Nehemiia 9:34 - O Mikanda Ikola

³⁴ O jisobha jetu, ni ilamba ietu, ni jinganga jetu, ni jitata jetu, kitumu kié ka ki bhakele, ka bhele mátui ku ijila ié ni ku maumbangi mé, kioso ki ua kuata jinga ku a bazela.

Nehemiia 9:34 ပူးပေါင်းရင်းမြစ်များ

II Jisobha 17:13

O Jihova iú ua bazela jinga Izalaiele ni Juda ku ukunji ua misesedi iê, ni ku mizambuidi ioso, uixi: Ku jinjila jenu ja ibha tundenu-ku, muende ni kubhaka o ijila iami ni jingonge jami, kala kiambe o kitumu kioso ki nga tendelela ku jitata jenu, eme ue ngi mi tumikisa na-kiu ku ukunji ua abhikʼami, o misesedi.

II Jisobha 17:15

Iá a tènde o jingonge ni kikutu kia Jihova, kia tele ni jitata jâ, kiene ue kimoxi ni maumbangi mê ma a bazela jinga na-u kuala Muene; iá a kaiela ngó ukumbu, a kituka kingoho; a kaiela ue miji ia matumbu ia kexile mu jimbandu jâ, ioio ia ambelele Jihova, kuila: Kana ku a fikisa ni kubhanga ima kala ene.

II Malunda 29:6

Kuma jitata jetu a tondala, ia a bhange muene kiaibha ku mesu ma Jihova, Nzambi ietu, kuma a mu xisa; mesu mâ a ma katula ku dilombe dia Jihova, ia a mu bhana dikunda.

Ejidala 9:10

Kindala-phe, Nzambi ietu tuanda kuzuela kiebhi ima iala kiki! Kuma tua xisa ijila ié, i ua tu tendelela ku abhikʼé, o jinganga, uexi:

Nehemiia 9:30

Eie-phe ua a vungina ni kilendu kié mu mivu iavulu, anga u kuata ku a bazela ni Nzumbi ié, mu ukunji ua jipolofeta jé; maji ene-phe nguaʼuâ ku ku bhana mátui; kia ku bhangesa ku a bhana bhu lukuaku lua ifuẋi ia akua jixi.

Nehemiia 9:33

Maji, Eie-phe Ngana, mu ima ioso iala kuiza ku thandu dietu, ua lunguʼê; mukonda o kuiuka kué kuene kua ku bhangesa-kiu, etu o kubhuma kuetu kuoso kuene kua tu bhangesa o ima iii.

Nehemiia 9:35

Mbata ene mu ixi ia ungana uâ, sumbala ni jimbote janzungule ji ua a bhana, ni ixi iadixala íi ia nete i ua a tudila ku pholo, nguaʼuâ ku ku bheza, mba a ta dikunda ku ibhangelu iâ iaiibha.

Jelemiia 29:19

Mbata a lémbua ku bhana mátui ku maka mami eme ngi Jihova, kioso ki ngala ku a tumikisa abhikʼami, jipolofeta; ngi di meneka muene mu ku a tumikisa maji enu-phe mua tokoka o kuívua, kiene kia zuela Jihova.

Jelemiia 44:17

Kota-kota tua-nda kutumaka kizuelu kia tundu mu kanu dietuʼetuene, tuenda ni kuoha jinga o uasu ua dizumba kua sobha ia diulu ia muhatu, ni ku mu bhakuila makúnua, kala ki tuene mu kubhanga kiá etu, ni jitata jetu, ni jisobha jetu, ni ilamba ietu, mu jimbonge ja Juda ni mu jinzunga ja Jeluzaleme; etu tuene mu kala ni kúdia kua di xala ni kusanguluka, kana-ku ue kuiibha kuoso-kuoso ku tua mono.

Jelemiia 44:4

Eme-phe, abhikʼami oso, o jipolofeta, nga mi tumikisa-nâ, ngi di meneka mu ku a tumikisa ku mi tangela, kuila: Tatʼenu! Kana kubhanga kiki kia bolo ki nga ibhila eme.

Izekiiele 5:6

Maji muene-phe o mabatuilu mami ua ma lungulula mu ufusa, miji ioso ndenge, ni jingonge jami ue ua beta ku ji lungulula o jixi ja mu kala mu jimbandu ndenge; mukonda a tènde mabatuilu mami, nguâ kuenda mu ijila iami.

Daniiele 9:6

tuedi ni jipolofeta jé, o jiselevende jé, ene ku tu tudila kioso ki ua-mbe eie, ki tuala ku a bhana dingi mátui kia tangela jisobha jetu mu dijina dié, ni ilamba ietu, ni adiʼetu, ni mundu uoso mʼoxi.

Matendelelu 31:21

Kioso-phe kia-nda ku a tula o nzungule ia mavuua ma hadi ni mbùnda, o mukumbi iú uene ua-nda ku ngi kala mbangi iami, uixi: Mua bele; mukonda ka-nda kutena ku u jimba, ua-nda kuxalela mu kanu dia mbutu iâ; kuma eme ngʼejiia kiambote o ilunji iâ, iala ku di funina kiá lelu, sumbala kiluua ngʼa tula mʼoxi i nga a lokela.