1 Corinthians 3:5 - Sa Ugud Apudyus

⁵ Ngai ḵad ain aḵ Apollos? Ngai'ḵ Paul? Sammilu ḵani ḵan Apudyus ḵad mipagapu ḵan diḵani namati ḵayu. Awad osa ḵan diḵani ḵoona nipabiyang ḵan siyae innatod Apu ḵan diḵani.

1 Corinthians 3:5 ပူးပေါင်းရင်းမြစ်များ

Matthew 25:15

Pun sinin-ossana dida innattan, sigun si ḵabooḻanda. Sa intaḻgodna si ummuna, limallibu we palata. Sa ḵumagwa, intaḻgodna duwallibu we palata ḵad sa naudi, intaḻgodna sillibu we palata. Pun ummoyon.

Luke 1:2

Niyiissu da inggilida'tta dingngoḻni ye inug-uggud da nangila'tte inggan ni lapun ni mipanggob ḵan Jesu Kristu we pinilin Apudyus aḵ Anagu ya An-ari ḵan nangiwaḻagawag os atta ḵingwana.

John 3:27

Summongbat aḵ John woḵ ḵanana, “Naippun tagu'ḵ awad awatona nu adi abus maatod ḵan siyae maḻpu ḵan Apudyus.

Acts 18:24

Inninggaw Judyu we iyAlexandria we ummoy ad Ephesus we Apollos ngadanna. Allainge antuttudu ya adu bos inigammuna si mipanggob atte nigili ye Ugud Apudyus.

Acts 19:1

Sa inninggawan ḵad Apollos ad Corinth, ummoy aḵ Paul ad Ephesus we naḻpu'd Phrygia we nangoy si beleg. Dummatong ḵad sidi, indasana da udume namati,

Romans 15:16

ta anserbiyaḵ ḵan Jesu Kristu si antuttuduwaḵ atta Gentil. Anserbiyaḵe isun di padi atte angiwaḻagawagaḵ si Ambaḻu we Damag we naḻpu ḵan Apudyus ta ambalin da Gentil aḵ datune mas-oman Apudyus te intotoḵḵon ni Ispiritu Santu dida'ḵ taguna.

1 Corinthians 12:28

Ḵad da dinutuḵan Apudyus atte gimung da namati, ummuna da apostol, ḵumagwa da profeta we an-uuggudona, ḵumaḵlu da angituttudu'tte ugudna, asiyot da angwa'tta nakaskasdaaw, da naittan aḵ ḵabooḻane angaan atta saḵit. Awad os da naittan aḵ ḵabooḻane bumadang ya da naittan aḵ ḵabooḻane angipangpangu'tta namati. Ḵad awad os da naittan aḵ ḵabooḻane an-ugud atta nansabasabali ye ugude adidapun inadaḻ.

1 Corinthians 16:12

Ḵad sa mipanggob ḵan Apollos we sunud taḵu ḵan Kristu, inaḻ-aḻuḵḵu ta mibuḻun oḵyan atta udume susunud taḵu ḵan Kristu we umali sinat. Yaḵon adinapun pione umali ye sana. Asi umali nu awad wayana.

1 Corinthians 3:10

Gapu si ḵinabaḻun Apudyus we impailana ḵan saḵon, isuḵ nalainge antaḵad aḵ boḻoy, ummaḵ ginagaaman nangisaadaḵ ḵad da udume tagu asi amagatup si sadi ye insaḻadḵu. Yaḵon awad osa ḵasapuḻane laḻamana inonae antaḵad.

1 Corinthians 3:22

Imbuunna saḵon ya da Apollos ḵan Peter we anserbi ḵan diḵayu. Ḵad innatodna ḵan diḵayu da losane awad si annae lubung, da mabiyaganyu, matoyanyu, taḵon ay sinsadi ya sa umali ye aḻgaw ḵuwayu dida.

1 Corinthians 3:7

Pun sa nangimuḻa ḵan nansilug, naippun patogda. Siya ampatog aḵ Apudyus we amadaḵoḻ si muḻa.

1 Corinthians 9:17

Te nu saḵon namili si annae ḵewaaḻḵu, awad de ḵaḻabbongaḵe matangdanan. Yaḵon gapu ta intaḻgod Apudyus ḵan saḵon, ḵooḵ da piona paḵwa taḵon ay nu ippun tangdanḵu.

2 Corinthians 11:23

Ḵad nu ḵanandae anserbida ḵan Kristu, amo nabaḻbaḻu anseserbiḵ ḵan siya nu dida. Isuḵ nin nadongdong-ogane angibaga'tta ḵassana! Amo nasigab ḵewaaḻḵu nu dida, adu timpu we nibaḻudaḵ, naap-aplitaḵ ya adu naamusanaḵ si ḵatoy gapu'tte anserbiyaḵ ḵan Kristu.

2 Corinthians 3:3

Ipailayu si antataguyu we diḵayu isun di suḻate inggilin Kristu mipagapu ḵan diḵani. Ḵad daḵampun aḵ lapis inusar ni nangigili yaḵon sa Ispiritun ni matattagu we Apudyus. Ḵad daḵampun aḵ batu nigiliyana yaḵon da pusuyu.

2 Corinthians 3:6

we siya nangitod atte ḵabooḻanni ye angituttudu si mipanggob atte Baru we Tuḻag Apudyus atta tagu. Ḵad sa sadi ye Baru we Tuḻagna, daḵampun aḵ mibatay si nigili ye lintog nu adi mibatay si ḵewaaḻ ni Ispiritu Santu. Sa ambanagan ni nigili ye lintog, ḵatoy aḵ inggainggana. Yaḵon sa Ispiritu Santu angitod si biyag aḵ inggana.

2 Corinthians 4:1

Gapu'tte ḵadagun Apudyus, naatod ḵan diḵani annae ḵewaaḻ, pun adiḵanipun paat madismaya.

2 Corinthians 4:5

Te daḵampun aḵ sa mipanggob atta long-agni iwwaḻagawagni yaḵon sa mipanggob ḵan Jesu Kristu we Apu. Ḵad anserbi ḵani ḵan diḵayu gapu ḵan Jesus.

2 Corinthians 4:7

Yaḵon diḵani ye angituttudu si Ambaḻu we Damag, isuni bangae ippun patognae napnu'tta ampapatoge ḵinabaḵnang ta mipail-an ni ḵabooḻane ippun miyisuwanae naḻpu ḵan Apudyus we daḵampun aḵ naḻpu ḵan diḵani.

2 Corinthians 5:18

Losan da sanae imbagaḵ maḻpu ḵan Apudyus. Aḵ Apudyus nangwa'tte mipaḻ-ogan ni maḵabuḻbuḻunan taḵu ḵan siya mipagapu ḵan Kristu. Ḵad innatodna ḵan diḵani ḵewaaḻe angipaḻ-og si maḵabuḻbuḻunan da udume tagu ḵan siya.

2 Corinthians 6:1

Pun diḵani ye maḵaḵewaaḻ ḵan Apudyus, ḵodawonni ḵan diḵayu ta sa ḵinabaḻun Apudyus we inawatyu, awad oḵyan ustu'ḵ ambanagana si antataguyu.

2 Corinthians 6:4

Ḵad da losane ḵoonni, ipailani ye anserbi ḵani ḵan Apudyus te at-attomanni da amode maal-alimuunanni ḵan adu we ampaḵaḻamanni ya da losane ampaḵimute naḵwa ḵan diḵani.

Ephesians 3:7

Impailan Apudyus ḵinabaḻuna ḵan saḵon te mipagapu'tte ḵabooḻana intaḻgodna ḵan saḵon ampatoge ḵewaaḻe angiwaḻagawag atte Ambaḻu we Damag.

Colossians 1:23

Yaḵon ḵasapuḻane pagatupanyu we amapigsa'tta pammatiyu ya adiyu ipyode mayugayug namnamayu we ginanabyu si nandongoḻanyu si Ambaḻu we Damag we niwaḻagawag si intero we lubung. Ḵad sana gapunae saḵon aḵ Paul, nambalinaḵ aḵ anserbi ḵan Kristu.

Colossians 1:25

Dinutuḵanaḵ ḵan Apudyus aḵ anserbi'tta namati ḵad intaḻgodna ḵan saḵon ḵewaaḻe angipaigammu si tuttuwae Ugud Apudyus.

1 Timothy 1:12

Anggappiyaaḵ ḵan Jesu Kristu we Apu taḵu we amaḵosdoḻ ḵan saḵon. Te imbelangna saḵon aḵ mataḻgodan woḵ dinutuḵana saḵon aḵ anserbi ḵan siya.

1 Peter 4:10

Ḵad da ḵabooḻane innatod Apudyus atte sin-ossaossae namati, usaronyu we anserbi'tta buḻunyu we isun di mataḻgodane sammilu we angayyuwan atta nankalakalasi ye bindisyune innatod Apudyus.