1 John 5:19 - Sa Ugud Apudyus

¹⁹ Sa ḵumagwa, igammu taḵu we abeng Apudyus ditaḵu taḵon ay nu impangatan Satan da losane tagu we adipun amati.

1 John 5:19 ပူးပေါင်းရင်းမြစ်များ

Luke 4:6

woḵ ḵanana, “Siḵa angittaḵ atte ḵaḻabbongane angipangat ḵan dida ta anḵuwam da losane binaḵnangda. Te saḵon naattanda, ḵad ittoḵ si ngaimane pioḵ angittan.

John 12:31

Sinsadi ḵuwison Apudyus da tagu si annae lubung ya sinsadi aḵ Satan we pangat da tagu we adipun amati, maabaḵ.

John 14:30

“Adipun ogon andu maḵaug-uggudaḵ ḵan diḵayu te annate umali'ḵ Satan we pangat da adipun amati ḵan saḵon. Naippun ḵabooḻana ḵan saḵon,

John 16:11

Nankamalida mipanggob atte anḵuwisan Apudyus te da tagu we adipun amati naḵoddonganda'ḵ dusaon Apudyus te nagangpute inḵoddongnae dusaona'ḵ Satan we pangat da adipun amati.

John 17:15

Daḵampun aḵ iluwaḻuḵe ḵaanom dida'tte annae lubung yaḵon iluwaḻuḵe saḻaḵnibam dida ḵan Satan.

Romans 8:16

Sa Ispiritu Santu we mismu anaḵdoḻ atte ispiritu taḵu we tuttuwae abeng Apudyus ditaḵu.

2 Corinthians 1:12

Annaya isḵaḻni, panoḵnoḵan ni somsomoḵni ye ippun nantultulliyanni'tta asintataguni si annae lubung amod ay diḵayu. Te indaḻan Apudyus diḵani ta maḻpu'tte pusu ḵan naapudyusan da losane ḵoonni ya da losane ibagani. Pun daḵampun aḵ ḵingwani da sanae mipagapu si laing di tagu yaḵon mipagapu si ḵabooḻan Apudyus gapu'tte amode ḵinabaḻuna'tta tagu.

2 Corinthians 4:4

Adidapun amati te aḵ Satan we apudyus da tagu si annae lubung si sanae timpu, tatallingdana da somsomoḵda ta adida ilan silawe maḻpu'tte Ambaḻu we Damag mipanggob si ḵinangatun Kristu we ḵais-isun Apudyus.

2 Corinthians 5:1

Pun igammu taḵu we taḵon ay nu matoy long-ag taḵu we isun ni boḻoy taḵu'd lutae madadail, awad de boḻoye maatod ḵan ditaḵu'd langite sa baru we long-age itton Apudyus. Daḵampun aḵ ḵingwan di tagu te ḵingwan Apudyus we mismu ya ippun patinggana.

Galatians 1:4

we nangitod si long-agna'tte natoyana ta mapakawan da basuḻ taḵu. Ḵingwana sadi ye mibatay si pinion Apudyus we Ama taḵu ta matagu taḵu ḵan mapuḵayan taḵu ta adi taḵu igunay ya adi taḵu ansomsomoḵ atta isun da ḵoḵoḵḵon da tagu si sanae timpu.

Ephesians 2:2

Te siya inunudyu da antatagun da tagu we adipun amati ya tinuttuwayu gapu si namatiyanyu'tte pangat da ispiritu we adipun mailae siya angidaḻan atta tagu we adipun amati.

2 Timothy 1:12

ḵad sadi gapun ni ampaḵapaḵaḻamaḵ. Yaḵon adiyaḵpun mabain te igammuḵ pinatiḵe awad de ḵabooḻanae angayyuwan atta intaḻgodna ḵan saḵon inggana'ḵ dumatong aḻgawe ḵasin umali'ḵ Kristu.

Titus 3:3

Te taḵon ay ditaḵu we namati, nandongdong-og taḵu si awe ḵad aditaḵupun os tummuttuwa. Gattoḵe naallelaw taḵu ḵan nipuyut taḵu'tta daḵampun aḵ ustu ya nambalin taḵu'ḵ musassu'tta nansabasabali ye amaamayon da long-ag taḵu ya da ginangganas taḵu. Losane aḻgaw taḵu lawweng ḵasomsomḵan taḵu'tta buḻun taḵu, an-aḵ-apos taḵu, lalawwengon ditaḵu ya an-sassanga taḵu.

James 4:4

Diḵayu we adipun mataḻgodan da pammatiyu ḵan Apudyus. Adiyupun ḵamman igammu we nu siya ayatonyu da gangganason da tagu we adipun amati, ḵabusuḻ diḵayu ḵan Apudyus? Pun ngaimane angunud atta ugali ye misullagi'tta pinion Apudyus, ambalinona long-agna'ḵ ḵabusuḻ Apudyus.

1 John 3:14

Igammu taḵu we aditaḵupun ogon misina ḵan Apudyus we isun ni awe, pun sinsadi anna ḵan ditaḵu biyag aḵ inggana. Ḵad igammu taḵu ḵatuttuwaan te ay-ayaton taḵu da susunud taḵu ḵan Kristu. Sa tagu we adipun angayat atta asintataguna, isun di sissiyae natoy.

1 John 3:24

Da losane anuttuwa'tta bilin Apudyus, iinggawda ḵan Apudyus ya iinggaw os aḵ Apudyus ḵan dida. Ḵad sa angigammuwan taḵu we iinggaw aḵ Apudyus ḵan ditaḵu, sa Ispiritu Santu we innatodna ḵan ditaḵu.

1 John 5:10

Pun ngaimane amati si Abeng Apudyus, nimumuḻa'tte somsomoḵna panoḵnoḵ Apudyus atte mipanggob ḵan siya. Yaḵon sa adipun amati si imbagan Apudyus, ambalinonae tuliyan aḵ Apudyus te adinapun patiyon impanoḵnoḵnae mipanggob atte Abengna.

1 John 5:13

Inggiliḵ da annae banag ḵan diḵayu we namati si Abeng Apudyus ta angigammuwanyu we awad ḵan diḵayu biyag aḵ inggana.

1 John 5:15

Ḵad nu igammu taḵu we dongngona da ngaimane ḵodawon taḵu, igammu taḵu we maaḻa taḵu da ḵindaw taḵu ḵan siya.

1 John 5:18

Awad da tuḻu we igammuwon taḵu oḵyan. Sa umuna, igammu taḵu we ippun abeng Apudyus aḵ pagapagatupanae bumasubasuḻ te saḻaḵniban ni Abeng Apudyus ḵad ippun lamog Satan we aniwdiwat ḵan siya.

1 John 5:20

Ḵumaḵlu, igammu taḵu we ummali Abeng Apudyus woḵ innatodna ḵan ditaḵu pannakaawat ta igammuwon taḵu tuttuwae Apudyus. Ḵad sinsadi iinggaw taḵu si tuttuwae Apudyus te iinggaw taḵu si Abengna we aḵ Jesu Kristu. Siya tuttuwae Apudyus ya siya maḻpuwan ni biyag aḵ inggana.

Revelation 12:9

Ḵad niballu'd luta daḵoḻe dragone nidoga da anghelna. Aḵ Satan sanae nampailae uḻog si awe. Siya nangallelaw atta tagu si intero we lubung.