Nzuá 7:37 - O Mikanda Ikola

³⁷ Kizuua kia kuzumbuka, o kizuua dia dikota kia fesa, kizuua kienhókio Jezú uemana, anga u di kola, uixi: Se muthu uala ni dinhota, eze ko-kuami, nda anue.

Nzuá 7:37 ပူးပေါင်းရင်းမြစ်များ

Nehemiia 8:18

Anga Ejidala muene u kuata kutanga mu divulu dia kitumu kia Nzambi, kizuua ni kizuua, tunde mu kizuua kia dianga katé kia sukidilaku; anga a bhitisa fesa iangene mu sambuadi dia izuua, kizuua kia kanake, anga a bhitisa fesa ia kuzumbuka, kala kia ki lekelela.

Jisálamu 143:6

Ngi sunununa o maku mami ko kué, muenhu uami ua ku kala ni dinhota, kala mʼoxi iakukuta. (Selah.)

Jisálamu 42:2

Muenhu uami ua ngʼizala ni dinhota dia Nzambi, o Nzambi ia muenhu; kizuua kiahi ki nga kà bhixila, hé ngi di bhakula bhu pholo ia Nzambi?

Jisálamu 63:1

Ngana Nzambi, tata, eie u Nzambi iami; eme ngi di meneka muene mu ku ku sota; muẋima uami ua ku kala ni dinhota; oʼxitu jami ja ku kala ni hânji iavulu, mu ixi iakukuta, iabhuila, iedi ni iene thokon! mua bhingi ki mu moneka menha.

Jisabhu 1:20

O Unjimu u kola bhu makanga, ni bhu itanda, ni mu nzunga, uene u tenda u tona.

Jisabhu 8:1

Abha manhi unjimu ki uala ku dikola lua vulu muene; o kuijiia kua muẋima ue ki kuala kubhana mbimbi iê?

Jisabhu 8:17

Nga zola oso a ngi zola, a di meneka mu ku ngi sota a ngi sanga muene.

Jisabhu 8:3

Ni bhu mbanduʼa mabhitu a diembu, ni bhu muelu ua mbanza, ni bhu mielu iaʼnzo, u tenda u tona,

Jisabhu 9:3

Ua tumu tuhetu tuê kubhita ni kuambela athu, ni ku a exana tunde bhu thalʼèlele ia diembu, uixi:

Mukumbi ua Mikumbi 5:1

Nga bokona kiá mu kadíbhia kami, phangʼiami ia muhatu, bhànga diami! Nga munu uasu uami ua sumuna ni ima iami ia mazumba; nga katula kixila kiami, eme nga ki di ni uiki; o vinhu iami nga i nu ni lete. Dienu, nuenu, enu mu makamba mami! Enu nga mi zola kiavulu, nuenu muene kioso ki mua tena!

Izaía 12:3

O enu-phe, ni kusanguluka kuoso, mua-nda kua kà teka menha mu jifiẋi ja kubhuluka.

Izaía 40:2

Jeluzaleme mu tedienu maka ma mu kuatekesa muẋima moxi; mu tangedienu kuamba dinhengena dié diabhu-ku, kikuma kiê kiololoke kiá; o ituxi iê ioso, ua i tambuila kiá luiadi ku lukuaku lua Jihova.

Izaía 40:6

Dizui-phe diambe: Dikole; muene-phe uixi: Ngi kola kima kiahi? Xitu ioso mukuâ ni iangu, o kuuabha kuê kuoso mukuâ ni itulu ia iangu mu mukáu.

Izaía 44:3

Mbata o uala ni dinhota nga-nda ku mu lunduluila menha, o mukáu uakukuta nga-nda ku u fuafuesa jingiji? nga-nda ku lundulula Nzumbi iami ku thanduʼa mbutu ié, luvualu lué ngi lu tuluila kubhanduluka.

Izaía 55:1

Enu, oso muala ni dinhota izenu ku menha, nʼenu oso mua lémbua kitadi, izenu, sumbenu, mu die; eué, zenu, mu sumbe mu ngoho sé kitadi, né suilu, vinhu ni lete.

Izaía 55:3

Bhetekenu o mátui menu, nda mu ize kokuami; ividilenu, muenhu uenu ubhuluke; kuma nga-nda kuta nʼenu kikutu kixalela-ku, hé ngi mi bhana jimbote ja Davidi ki jene kufula.

Izaía 58:1

Dikole ni dízui dia suina, ku dixibhe, zangumuna dízui dié kala koloneta, uidikize athu ami o kikuma kiâ, o dibhata dia Jakobo ue idika-diu o ituxi iâ.

Jelemiia 16:19

Jihova tata, u kimbaka kiami, u nguzu iami, u disuamu diami mu kizuua kia phaxi! Matumbu-ze a-nda kuiza kokué, tundé ku maẋokololo ma ixi, anga ela: Mbé jitata jetu a lunduile ngó makutu, ni kingoho ki kuala kubhanduluka kua kima.

Jelemiia 2:2

kixi: Nde, ua kà handekele mu mátui ma Jeluzaleme, uixi: Jihova uambe, kiki: Nga ku lembalala, ni mbote ja unzangala ué, ni jihenda jé ja ubhanga, ni kioso ki ua ngi kaiejela jinga mu kikangalakata, mu ixi ki i xikina ku i kuna.

Izekiiele 47:9

Hé ki kala-phe kuma, kima kioso-kioso kiá kia di bhange ni muenhu, kienda dízula, kia kà kola muenhu kuoso-kuoso kiá ku bhita o ngiji iii, anga kua kà kala nzungule ia jimbiji; o kuoso ku di texila o menha iá a kà toualesa o menha a kalunga; o muoso kiá mu bhita o ngiji iii, ima ioso i kola o muenhu.

Ijila 23:36

Sambuadi dioso dia izuua di mi bhuila muene ni kibhakula jisata ja kuoha kua Jihova; mu kizuua kia kanake bhu kala kionge kikôla, mu bhela-bhu ue ma-ujitu ma kubhakula ni túbhia kua Jihova; kizuua kienhiki ki kale kia ujitu, ki bhu kale-phe kututumba ni midimu ia kima.

Ijila 23:39

Maji-phe, mu kizuua kiene kià kuinhi ni itanu ku mbeji ia kasambuadi, kioso ki mua-nda kuila o ibundu iaʼxi ienu ioso mua i bhongolola kiá, mu bhanga kiá o fesa ia Jihova mu sambuadi dia izuua; mu kizuua kia dianga ni mu kizuua kia kanake, mu kala ni dinhohenu dienu dikola.

Mikeia 6:9

Dízui dia Jihova dì diʼixana o sanzala, o uoso njimu, u kala ni uôma ua dijina diê. Ivenu enu mu akua sanzala, ni ió uoso ua mu i tumina.

Zakadiia 9:15

Jihova dia Ilombo Ieta muene ua-nda ku a xitila; akua kubhânga ni jimbalafunda a-nda kua kà a jikinisa anga a a titidila muene bhoxi; o manhinga mâ a kà ma nua kala vinhu; a-nda kua kèzala kala jímbia ja sata, a kèla muene kiololo kala bhu jithungi ja Kalatódio.

Dialuilu 29:35

Mu kizuua kia kanake, mu kala ni kionge kia dithoka; ki mu bhange kikalakalu kioso-kioso;

Matesu 11:28

Zenu kokuami enu oso mua bhuila, enu mua tate ni imbamba ia mi nemena, eme nda ngi mi nhohese.

Matesu 3:3

Muenhú muthu a mu tanga kuala Izaia, o polofeta, uixi: Dízui dia ió u dikola mu ditutu, iudikenu njila ia Ngana, iukisenu o ikoka iê.

Matesu 5:6

A zediua ió, o kubhanga ima ia iuka a ku kuatela nzala ni dinhota, mbata hádia ekuta.

Nzuá 1:23

Muène ua vutuila kala kiambele Izaia dia polofeta, uixi: Eme ngi dízui dia ió u di kola mu ditutu: Iukisenu njila ia Ngana, phala a bhite.

Nzuá 14:6

Jezú uixi: Eme ngi njila, ngi kidi, ngi muenhu. Kana muthu u bhixila kua Tata, ua kambe kuijiia ko kuami.

Nzuá 4:10

Jezú anga u mu vutuila, uixi: Eie se uejidile o ujitu uene mù bhana Nzambi, o ua ku bhingi menha ue, se ua mu ijidile, eie ueji ku mu bhinga muène, nʼa ku bhane menha ma muenhu.

Nzuá 4:11

Muhatu, uixi: Ngana, eie kuala ni kizenzu kia kusunga na-kiu o menha, kixima kia zongo. O menha ma muenhuʼó, u ma sanga kuebhi?

Nzuá 4:14

Maji uoso u nua o menha mu ngi mu bhana, nuka a kala dingi ni dinhota. Mukonda menha mu ngi mu bhana, ma-ndu biluka fixi moxi diê, i fuáfua menha ma kalelà-ku ndú ku muenhu ki uábhua.

Nzuá 5:40

Enu-phe nguenu kuiza ko-kuami, ni mu tambule o muenhu.

Nzuá 6:35

Jezú ua ambela, uixi: Eme ngi mbolo ia muenhu. Uoso uiza ko-kuami, kà kala dingi ni nzala, o uoso u ngi xikana eme, kà kala dingi ni dinhota.

Nzuá 6:37

Oso a ngi bhana kuala Tata, a-ndu kuiza ko-kuami. Uoso-phe ueza ko-kuami, eme ki ngi mu texi, lémbua!

Nzuá 6:55

Kuma o xitu iami kúdia kua kidi, o manhinga mami kùnua kua kidi.

Nzuá 7:28

Bhenhobho Jezú, kioso kiala kulonga mu Tembulu, u di kola, uixi: O kuila enu mua ngʼijiia muene kiambote, muejiia ku nga tundu? Ki eme-phe nga di katula, sai ua ngi tumu mukua kidi, enu ki mu mu ijiia.

I Kolindo 10:21

Enu ki mu tena kunua mu kopho ia Ngana, ni mu kopho ia madimonho. Ki mu tena ue kudia ku meza ma Ngana ni ku meza ma madimonho.

I Kolindo 10:4

Ene oso a nuine kunua kuene kumoxi kua nzumbi. Kuma a nuine jinga ku ndanjiʼ oio ia nzumbi ia kexi mù kuenda na-iu. O ndanji-phe muene Kristu.

I Kolindo 11:25

Kiene kimoxi ue kia bhangele ku kopho, kia zubha o kuseiala, u i kuata, uixi: O kopho iii, kiene o kikutu kiobhe bhu kaxi ka Nzambi ni athu, kiojike kidimbu ni manhinga mami. Kioso ki mu nua jinga ku kopho iii, mu ki bhanga mu ku ngʼ imununa Eme.

I Kolindo 12:13

Kuma ku Nzumbi imoxi etu oso a tu batizala mu mukutu umoxi, kixi tu Jijudé, kixi ki tu Jijudé, kixi tu abhika, kixi tu jifôlo. Etu oso a tu nuisa ku Nzumbi imoxi.

Efezo 5:18

Kana kukodiua ni vinhu, mukonda i mi bhekela kutexika. Kota mu izale ni Nzumbi ia Nzambi.

Dijingunuinu 21:6

Anga u kumuna dingi, uixi: Maka ma zubha kiá kubhita! Eme ngi Alafa ni Omeka, ngi Dimatekenu ngi Dizubhilu. Uoso dinhota dia mu kuata, ngi mu bhana kunua bhʼotho ia menha ma muenhu, mu ngoho.

Dijingunuinu 22:1

Anju anga u ngʼidikiza ue o ngiji ia menha ma muenhu, mazele kala kidistalo, i fuafua bhu kiandu kia Nzambi ni kia Kambudi,

Dijingunuinu 22:17

Ni Nzumbi ni Dibhanga, edi: Izá! Uoso ue uívua imʼíii, ele: Izá! Uoso dinhota dia mu kuata, eze. Uoso uandala, a tambule o menha ma muenhu mu ngoho.