Nehemiia 1:6 - O Mikanda Ikola

⁶ jikula-phe, Ngana, o mátui mé, ni mesu mé ma jikuke, mu kuívua o musambu ua mubhikʼé, u nga mu samba lelu bhu pholo ié, mʼusuku ni mu muanha, mu diondela abhikê, o anʼa Izalaiele; ni ku diẋikina kutukulula kokué o ituxi ia anʼa Izalaiele, i tua ku tela eie; mukonda eme uami ni dibhata dia tatʼetu ituxi tua i te.

Nehemiia 1:6 ပူးပေါင်းရင်းမြစ်များ

I Jisobha 8:30

Ivua-phe o kudionda kua mubhikʼé, ni kua kifuxi kié kia Izalaiele, kioso ene kia ku sambela mu kididi kiki, eie ívua ue bhu kididi kié ku diulu ku ua tunga; uívua-phe, anga u loloka.

I Jisobha 8:47

ene anga ku ixi kua ambata ku ubhika a sunga kilunji, anga a diela, hé mu ixi ia ubhika uâ a ku dionda, exi: Tua te kituxi, tu akua kikuma, tua bhange ufusa;

II Malunda 28:10

O kiki-phe enu mua-lu xinganeka kuila anʼa Juda ni Jeluzaleme a kala abhikʼenu, kuma ala jihutile ja mala ni ja ahetu; manhi kʼenuʼenu muene amoxi ni enhó, ala ni kikuma mu kaẋi kâ, kua Jihova, Nzambi ienu?

II Malunda 29:6

Kuma jitata jetu a tondala, ia a bhange muene kiaibha ku mesu ma Jihova, Nzambi ietu, kuma a mu xisa; mesu mâ a ma katula ku dilombe dia Jihova, ia a mu bhana dikunda.

II Malunda 6:40

Kiki-phe, tata, eie u Nzambi iami, mesu mé a tone, o mátui mé evidile o musambu ua kididi kiki.

Ejidala 10:1

Kioso Ejidala kia mu samba kiki, ni kufisala kuku, ni kudila, ua dizale bhoxi ku pholo ia inzu ia Nzambi, a di bongoluela kua muene, kionge kia dikota kia anʼa Izalaiele kia mala ni ahatu ni tuana tua ndenge mukonda mundu ua kexile mu ku dila ni kibulukutu kia dikota.

Ejidala 10:11

Kiki-phe, di fisadienu kua Jihova Nzambi ia jitata jenu, mu bhange kioso kia mu uabhela muene; ki mu di bunde ni athu akua jixi jengi, ahatu a jixi jengi di muangununienu-nâ.

Nehemiia 1:11

Ngana, tata, mátui mé-phe, ma jikukile o musambu ua mubhikʼé, kumoxi ni musambu ua abhikʼé ala kuinda kuxila o dijina dié; mubhikʼé, lelu, anga u mu zediuisa, nʼu mu bhana o kiadi bhu pholo ia muthu iú. Bhenhobho-phe eme ngala ngi mukuati a nganza ia sobha.

Jisálamu 102:17

Ua suu kiá o kusamba kua jihukunhu; kala mu kudituna dingi o ku di tenda kuâ.

Jisálamu 106:6

Ituxi tua i ta jinga kala o jitata jetu, tua bhange muene kuxibhaka ni kubhukumuka; tua bhange muene kiaiibha.

Jisálamu 130:2

Ngana, ngʼivue o dízui diami; bhana mátui kioso ki ngala kudikola.

Jisálamu 32:5

Ngixi-phe: Kota ngi di xikina kituxi kiami ko koué, o kuêla kuami ki ngi ku sueka; o ki ngedi ngi fisala kutondala kuami kua Jihova, eie kindala ua ngi loloka o kituxi ni mulonga.

Jisálamu 34:15

Mesu ma Jihova ma lûngu kua iá aiuka, o mátui mê mala kuividila kioso kia di kola.

Jisálamu 55:17

Ni ngoloxi, ni kimene, ni mediia, ngi di tenda kua muene, ngi kumba; o muene-phe u ngʼivua dízui diami.

Jisálamu 88:1

U Jihova, Nzambi ia ubhulukilu uami, ngi dikola ko kué muanha ni usuku.

Izaía 6:5

Bheneʼobho ngixi-phe: Kokolo diami! Eme ngafu-ó! Mukonda ngi muthu nga xidi mu kanu, eme nga tunga muʼaxaxi ka mundu ua kasana o dikanu, o mesu mami ia a mono Muenexi, Jihova dia Ilômbo Ieta!

Kuditenda 5:7

Jitata jetu a zangele, kuma a tele kituxi, ia afuá-phe kiá. Etu-ku, leluʼidi etu tuahula o mulonga uâ-ène.

Daniiele 9:15

Ni kidi kiene, Jihova, Nzambi ietu, eie muene ua katula o mundu ué kʼoxi ia Ejito, ni lukuaku lua undanda, dijina dié diʼdia fumana, katé mu kizuua kia lelu; tua te kituxi, tu akua ikuma ia phekalu!

Daniiele 9:20

O ki nga kuata kuzuela kiki, ni kusamba, ni kufisala kituxi kiami, ni kituxi kia mundu uami ua Izalaiele, ni ku lundulula o musambu uami ua kutoloka bhu pholo ia Jihova, Nzambi iami, nga-lu diondela o mulundu uangene ua Nzambi iami.

Daniiele 9:4

Anga ngi dionda Jihova Nzambi iami, nga di fisala, ngixi: U Nzambi ionéne, u kuatesa uoma! Eie uene mu kukumbidila o kikutu, u mukua ku kuatela henda kua ió oso a ku zola, hé aiuka o ijila ié;

Daniiele 9:5

etu tuate ituxi, tua bhalumuna mulonga, tua bhange kubhukumuka, tua ku balukila, o mu ijila ié tua tundumu ni mu itumu ia mabatuilu mé;

Daniiele 9:8

Jihova, tata, pholo ia tu sonoka ni jisonhi, maji kia tu fuama, nʼetu ni jisobha jetu, ni ilamba ietu, ni jitata jetu, mukonda tua ku te kituxi.

Luka 18:7

Abha, Nzambi u kamba kufundisa athuʼê ua a sola, a di kola-kola kua muène mu muanha ni mu usuku, anga ua zokelela mu milonga iâ? Manhi u kokoloka mu ku a banda?

Luka 2:37

Hanji-phe kia xala mutudi, ua kuata kiá makuinhi-nake a muvu ni iuana. Muène, mu Tembulu kene kutunda-mu dingi, u kala-phe mu kalakela Nzambi ni mu usuku ni mu muanha, ni kujejuuala ni kusamba.

Efezo 2:3

Ni kidi-phe, etu ene oso muene mu tua nhunganena jinga mu jihanji ja xitu, ni kubhanga o jivondadi ja xitu ni ja muẋima. Mu kieniiki o kikexilu kietu ki kala kia anʼ a njinda, mu kutambula o kaxtiku ka Nzambi, mukuâ ni athu ene oso.

I Timote 5:5

Muhatu uoso-phe uala mutudi mu kidi, ka moneka thumba ni samba u mu tambula konda, ió o kudielela kuê kua kuata ngó kua Nzambi, kuma u jijila kusamba usuku ni muanha mu kubhinga dikuatekesu kua muène.

II Timote 1:3

Nga sakidila Nzambi, nga mu sedivila ni kitongoluelu kiazele, kala kia bhanga jinga a a kukuetu. O mu kusamba kuami, ni mu usuku ni mu muanha, ngene mu kusakidila jinga Nzambi izuua ioso, kioso ki ngi kala mu ku ku lembalala.

I Nzuá 1:9

Maji se tu fisala o ituxi ietu kua Nzambi, muène fiiele, u kumbidila o kizuelu kiê hé u tu bhanga kioso kia fuama: U tu loloka o ituxi ietu, hé u tu ixika o mangonha moso.

I Samuuele 15:11

Nga dielesa kiá o kuta Saúlu ku ungana, kuma muene ua ngi bhana dikunda, ua di tunu ku ngi kaiela eme, iú ua fulu ku kumbidila ioso i nga mu tumu. Samuuele anga ki mu iibhila kiavulu; hé u dikola kua Jihova usuku uoso uenhó.