1 Thessalonians 2:4 - Sa Ugud Apudyus

⁴ Yaḵon pinanoḵnoḵan Apudyus woḵ intaḻgodna ḵan diḵani angiwaḻagawag atte Ambaḻu we Damag woḵ siya ḵingwani. Ḵad daḵampun atta tagu pappadasonni pas-oman yaḵon aḵ Apudyus we angigammu nu ngai awad atte somsomoḵni.

1 Thessalonians 2:4 ပူးပေါင်းရင်းမြစ်များ

Luke 12:42

Summongbat aḵ Jesus woḵ ḵananae nangipani, “Sa mataḻgodan ḵan nalainge sammilu, siya dinutuḵan ni apuna'ḵ angayyuwan atta doganae sammilu. Siya angitod si ḵanon da buḻunna si ustu we timpu.

Luke 16:11

Ḵad nu adi ḵayu mataḻgodane angdon atta ḵinabaḵnang si lubung, ngai bos inonae mitaḻgod ḵan diḵayu tuttuwae ḵinabaḵnang?

John 21:17

Pun impiḵlun Jesus ḵanan ḵan siya, “Simon we abeng John, ay-ayatom pagay saḵon?” Pun nasuḻsuḻdung aḵ Peter te piḵlunae nangimus ḵan siya we ḵanana, “Ay-ayatom pagay saḵon?” Ḵanan Peter, “Apu, igammum da losan. Ḵad igammume ay-ayatoḵ siḵa.” Ḵanan Jesus ḵasin, “Ayyuwanam da karneroḵ.

Romans 8:27

Ḵad aḵ Apudyus we angigammu'tta somsomoḵ taḵu, igammuna bos ḵasomsomḵan ni Ispirituna te sa iluwaḻuna para ḵan ditaḵu we taguna, sigun si pinion Apudyus.

1 Corinthians 7:25

Sa mipanggob atta daampun angasawa, naippun bilinḵu ḵan diḵayu'ḵ naḻpu ḵan Apu. Yaḵon ibagaḵ ḵasomsomḵaḵ te mataḻgodanaḵ mipagapu'tte ḵadaguna ḵan saḵon.

1 Corinthians 9:17

Te nu saḵon namili si annae ḵewaaḻḵu, awad de ḵaḻabbongaḵe matangdanan. Yaḵon gapu ta intaḻgod Apudyus ḵan saḵon, ḵooḵ da piona paḵwa taḵon ay nu ippun tangdanḵu.

2 Corinthians 2:17

Yaḵon ḵan diḵani, daḵampun aḵ isuni da adu we nantuttududa'tte Ugud Apudyus ta angaḻ-anda'ḵ mabalinda. Te imbuun Apudyus diḵani ya abus aḵ ugudonni ḵatuttuwaan atte sinagungna si niyossaananni ḵan Kristu.

2 Corinthians 4:2

Nan-awidanni da losane ḵoḵoḵḵon da tagu we nililimod ḵan ḵababbain ya ippun inallelawni. Adinipun imbos Ugud Apudyus. Yaḵon atte sinagung Apudyus impaḵaawatni'tta losane tagu da losane ḵatuttuwaan te pionni ye igammuwonda'tta somsomoḵdae ambaḻu ḵewaaḻni.

2 Corinthians 5:11

Pun gapu ta igammuni ye angisipog ḵan Apu, padasonni awison da tagu ta amatida ḵan siya. Yaḵon iniiggammun Apudyus diḵani ye naippun lawweng aḵ panggobni ya namnamaoḵe isuna bose iniiggammuyu diḵani.

2 Corinthians 5:16

Pun inggana sinsadi, adinipun bigbigon ngaimane tagu we ambatay si nainlubungane ḵasomsomḵan. Taḵon ay nu ḵatti inonni ye namigbig ḵan Kristu si awe, adinipun ogon ḵoon sinsana.

Galatians 1:10

Gamgamaḵ ḵad aine dayawonaḵ atta tagu si ḵaḵnae an-uugudḵu? Daḵampun! Sa madayawan Apudyus singsingtoḵ. Nu siya panggobḵu awisoḵ da tagu, adipun maḵwae mibelangaḵ aḵ anserbi ḵan Kristu.

Galatians 2:7

Inniladae innatod Apudyus ḵan saḵon biyange angiwaḻagawag si Ambaḻu we Damag atta Gentil we isuna bos si nangittana ḵan Peter si biyange angiwaḻagawag atte Ambaḻu we Damag atta Judyu.

Ephesians 3:8

Taḵon ay nu saḵon ḵababaan atta losane tagun Apudyus, impailana ḵinabaḻuna si nangittana ḵan saḵon atte gundawaye angipaigammu ḵan diḵayu we Gentil atte ippun miyisuwanae bindisyune awad ḵan Kristu.

Ephesians 6:6

Daḵampun ay aḵ asi ḵayu pumangog si annae antotollong da ap-apuwonyu ta piga gay nu maḻyadanda ḵan diḵayu yaḵon ibelangyu we sammilu ḵayu ḵan Kristu ya sipupusu ḵayu oḵyane angwa'tte pinion Apudyus.

Colossians 3:22

Diḵayu ḵad ose musassu, tuttuwaonyu da losane ibagan da ap-apuwonyu sina'd luta. Daḵampun aḵ abus angitotollonganda ḵan diḵayu'ḵ angwaanyu'tte ḵewaaḻyu ta mas-omda ḵan diḵayu. Yaḵon maḻpu pagay oḵyan atte somsomoḵyu da ḵoonyu we anuttuwa ḵan dida te isipogyu'ḵ Apu.

1 Timothy 6:20

Ḵan siḵa Timothy, ayyuwanam da intaḻgod Apudyus ḵan siḵa. Adayuwam da ug-uggude daḵampun aḵ mipanggob atte tuttuwae Apudyus ya da misullagi ye tuttudu we ngannonda laing yaḵon niḵawasda'tte ḵatuttuwaan.

2 Timothy 1:14

Mipagapu'tte ḵabooḻan ni Ispiritu Santu we iinggaw ḵan ditaḵu, ayyuwaname ustu ampatoge tuttudu we intaḻgod Apudyus ḵan siḵa.

2 Timothy 2:2

Ḵad da losane dingngoḻnu we intuttuduḵ ḵan siḵa'tta sinagung da adu we tagu, itaḻgodnu'tta mataḻgodane ḵallabbong os angituttudu'tta udum.

Titus 1:3

Ḵad sa ustu we timpu, impaigammuna'tta tagu mipagapu'tte Ambaḻu we Damag. Ḵad sa sadi ye Ambaḻu we Damag, intaḻgodna ḵan saḵon ta siya iwaḻagawagḵu. Te aḵ Apudyus we nanagu ḵan ditaḵu, siya bos imbilinna ḵan saḵone ḵooḵ.

Hebrews 4:13

Naippun mitaḻu ḵan Apudyus te losane ḵingwana ampataḵda si antotollongna. Ḵad songbatan taḵu ḵan siya da losane ḵingwa taḵu.

1 Peter 4:11

Sa innattan Apudyus aḵ ḵabooḻane angiwaḻagawag, ḵasapuḻane sosomḵonae siya iwaḻagawagna Ugud Apudyus. Sa naittan aḵ ḵabooḻane anserbi'tta buḻunna, ḵasapuḻane anserbi ye usarona pigsae itton Apudyus ḵan siya ta da losane banage ḵoonyu, midaydayaw aḵ Apudyus mipagapu ḵan Jesu Kristu. Siya madaydayaw ḵan maḵabooḻe ampangat aḵ inggainggana. Amen.

Revelation 2:23

Gongatoḵ os da angunud ḵan siya. Ḵad siya angigammuwan da losane gimung da namati ḵan saḵone tuttuwae angigammu'tte awad atta somsomoḵ ḵan pusun da tagu. Ḵad gungunaaḵ sin-ossaossa ḵan diḵayu sigun atta ḵingwayu.