1 Thessalonians 1:8 - Sa Ugud Apudyus

⁸ Te daḵampun aḵ abus ad Macedonia ya ad Achaia aḵ nandinongoḻan ni ugud Apu we iwwaḻagawagyu. Yaḵon nandinongoḻ os pammatiyu ḵan Apudyus atta losane ili. Pun ngaipani lawa ugudon ḵan dida mipanggob atte pammatiyu?

1 Thessalonians 1:8 ပူးပေါင်းရင်းမြစ်များ

Acts 18:12

Yaḵon nangobernor ḵad aḵ Gallio si probinsiya'd Achaia, nan-uunudan da Judyu we adipun namati ye iduḵḵusda doḵmaan aḵ Paul ya inniyoyda'tte dadaḻḻuman.

Romans 1:8

Sa umunae pioḵ ibaga, anggappiyaaḵ ḵan Apudyus mipagapu ḵan Jesu Kristu si mipanggob ḵan diḵayu losan. Te nandinongoḻ pammatiyu si intero we lubung.

Romans 15:26

Te da tagun Apudyus si probinsiya'd Macedonia ya Achaia, sillalaylayaddae nangitod aḵ badangda'tta ḵapuse tagun Apudyus ad Jerusalem.

Romans 16:19

Allaylayadaḵ gapu ḵan diḵayu te nan-asidongoḻ atta ḵinailin di ili tummuttuwaanyu gapu si namatiyanyu. Ḵad pioḵ ose lumaing ḵayu mipanggob si ambaḻu yaḵon ippun oḵyan igammuyu si mipanggob atta lawweng.

1 Corinthians 14:36

Ḵananyu ḵammane diḵayu naḻpuwan ni Ugud Apudyus baḵon nu abus ḵayu'ḵ niduumana?

2 Corinthians 2:14

Yaḵon anggappiyaaḵ ḵan Apudyus te gapu si niyossaananni ḵan Kristu, patilayune ipuyutna diḵani'tte sinagung da nadagupe tagu we isuni da baḻude illog Kristu. Ḵad mipagapu ḵan diḵani, sa ḵatuttuwaane mipanggob ḵan Kristu miwaḻagawag atta ḵinailin di ili ye mipani si bangun ni bangbanglu we misaḵnap atta adu we tagu.

2 Corinthians 3:4

Antuḻod ḵani ye angibaga'tta sana'tte sinagung Apudyus mipagapu ḵan Kristu.

Colossians 3:16

Ḵad pasigyu oḵyan isisimoḵ mipanggob atta tuttudun Kristu. An-asituttudu ya an-asibagbaga ḵayu we usaronyu da losane ḵinalainge innatodna. Ḵantaonyu da ḵantae naḻpu'tta de Psalm, sa udume nigili'tte Ugud Apudyus ya da udume ḵantan da namati ye andayaw ḵan Apudyus ḵad pasig oḵyane anggappiya ḵayu ḵan Apudyus atta somsomoḵyu.

2 Thessalonians 1:4

Pun nu inḵani bisitaon da gimung da namati ḵan Apudyus atta ḵinailin di ili, isḵaḻni diḵayu'tte ḵinaanusyu ya sa angipapuutanyu we amati taḵon ay nu amod da ampaḵaḻamanyu gapu'tta pammatiyu.

2 Thessalonians 3:1

Susunudḵu ḵan Kristu, iluwaḻuwanyu ḵappos diḵani ta mapagatupane mipaigammu Ugud Apu atta udume tagu. Ḵad ipatogda oḵyan ya patiyondae isun ni ḵingwayu.

1 Timothy 2:8

Ḵad pioḵe da losane gimungyu we namati, alluwaḻu da laḻaḵi. Ḵasapuḻane ampoḻḵas somsomoḵda ya adidapun bumasuḻ ya ippun oḵyan summang-anda baḵon nu maḵasuboganda nu ingatuda imadae alluwaḻu.

2 Timothy 2:9

Gapu si nangiwaḻagawagaḵ si annae Ambaḻu we Damag, ampaḵaḻamaḵ ya maḵawadanaḵ sina si annae babaḻḻudane isun di pumappatoy. Yaḵon adipun maḵwae maḵawadan Ugud Apudyus.

3 John 1:12

Aḵ Demetrius ḵad, ambaḻu ibagabagan da adu we tagu atte mipanggob ḵan siya ya tuttuwa da sana te maila si antataguna. Panoḵnoḵanni bos mipanggob ḵan siya ya igammume tuttuwa da annae ibagani.

Revelation 14:6

Pun innilaḵ osae anghel we antattayap ad ngatu. Inninggaw ḵan siya Ambaḻu we Damag we sa ippun ambaliwana'ḵ ingganae umoyna iwaḻagawag atta tagu'tta losane ili ya da losane tribu ya da tagu we nansabasabali gingada ḵan naḻpuwanda.

Revelation 22:17

Ḵanan ni Ispiritu ya da tagunae mipani si asaw-on ni Ubbu we Karnero, “Awwaynu.” Ḵad ḵanan oḵyan os ni andodongngoḻ, “On, awwaynu.” Ngaimane mauwaw, umali oḵyan ta uminum atte libli ye danume angitod si biyag.