Sofoniia 3:20 - O Mikanda Ikola

²⁰ Mu izuua ienhoio nga kà mi vutula dingi, anga ngi mi bhongolola; ni kidi muene, eme nga ka mi bhana dijina ni diximanu muʼaxaxi ka mundu uoso mu ngongo, kioso ki nga-nda kuendesa mu kuvutula dingi o mundu uenu a kexi ku ubhika, bhu pholo ienu muene, Eme ngi Jihova nga ki ambe.

Sofoniia 3:20 ပူးပေါင်းရင်းမြစ်များ

Jisálamu 35:6

Njila iâ i kale javundu, ia ẋanana; o anjo ia Jihova ende ni ku a landameka.

Izaía 56:5

Eme ue mʼonzo iami ni mu malumbu mami nga kà a bhana-mu kididi, ni dijina dia tundu o dijina dia ana a mala ni anʼa ahatu; dijina dinanga, diene di ngʼa bhana kala muthu mudiâ; o dienhidi ki dia kà bhua-ku dingi.

Izaía 56:8

Jihova Nzambi, uene kubhongolola oso a muangana mu Izalaiele, uambe kiki: Hanji nga kà bhongolola dingi athu kumoxi ni iá u nga bhongolola kiá.

Izaía 60:15

Bhu kididi kia ku kuehelela, ni ku ku buakulula bhua ku tula, kia bhingi ki bhu kexile u bhita momué, eme-phe nga kà ku bhangesa kukala ni kuzangalala ku nangenena, kutana muene, kutunda muiji kuiza muiji.

Izaía 61:9

O mbutu iâ a kà i mona, a kà ela ngó sui, exi: ienhiʼii o mbutu ia zediuisa kua Jihova.

Izaía 62:12

A-nda ku a luka exi: Mundu Uangene, Jihule ja Jihova; eie-phe a-nda ku ku luka exi: Na Nginde, A-mu-sota; Na Mbanza-ka-mu-ehelela.

Izaía 62:7

ki mu di-xibhe, katé kia xikika, kia bhanga Jeluzaleme kukala mbanza ia diximanu kulu dia mundu.

Izaía 66:22

Kuma, mukuâ ni maúlu mobhe, ni oxi iobhe, i nga-nda kuiudika, a xalela bhu pholo iami, eme ngi Jihova, kiene ue kia kà xalela o mbutu ienu ni dijina dienu.

Jelemiia 23:3

Anga eme-muène ngi bhongolola joso ja subhuka ku jimbudi jami, ngi ji takana ku jixi joso kua ji kaielele anga ngi ji vutula dingi mu ibhanga iê, hé ja kà di vuala anga ji sokoloka muene.

Jelemiia 29:14

Enu-phe mua-nda kuà ngi bonga muene, Jihova ua ki tange, nga kà bhangesa kuila jihutile jenu ja kà vutuka, anga ngi mi bhongolola mu miji ioso ni mu ididi ioso mu nga mi takuile, eme ngi Jihova, anga ngi tona dingi ku mi bheka bhu kididi kioso bhu nga mi katuile mu ku mi bheka ku jixi jengi.

Jelemiia 30:3

Mukonda kua-nda kuiza izuua, eme ngi Jihova, nga-nda ku vutulula ubhika ua kifuxi kiami kia Izalaiele ni Juda, eme ngi Jihova, anga ngi tona dingi ku a bheka mu ixi i nga bhele ku jitata jâ, anga a ívua, i kala iâ.

Jelemiia 33:9

Mbonge iii ia kà kituka dijina diami dia kusanguluka, ni diximanu, ni fuma, mu kaxi ka miji ioso kulu-dia-mundu, oso evua mbote ioso ni kutululuka kuoso ku nganda ku mu bhana.

Izekiiele 16:53

Eme-phe o jihutile jâ nga-nda ku ji vutûla; o jihutile ja Sodoma ni ja anʼê a ahétu, ni jihutile ja Samádia ni ja anʼê a ahatu, kumoxi ni jihutile ja uhutile ué-eie mu kaxi kâ;

Izekiiele 28:25

O Jihova Nzambi, uambe kiki: kioso eme ki nga-nda kubhongolola o dibhata dia Izalaiele, mu kaxi ka ifuẋi mua di muangena, eme anga ngi di kôlesa muʼaxaxe kâ, bhu pholo ia akua jixi, kuabhu-phe, kienhókio a-nda kua kà tunga mu ixi iâ i nga bhana kua mubhikʼami Jakobo.

Izekiiele 34:16

Ioso ia jimbila ngi i kenga, o ia di texi ngiza na-iu dingi, o ia bukula kinama ngi i tá mu kitanda, o ia kate ngi i tumba; maji o ia nete, ni iii ia vulu o nguzu ngi i jimisa o mbutu; kuma nga-nda ku jʼinga ni kilunji.

Izekiiele 37:12

Kala kiki, zambula u a tangele, kuma: O Jihova Nzambi uambe kiki, uixi: Talesenu, kuma eme hádia nga kà jikula o jimbila jenu, anga ngi mi bhangesa kutunda mu ina ienu, enu mundu uami, tata, hé nga kà mi bheka dingi mu ixi ia Izalaiele.

Izekiiele 37:21

Hé u a ambela-phe, kuma: O Jihova Nzambi uambe kiki, uixi: Talenu, kuma o anʼa Izalaiele nga-nda ku a katula muʼaxaxe ka miji mua di takuila, hé ku jimbandu joso ngʼa bhongolola-ku, ni nga a bheka mʼoxi iâ.

Izekiiele 39:13

Kiene muene, o mundu uoso mu ixi, ene a kʼènda ni ku a funda; anga ene a kà kʼi-ta ku mukumbi, o kizuua kia-nda ku ngi fumanesa, ene Jihova Nzambi ua ki tange.

Izekiiele 39:28

Kienhokio-phe a kà kʼijiia kuila, eme ngi Jihova Nzambi iâ, kioso kià mona kuila eme nga a bheka ku uhutile muʼaxaxe ka akua jixi, eme nga tona o ku a phopha dingi, mbé ene oso nʼa vutuke mʼoxi iâ; ki bhuala ngó muthu nga mu tungula-ku nʼa xalele koko.

Jouele 3:1

Mukonda-phe mu izuua mueneʼomo, mu kithangana kieneʼokio, ki nga-nda kua kà katula o ubhika ua Juda ni ua Jeluzaleme.

Amoji 9:14

Nga kà katula ubhika ua uhutile ku kifuẋi kia mundu uami ua Izalaiele, jimbonge joso ja bilukile jingundu, ene a kà ji tunga dingi, muene mua kà kala; kia kà dima mivide, vinhu iê a kà i nua muene, kia kà bhanga imbu, ibundu i tunda mu imbu iâ a kà i dia muene.

Mikeia 2:12

Ni kidi kiene, hádia ngi ku bhongolola ni kivimba kioso, eie Jakobo; ni kidi muene, hádia ngi bhongolola o mbandu ia Izalaiele ia xala-bhu; ene oso nga a bhongolola anga nga ongeka bhu kididi kimoxi kala jimbudi ja Bozola; ela kala kilunga kiala muaxaxi ka kibhanga kiâ; ki nga a bhongolola a kà lunguta ni kuta jibuia javulu mukonda dia mundu kuvula.

Mikeia 4:7

Anga, o kia tenguine nga kà ki bhanga kiengi, kuma iene o mbandu ia xala-bhu; o ki nga texile dikanga nga kà ki bhanga muiji ua nguzu ni kutena, o Jihova anga ua kà kala jinga mu ku a tumina ku mulundu ua Ziione, tunde kindala, katé ku hádia ni hádia.

Sofoniia 2:7

Ndundu ia kalunga ia kà kala iangene phala oso a subhuka ku muiji ua Juda, nʼaxalela momo; muene mua kà disila o ilunga iâ ia ibhaku; o mu ngoloxi a kà zekela mu jinzu ja Axikilone, mukonda o Jihova Nzambi iâ ua kà a zungila, o uíndua uâ ua kà u lungulula kuzediua anga u a tula dingi bhu kididi kiâ; o jihutile jâ ua ka ji vutula dingi kʼoxi iâ.

Sofoniia 3:19

Tala-ze, kuma, mu kizuuʼokio, nga kà a vutuila phulu kua iá ene oso a ku tatesa jinga; nga kà bhulula o inema ioso ala kutenguna; ió oso a a kaie, ene oso nga kà a bhongolola, anga nga kà a kitula diximanu, hé a kà fumana dijina mu ixi ioso mua a bhela jinga o dilebhu ni ku a kuatesa o jisonhi.

Zakadiia 8:13

Anga kia kà bhita-phe kiki, eie bhata dia Juda ni eie bhata dia Izalaiele, kuila, kala kioso ki mua kexile mu akua mázui muʼaxaxe ka miji iengi, kiene ue ki nga kà mi bhulula anga mua kà kituka dibesá muʼaxaxe kâ. Ki mu kale-phe ni uoma, maku enu a suine muene.

Zakadiia 8:8

Nga kèza-nâ; a kà tunga muʼaxaxi ka Jeluzaleme. Ene a kà kala mundu uami, eme nga kà kala ngi Nzambi iâ, mu kidi ni mu kufundisa kua iuka.

Malakiia 3:12

Bhenhobho akua jixi joso, a kà mʼixana kuma mua zediua; mbata enu mua-nda kala ixi ia kubhanduluka eme ngi Jihova dia Ifuẋi.

Matendelelu 26:18

Jihova lelu ua ku jingisa iu ua ku edi: Tanga-kiu muene kuamba u kala u kifuẋi kiami muene, kala kia ku ambelele kiá, iu ua ku solo phala uende ni kualuka jinga o ijiia iê ioso.

Matendelelu 26:19

Kifua ua mu bhana o dikuatelu mukonda muene uandala ku ku zangeleka ku thanduʼa ifuẋi ia miji ioso ia bhange; u kale u di tunda diê, u fuma iê, u kijingo kie, u povo ia di zelesa kiasoko; ii ia di lumbila kua Jihova Nzambi ié, kala kia ku ambelele kiá.