1 Corinthians 13:13 - Sa Ugud Apudyus

¹³ Pun sana da tuḻu we iinggaw aḵ inggana: sa pammati, namnama ya sa ayat. Yaḵon sa ḵapatogan atta anna ayat.

1 Corinthians 13:13 ပူးပေါင်းရင်းမြစ်များ

Luke 10:27

Ḵanana, “Nigili'tte Ugud Apudyus, ‘Ḵasapuḻane ayatom aḵ Apu we Apudyusnu atte amine pusum ya amine ḵalidodwam ya amine ḵinosdoḻnu ya amine somsomoḵnu.’ Nigili bose, ‘Ḵasapuḻane ayatom da asintatagume isun ni an-aayatnu si long-agnu.’ ”

Luke 22:32

Yaḵon illuwaḻuwaḵ siḵa Simon ta adi pammatim maabaḵ ḵad nu ansagungḵa ḵan saḵon, ḵasapuḻane papigsaom oḵyan pammatin da susunudnu we namati.”

Romans 15:13

Iluwaḻuḵ ḵan Apudyus we maḻpuwan ni namnama taḵu ta ittona ḵan diḵayu amode layad ḵan lin-awan da somsomoḵyu gapu si namatiyanyu ta pumigsa namnamayu mipagapu si ḵabooḻan ni Ispiritu Santu.

1 Corinthians 14:1

Ipapatiyu we an-asiayat. Ḵad ipapatiyu oḵyan sington da ampapatoge ḵabooḻane itton ni Ispiritu Santu, amod ay ḵabooḻane angipaigammu'tte pinion Apudyus.

1 Corinthians 16:14

Da losane ḵoonyu, ḵoonyu oḵyane gapu'tte ayatyu.

1 Corinthians 3:14

Ḵad nu adipun masgob da ḵingwan ni osa'tta nantaḵad, magungunaan.

1 Corinthians 8:1

Annaya bos ibagaḵ ḵan diḵayu si mipanggob atte anganan atte maḵane midatun atta sinan-apudyus. Tuttuwa anna ya igammu taḵu losan. Yaḵon umman taḵu te allasu we sumoḵaḻ taḵu gapu'tte anna igammu taḵu. Yaḵon nu an-asiayat taḵu, sanat pumigsaan da pammati taḵu.

1 Corinthians 8:3

Yaḵon da angayat ḵan Apudyus, ibelang Apudyus dida'ḵ taguna.

2 Corinthians 5:10

Te ḵasapuḻane losan taḵu sumangu ḵan Kristu we maḵuwis ta sa sin-ossaossa ḵan ditaḵu, awatona gungunae maatod ḵan siya sigun atte ḵingwana si natattaguwana, ambaḻu man baḵon nu lawweng.

2 Corinthians 5:15

Natoy aḵ para'tta losane tagu ta da matattagu adidapun ogon ḵoon pipion ni long-agda yaḵon sa pinion Kristu we natoy woḵ natagu ḵasin para ḵan dida.

Galatians 5:6

Te sa niyossaanan taḵu ḵan Jesu Kristu, ippun paat nisabaliyana si antotollong Apudyus nu nasogyatan taḵu baḵon nu aditaḵupun. Yaḵon sa awad de patogna, sa pammati taḵu we mipaila si angayatan taḵu'tta buḻun taḵu.

Philippians 1:9

Annaya da iluwaḻuḵ ḵan Apudyus. Ḵodawoḵe pumigsapigsa oḵyan ayatyu ḵan siya ya da buḻunyu, ḵad madog-an oḵyan igammuyu si mipanggob ḵan Apudyus ya sa ḵabooḻanyu we angigammu nu ngai da ustu we ḵoonyu,

Colossians 1:5

Ḵaḵnat te namnamaonyu we awad de inggagappot Apudyus ad langite para ḵan diḵayu. Dingngoḻyu'tte awe mipanggob si anna si nangngoḻanyu'tte ugude ḵatuttuwaane siya Ambaḻu we Damag.

Colossians 3:14

Ḵad ḵasapuḻan ose idogayu ayat atta annae ambaḻu we ugali te nu an-asiayat ḵayu, siya gaḻut ni an-os-ossaanan da somsomoḵyu.

1 Thessalonians 1:3

Te nu alluwaḻu ḵani ḵan Ama taḵu we Apudyus, iḵagasmoḵni inonyu we nangigunay atta pammatiyu, pangogyu we nanḵewaaḻ gapu'tte ayat ḵan impapatiyu te antaḻgod ḵayu'tte namnamayu ḵan Apu Jesu Kristu taḵon ay nu ampaḵaḻam ḵayu.

1 Thessalonians 5:8

Yaḵon gapu ta ditaḵu ḵuwan ni aḻgaw, naannad taḵu oḵyan. Isu taḵu oḵyan suḻdadu we angiḵabot atta saḻaḵnib ni long-agna nu maḵagubat atte ḵabusuḻna. Sa pammati taḵu ḵan ayat taḵu saḻaḵnib da baḻuḵung taḵu. Ḵad sa helmet we saḻaḵnib ni uḻu taḵu, siya namnama taḵu'tte mataguwan taḵu.

1 Timothy 1:5

Yaḵon sa panggob ni sanae bilin, an-asiayat ḵayu we maḻpu si ampoḻḵas ya ambaḻu we somsomoḵ ya sa gattoḵe pammati.

2 Timothy 1:7

Te sa Ispiritu we innatod Apudyus ḵan ditaḵu, daḵampun si ogyat yaḵon sa ḵabooḻan taḵu we anserbi ḵan Apudyus, sa ayaton taḵu da udume tagu ya sa lamog taḵu we anupod si long-ag taḵu.

Hebrews 10:35

Pun adiyu taḻaḵon namnamayu ya taḻgodyu te idatongna daḵoḻe gunguna.

Hebrews 10:39

Yaḵon adi taḵu miyisu'tta nangiwaḻang atta pammatida ya nadusada ḵan Apudyus aḵ inggana. Yaḵon ditaḵu da namati ya matagu'ḵ inggana.

Hebrews 6:11

Ḵad sa pionni, sin-ossaossa ḵan diḵayu ipapatiyu pagatupan namnamayu ta laḵ-amonyu'ḵ inggana si anungusna.

Hebrews 6:19

Ḵad sa annae namnama taḵu, siya amapagdot si pammati taḵu te aaddi ye mituttuwa. Gapu'tte namnama taḵu, isu taḵun naganggangput nillumnoḵ si gattoḵe igaw Apudyus we isun ni nillumnoḵan ni ḵangatuwane padi si Ḵasantuwane kuwartun ni templo we boḻoy Apudyus we natalingdan si kortina.

1 Peter 1:21

Mipagapu ḵan siya, antaḻgod ḵayu ḵan Apudyus we nanagu ḵasin ya nangipangatu ḵan siya. Ta sa pammatiyu ḵan namnamayu awad ḵan Apudyus.

1 John 2:10

Yaḵon ngaimane angayat atte asintataguna, iinggaw atte padda ḵad naippun ogon ḵoona'ḵ bumasuḻan da udum.

1 John 2:14

Iḵasinḵu bos ibaga ḵan diḵayu gapun ni nanuḻataḵ ḵan diḵayu we aabengḵu te igammuyu'ḵ Ama taḵu. Nanuḻataḵ ḵan diḵayu we aamma te igammuyu'ḵ Apudyus we inninggaw inggan ni laplapu. Nanuḻataḵ os ḵan diḵayu we babaḻu te anḵaḵosdoḻ ḵayu ḵad iinggaw Ugud Apudyus atta somsomoḵyu ḵad siya nangngoganyu ḵan Satan.

1 John 2:24

Isisimoḵyu da tuttuwae tuttudu we dingngoḻyu inggan ni namatiyanyu. Nu ḵatti ḵoonyu, iinggaw ḵayu ḵan Apudyus we Ama ya sa Abengna.

1 John 3:3

Sa tagu we annamnama'tta sanae banag gapu ḵan Kristu, papoḻḵasonae mismu long-agnae isuna'ḵ Jesus.

1 John 3:9

Sa abeng Apudyus, adinapun pagapagatupane bumasuḻ te sa biyag Apudyus iinggaw ḵan siya. Gapu ta nambalinon Apudyus aḵ abengna, adipun maḵwae pagapagatupanae bumasuḻ.