Ndongixi 9:3 - O Mikanda Ikola

³ Kienhiki kiene o kima kia iibha ku ima ioso iene mu ku bhanga Kulu-dia-Mundu; kuila athu oso ima i a bhita kumoxi; kuila ue o muẋima ua anʼathu uezala ufusa; o ku muẋima uâ ni ku muenhu uâ kuala ngó kutulumba ni kubhanga kiaiibha, hádia hé aia kiua muʼalunga.

Ndongixi 9:3 ပူးပေါင်းရင်းမြစ်များ

Dimatekenu 6:5

Ngana anga u mona kuma o kubhuma ni kubhukumuka kua muthu kua di vuala mu ngongo, o ilunji ioso ia ku xinganeka kua muxima uê, ia ibha ithangana ioso.

Dimatekenu 8:21

Ngana anga uívua dizumba diambote; Ngana anga uamba ku muxima uê, uixi: Ki ngi tona dingi, ixi ku i ta mázui mukonda dia muthu, kuma ilunji ioso ia ixinganeku ia muthu, iaiibha tunde mu undenge uê; ki ngi tena dingi ue o kubuikisa mienhu ioso, kala ki nga bhangʼiki.

Jobe 15:16

kuambe dingi o muthu ua kasana, ua xidi, únua o ituxi kala menha?

Jobe 21:26

Ene oso kumoxi a a funda mu mavu, o momo kiá tubamba tuene tu a vungina ene oso.

Jobe 9:22

Kokuami iene ioso ia sokoʼé, kiene ki ngedila, ngixi: Muene u buikisa ni muthu uambote ni kisuéia.

Jisálamu 51:5

Tala-ze, eme a ngi vualela mu lusebu; mu ituxi kiá mua ngʼimitina mamʼetu.

Jisálamu 64:7

Nzambi phe hinu u a asa ene; hinu a tukumuka musongo uê ua a kuata kiá!

Jisabhu 14:32

Kisuéia, o usuéia uê uene ua-nda ku mu kakula; maji o muthu Uaiuka-phe, katé ni mu kúfua kuê, hanji sai kia dielela.

Ndongixi 1:17

Anga ngiia, ngixi: O muẋima uami ngi u te hanji mu kutongolola o unjimu ni kuijiia kiambote o Ulaji ni Uôua; o ki nga iedi sui, nga tetuluka, ngixi: Mbé iene iosuʼiii ue dilamba ngó ku muenhu.

Ndongixi 12:7

O fufuta ni i vutukila ku mavu kala ki ia kexile, o nzumbi anga i vutukila kua Nzambi ua i bhele.

Ndongixi 2:14

O njimu mesuʼê a mu kala mu mútue, o kiôua-phe uendela mua vundu; sumbala a di tungula maji nga tetuluka kuila o ima i bhita kua iú iene ue i bhitʼê kua ió.

Ndongixi 7:2

O kuia mʼonzo ia thambi kota, kuindi mʼonzo muala o fesa; mukonda o momo athu muene mua muena o dizubhilu diâ; athuʼoso a muenhu a ki ta muene ku miẋima iâ.

Ndongixi 7:25

Anga ngi lunguluka dingi, hé ngi sola ni muẋima uami o kuijiia, ni kutongolola, ni kusota o unjimu, ni kilunji, ni kuijiia o kudianguka kua kubhanga ia iibha, ni ulaji ua kutulumba, eme nga mono kuila o kubhanga kiaiibha ulaji uene, o kubela uôua.

Ndongixi 8:11

Mukonda dia kuila o ibhangelu ioso ia ibha ka mu i fundisila-bhu kiá kindala, kiene kia bhangesa kuila o muẋima ua anʼathu ua lunguʼé kiá ngoho mu kubhanga kia iibha.

Ndongixi 9:11

O ki nga lunguluka, nga mono ku mundu kuila o lusolo ki lua ió ngó a bhebhuluka, mba o mazonda ene ngoho a tolola o ita, né ue o kúdia ki phala ngoho oso ejiia, mba o jinjimu ene ngoho a mona o umvuama, mba oso a xitunuka mu thulu ene ngó a bonga o ujitu, maji o ibatu ni jithembu ja tokala ene oso mu uzediuilu ua muthu ni muthu.

Ndongixi 9:2

Mu ngongo ima ioso iene imoxi i bhita ku athuʼoso: O ki bhita ku muthu ua iuka, kiene ue ki bhitʼé ku muthu ua ibha; o ki bhita ku muthu uambote ni kua iú ua zele o muẋima, kiene ue ki bhitʼé kua iú ua xidi o muẋima; ki kala iú u bhana o jisata, uixi iú ka bhakula sata; ku tale iú ka xikina ku ta ituxi, uixi iú u ta ituxi; ku tale iú ka xikina kuloka uixi iú mukua kuloka.

Ndongixi 9:4

Tala-phe, kuila o muthu kioso kia kala hanji muʼaxaxe ka athu a muenhu, sai-ku kia kudielela. Kuma, kota o ímbua iala ni muenhu, kuindi o hoji ia fu kiá.

Jelemiia 16:12

Enu-phe mua beta ku zanga, o jitata jenu ndenge; mbata, talesa hanji muthu ni muthu mudienu kia kuata ku kaiela kia mu tumu o muẋima uê ua kubhukumuka, mbé o kufula ku ngi bhana eme o mátui.

Jelemiia 17:10

Eme ngi Jihova eme ngi solokota o muẋima, eme ngi tungula o ilunji; ngi ki bhangela-phe kumona o futu ia tokala kubhana kala muthu kia fuama ku mauendelu mê, ni kia fuama ku ibundu ia ibhangelu iê.

Jelemiia 17:9

O muẋima ua muthu u bhomba kinéne, ima ioso ndenge, ua bhukumuka kiavulu: mukuahi u tena ku uijiia?

Luka 15:17

Kia zubha kusunga kilunji-phe, uixi: Akalakadi oso ianá ku bhata dia tatʼetu, ala ni kúdia kuâ kua soko, kua subhuka, eme-phe kunu, eme ngi-fua ni nzala!

Luka 6:11

Ene-phe ezala ni njinda, anga a kala mu ku di longesa kioso kia bhanga Jezú.

Jipoxolo 12:23

Mu kithanganʼokio, anju ia Ngana i mu kuama, mukonda ua kambe kujingisa Nzambi; anga u diua ku mabhuka, u zubhidisa.

Jipoxolo 26:11

Ngi kala luavulu mu ku a bhana kaxtiku mu jinzu joso ja mabhezelu a Nzambi, ngi bhindamena ku a xingisa Jezú ni kudituna o kuxikana. Mukonda ue njinda ia ngi kuatele kinene, nga a salukila kiavulu, katé nga a zukutisa ni ku madiembu a makanga.

Jipoxolo 26:24

Kia kala muène mu kufunda kiki, Festu u di kola, uixi: Eie Phaulu, ua saluka! O kuijiia kuavulu, kua ku bhekela kusaluka!

Tito 3:3

Kuma mʼokulu etu-ene tua kexile, tua tobho, tua xibhaka, tua di nganala, tua bhikila maluimbi ma vula matelu, ni jihânji joso, tuende ni phulu ni dixinga, tua iibha, tua di zemba mudietu.

II Phetele 2:16

Muène-phe a mu bazelele mukonda dia kituxi kiê. Bûlu iê, kiama ki kiene kuzuela, anga i zuela ni dizui dia muthu, hé i fudisa polofeta kusaluka.