Sofoniia 3:6 - O Mikanda Ikola

⁶ Jihova uixi: Miji ioso nga i bûba, o tuthôndo tuâ tua di leka a tu lundumuina bhoxi, mabhata mâ mua tela jinga o mauenji, ma xala ngùndu, ubhita-bhu ngó ka moneka; o jisanzala jâ jʼòmuange, ni muthu ua subhuka-mu ngó mba utunga-mu dingi ku mu mono.

Sofoniia 3:6 ပူးပေါင်းရင်းမြစ်များ

Izaía 14:26

ʼKâ kene o kaiula kòxinde phala oxi ioso ienhoio, o lulu luene lukuaku luami nga lu sunununa ku thandu dia ifuẋi ioso.

Izaía 37:36

Bhenhobho anju ia Jihova ua tundu, iu ua nemeka mu kilômbo kia Asídia, hama ni makuinhi-nake a jimidi ni midi jitanu ja makuenze; o kuila muene a balumuka mu kimenemene, talesa, iimbi mu iimbi kiá!

Izaía 6:11

Eme-phe, ngixi: Ngana Katé bhebhi? Muene ua kumbulula: Katé ki buika o madiembu, sé muthu u tungamu, né ngó muthu umoxi mu jinzu, oxi iene ioso kilômbo ngundu.

Jelemiia 9:12

Nanhi muene o njimu a tongolole kiki? Mukuahi a mu tangela maka kuala dikanu dia Jihova, nda a tene ku ki kunda? oxi ia buikilaʼhi kala kiki, i i ia jokota mukuá ni kikangalakata, mu mua bhingi né ngó muthu u bhitamuʼé?

Ijila 26:31

O jisanzala jenu nga kà ji sengulula, o ididi ienu ia kubhezela nga kà i solala, o dizumba dinuha kiamboteʼokio di mu ngi tela Eme, ki nga kà di suua dingi.

Sofoniia 2:5

Lamba dia ió oso a tungu ku ndundu ia kalunga, kokolo dia mundu ua ifuẋi ia akua Keleta! Kizuelu kia Jihova kia kà tula kokuenu enu mu akua Kanana, mua tunga mu ixi ia akua Fidíxia; nga kà mi muanga katé ni umoxi ngó kaxala-ku, u tunga momué.

Zakadiia 7:14

Nga-nda kua kà a muangena ni kitembu kia kibhungu mu kaxi ka miji ioso ia kambe ene kuijiia, o ixi ku dima diâ, ia kà xala ia hatu, ià kala ia ngoho kala ia zuluka ku kibhungu kia dikota. O kienhiki kia kà bhangesa kuila ki bhu kala muthu u bhita-mu, mba u vutukila-mu; kuma ia kexile ixi iambote, o kiki a i kitula jingundu.

Matesu 23:38

Talesa, kilômbo kié kià xala ngundu.

I Kolindo 10:11

Ima ioso ienʼ iii ia bhitile ku jitata jetu mʼ ukulu, ni i kale kijimbuete ku akua, maji ima ienʼ iii-phe a i soneka phala ku tu dimuna etu. Mukonda tuala mu kithangana kia kuila o dizubhilu dia jithembu dia zukama kiá.

I Kolindo 10:6

Ima ioso iii ia bhiti mu kukala ijimbuete ietu, phala ki tu kuate jihanji ja ima iaiibha, uila ene kia ji kuatele,

Josuué 23:4

Talesenu kioso ki nga mi uanena o ifuẋi ioso iasubhukile tundé ku Njolodá, ni ifuẋi ioso i nga tolola, katé ku musanza uonène, kuene ku tundila o dikumbi; eme ngedi, o mu uana, kala muiji mudienu kioso kia mu xindi o hasa iê.