwan ḵan diḵayu ta sissiyae ampigsa pammatiyu te ḵasapuḻane songbatanda ḵan Apudyus nu ḵingwada da ḵewaaḻda. Tuttuwaonyu dida ta maganasandae angwa'tta ḵewaaḻda. Nu adiyu dida tuttuwaon, andadauyda ya naippun ittona'ḵ bumaḻuwanyu.

Hebrews 13:7

Iḵagasmoḵyu da ummun-unae nangipangate nangituttudu ḵan diḵayu si Ugud Apudyus. Sosomḵonyu nambanagan ni nantataguda ya inunudyu pammatida.

Revelation 1:20

Ḵaḵna nitataḻu we ḵapaoyan da pitu we bituwone innilam atte madawinane imaḵ ya da pitu we buḻawane sasap-aḻan da silaw. Da pitu we bituwon, dida da anghel we angayyuwan atta pitu we gimung da namati. Da pitu ḵade buḻawane sasap-aḻan da silaw, dida da pitu we gimung da namati.”

Revelation 2:12

Ḵanana bos, “Annaya isuḻatnu'tte anghel we angayyuwan atta namati ye magimugimung ad Pergamum, ‘Saḵon aangdon si antadome ispadae nansupang ngaḻabna. Annaya ibagaḵ ḵan diḵayu.

Revelation 2:18

Ḵanana bos, “Annaya isuḻatnu'tte anghel we angayyuwan atta namati ye magimugimung ad Thyatira, ‘Saḵon Abeng Apudyus we isunan gumilgillayabe apuy atana ya isunan sumelape gambang da suḵina. Annaya ibagaḵ ḵan diḵayu.

Revelation 2:3

Igammuḵ ḵinaanusyu we angiyattom atta ampaḵaḻamanyu gapu ḵan saḵon ya adiḵayupun maayong.

Revelation 2:8

Ḵanana bos, “Annaya isuḻatnu'tte anghel we angayyuwan atta namati ye magimugimung ad Smyrna, ‘Saḵon ummuna ḵan anguddidi. Saḵon os natoy woḵ ummuli. Annaya ibagaḵ ḵan diḵayu.

Revelation 3:1

Ḵanana bos, “Annaya isuḻatnu'tte anghel we angayyuwan atta namati ye magimugimung ad Sardis, ‘Saḵon aangdon atta pitu we Ispiritu Santu ya da pitu we bituwon. Annaya ibagaḵ ḵan diḵayu. Igammuḵ da ḵooḵoonyu, igammuḵe sa antotollong da tagu, ampigsa da pammatiyu yaḵon sa ḵatuttuwaan, natoy da pammatiyu.

Revelation 3:14

Ḵanana bos, “Annaya isuḻatnu'tte anghel we angayyuwan atta namati ye magimugimung ad Laodicea, ‘Saḵon nangadanan aḵ Amen te saḵon mataḻgodan ya tuttuwae anaḵdoḻ. Ḵad Saḵon os laplapun da losane ḵingwan Apudyus. Annaya ibagaḵ ḵan diḵayu.

Revelation 3:7

Ḵanana bos, “Annaya isuḻatnu'tte anghel we angayyuwan atta namati ye magimugimung ad Philadelphia, ‘Saḵon abus aḵ gattoḵe nasantuwan ḵan ḵatuttuwaan. Saḵon aangdon si tuḻbiḵ Ari David we piona ḵanan, sa ḵaḻabbongan atte ampangatan Apudyus. Ngaimane iyunudḵu we lumnoḵ atte ampangataḵ, naippun maḵatupod. Ḵad ngaimane adiḵpun iyunud, tuttuwae adipun maḵaḻnoḵ! Annaya ibagaḵ ḵan diḵayu.